2 Milandu 16 - Amazwi Yakwe Leza 2013

Umwene Asa ni ntazi zyamu Izlaeli

¹ Umu mwaka uwalenga makumi yatatu na mutanda ya kuteeka kwakwe Asa, umwene Baasya waku Izlaeli wazanzile impanga ya Yuda. Atandika nu kukuula ilinga lyakucingilila umusumba wa Lama apakulesya apita nzila ukwingila nanti ukufuma mu mpanga yakwe Asa, umwene waku Yuda.

² Asa nawe fwandi ali pakutoola siluva na zaabu ivyali umu nkoma zya Ng'anda ikulu yakwe Leza nu mwi sano kwene, nga avituma uku Damasiko uku mwene Beni Hadadi uwaku Asilya, na mazwi yaa akuti,

³ “Leka tucite cipangano nawe, vivi kwene vino akwasi itu yapangine. Nakutumila siluva na zaabu ivya wila sile kunuli. Wemo pangulula sile cipangano cino mwacisile na Baasya, umwene waku Izlaeli uleke ace afumye ivita vyakwe umu mpanga yane.”

⁴ Ben Hadadi nawe asi mukanyi, azumilizya Asa, atuma ni nkombe izyakuti ziye zikalwisye imisumba ya ina Izlaeli. Yapokolola umusumba wa Iyoni, Dani, Abeli Maimu kumwi ni misumba yonsi iyazingulwike icitungu ca Nafutali, mumo umwali inkoma zya vintu.

⁵ Umwene Baasya lino uvwa vivyo, awe mukwai, ata nu kukuula ilinga uku musumba wa Lama, aongoloka.

⁶ Lyene umwene Asa akonganika aikazi amu Yuda yonsi, nga nayo iyaya yasenda amawe ni miti ino Baasya wakulilanga ilinga uku musumba wa Lama, ali vino yaya yakuulilila ilinga lya musumba wa Geba nu wa Mizipa.

Kasema Hanani

⁷ Apa kasita kwene kaka kasema, Hanani aya uku mwene Asa nga amunena ati, “Apamulandu wakuti wemo wataile umu mwene waku Asilya, umu cifulo ca kutaila muli Yawe, Leza wako, ivita vya ina Izlaeli vyativikupuuka.

⁸ Uzye kwene ivita vya ina Kusyi ni vyaku Libya vitakweti antu nyanya pamwi na maceleta? Lyene walola, apamulandu wakuti wataile umu mwene Leza Yawe wavicimvizye vyonsi.

⁹ Yawe Leza wako akalola pa nsi yonsi pyu, nu kupeela akapeela amaka akucimvya kuli yayo yano imyenzo yao ikamufukilila. Kwene paa pene wacita ivintu upuwaupuwa. Ali cino fwandi, ukutandika sile ilelo umalwanga inkondo.”

¹⁰ Cii calenzile kuti umwene Asa asokele kasema cakuti amwika umu ng'anda yaminyololo. Kufuma lilyo kwene umwene Asa atandika kuteeka antu uluku uluku.

Umwene Asa wafwa

¹¹ Ivintu vyuze vino Asa wacisile, ukufuma ku kutandika ukufika nu ku mpela, vyalembwa mu lupapulo lwa milandu yakwe yamwene aku Yuda na aku Izlaeli.

¹² Umu mwaka uwalenga makumi yatatu na fundimbali uwa kuteeka kwakwe, Asa walwile ulwale uku ngazo. Nga lelo nalyo kwene wene atataile muli Yawe, lelo waile kuli yasing'anga.

¹³ Papisile sile imyaka itatu afwa nu kufwa.

¹⁴ Yaile iyamuzika umwi lindi lino umwisikulu walanga wateyanya mpiti, umu Musumba wakwe Davidi. Apa kumuzika yamupasile ivimuti nga na mafuta acinunu cisuma. Apa ndosya yakwe iyapemba ni cininkwa ca moto icikulu sana.