2 Milandu 17 - Amazwi Yakwe Leza 2013

Yeosafati wasontwa ukuya umwene

¹ Yeosafati aliwe uwapyanyile isi, umwene Asa apa wene. Nupya wakomilepo sana apa kucincintila aina Izlaeli.

² Wafyantike ivita vyakwe monsi kwene umu misumba ino Asa wasile wapokolola umu mpanga yakwe Efulemu.

³ Yawe wapolelile Yeosafati pano wakweti imisango yakwe isi Davidi ino wacitanga apakutandika, nupya wene atapepanga Tubaali. Wapepanga sile nu kutumikila Leza. Atalondelanga nanti ukucita ivyacitanga yamwene aku Izlaeli.

⁴ Watumikilanga sile Leza wa cikolwe cakwe nu kuyela amalamulo yakwe, ukwaula ukulondela ivicitwa vyakwe yamwene aku Izlaeli.

⁵ Yawe nawe fwandi ali pakukomya uwene wakwe Yeosafati apakuteeka ningo Ayuda. Na antu yonsi nayo ali pakumutuula ivintu, fwandi nawe ali pakukwata icuma acindama wakwe cimwi.

⁶ Umwene nawe ali pakukomeleka ukutumikila Yawe. Ukulunda pali cico, aonona incende zyonsi zino yapepelanga penepo utuluwi, atamola ni vimanyililo vyakwe Asyela umu mpanga ya Yuda.

⁷ Umu mwaka wakwe citatu uwa kuteeka kwakwe, Yosafati watumile inkombe zyakwe uku kusambilizya umu misumba yamu Yudeya. Watumile Beni Haili na Obadiya na Zakaliya alino na Netaneli na Mikaya.

⁸ Yapisile pamwi na ina Levi fundimbali. Amazina yao a Syemaya, Netaniya, Zebadiya, Asaeli, Syemilamoti, Yeonatani, Adoniya, Tobiya na Tobadoniya. Alino na yasimapepo yaa: Elisyama na Yeolamu.

⁹ Yasenzile nu lupapulo lwa masunde yakwe Yawe nu kupitana monsi umu misumba yamu Yuda ale yakusunda antu.

Ululumbi nu ucindami wakwe Yeosafati

¹⁰ Yawe walenzile incende yonsi iyazigulwike impanga ya wene wakwe Yeosafati iye iyakoofya kuli wensi akulonda ukulwisya Yeosafati.

¹¹ Aina Filisti nayo yatandika ukuletela Yeosafati siluva nyanya, pamwi ni vya mawila vyuze. Alungwana nayo yamuletela imfwele 7, 700. Yasuku nayo kwene 7, 700.

¹² Fwandi amaka yakwe Yeosafati pasi pakukulila kweneko umu mpanga yonsi iya Yuda. Akuula ni misumba ya malinga nga ni yakusungilamo ivintu.

¹³ Ali muno yasezya ivyuma ni vintu nyanya. Aikamo na yakalinda umu Yelusalemu yayo amanyikisye ukulinda,

¹⁴ ukulingana ni ndupwa zyao. Adina ali wino waya umukalamba uwa kulolekesya apa vita vya ndupwa zya Ayuda. Kuli kuti waya a musika mukulu uwa vita 300,000.

¹⁵ Uwali wakwe ciili a Yeoanani. Nawe wali a musika wa vita 280,000.

¹⁶ Uwalondelile penepo wali a Amasiya umwana umonsi wakwe Zikili. Nawe watungululanga ivita 200,000. Amasiya watumikilanga Yawe Leza, umu kuipelesya umwisikulu.

¹⁷ Alino palondelela Eliyada uwamu mutundu wakwe Benjamini, uwali intunguluzi imwi iya vita 200,000 ivyaipangisye ivisyangu ni nceto.

¹⁸ Uwalondelelapo a Yeozabadi. Nawe watungululanga ivita 180,000. Ivita vyakwe vyali avimwi pano vyayanga lyonsi iviiteyanye uku kulwa inkondo.

¹⁹ Antu yao aliyo yatumikilanga umwene. Pali yao walunzile nayauze yano walasike umu misumba yakwe yamalinga, aali umu mpanga ya Yuda.