2 Milandu 15 - Amazwi Yakwe Leza 2013

Umwene Asa wazifya ivintu

¹ Mupasi wakwe Leza uwikila pali Azaliya umwana umonsi wakwe kasema Odedi.

² Nawe ali pakuya uku mwene Asa nu kumunena ati, “Musambazi Asa, na mwe ikazi amu Yuda mwensi pamwi na ina Benjamini, nguvwini! Yawe ali namwe cikulu sile mwamutontela. Ndi mwamulonda, mulamuzana. Lelo ndi mwamufutatila, ale nawe kwene alamufutatila.

³ Apa nsita ntali aina Izlaeli yatenzi ukwaula ukutontela Yawe Leza wa cumi. Yatakweti nanti asimapepo wakuti angayasunda. Fwandi yatenzi ukwaula masunde.

⁴ Lino yaponilwe na malanda, alino yaswilila kuli Yawe, Leza wa ina Izlaeli. Iyamulondesya suka iyamuzana.

⁵ Umu manda yalya kutali umuntu nanti aumwi uwaipitilanga sile, pano imikosi yaponanga mpanga yonsi umu nsi zyonsi.

⁶ Antu ya mutundu onga yacuzyanga umutundu uze. Umuzi onga wacuzyanga umuzi uze, pano a Yawe umwisikulu aliwe wayacuzyanga nu kuyaletela amasyamo.

⁷ Ali cino fwandi mwemo komini sile, mutatovoka foo. Pasi pano apa milimo ino mukaomba, apano mulapokela icilambu.”

⁸ Walanga Asa uvwa amazwi yakwe kasema Azaliya umwana umonsi wakwe kasema Odedi, awe mukwai akomeleka nu kukomeleka. Atamola nu tuluwi tonsi utwali umu mpanga ya Yuda ni mpanga yakwe Benjamini. Aonona kumwi nu tuluwi kwene utwali umu misumba ni mizi ino wapokolwile, umu mpanga yakwe Efulemu iya myamba. Ali pakukuula na kavuwa kakwe Yawe cipya cipya kano kayelile umu musolo wakasi lwaku Ng'anda ikulu yakwe Leza.

⁹ Alino lyene akonganika amu mutundu wakwe Yuda yonsi na wakwe Benjamini, na wakwe Efulemu, ukwika penepo na wakwe Manase na wakwe Simeoni aikalanga pakasi kao, pasi pano aingi muno yali yizile ukufuma ku Izlaeli, yaya ku lusansa lwakwe Asa apakulola vino Yawe ali nawe.

¹⁰ Antu ali pakukongana uku Yelusalemu umu mwezi wakwe citatu umu mwaka uwalenga ikumi na isano uwa kuteeka kwakwe Asa.

¹¹ Uwanda kwene uo, iyatola ivyuma vimwi pa visampwe vino yasenzile yapeela ni mpolelwa kuli Yawe. Yakomile ing'ombe imyanda cinimbali, imfwele zyene amazimbi cinimbali.

¹² Ali pakupanga nu pangano uwakuti yamapepanga Yawe Leza wa vikolwe vyao ni myenzo yao nga nu mupasi wao onsi.

¹³ Yapangana nu kuti umuntu wensi, umwance nanti uwikolo, umonsi nanti umwanaci, uwakana ukupepa ndi muno yakulondela wene uwakukoma sile.

¹⁴ Apa kulapa kuli Yawe iyapundisya amazwi nu kuvwanga ndi vino yamasungisyanga upangano wao. Alino lyene iyakavya icongo nu kulizya intandala.

¹⁵ Ayuda pasi pakuzanga apakulola ukuti yalapa umulapo uo ni myenzo yao yonsi. Iyazanga sana apa kupepa Yawe, nawe nu kuyuvwa wayuvwanga nu kuyasunga ningo lyonsi.

¹⁶ Umwene Asa wafumizye Maaka uwali a nyinakulu, pa cifulo cakwe unamwene apamulandu wakuti nakulu wiyo walanga wapanga ulucesi ulwakolana nu mwanaci, luno wene wapepanga apakucindika Asyela, wakwe Leza wikwata. Fwandi Asa walanga wamanya cico, ali pakulutema, aluwisya nu kulukomoola. Aya alocela nu mu Cifoloma ca Kiduloni.

¹⁷ Nanti Asa wakanyile kuti atamole incende zino yapepelangamo tuleza, utuluwi apa myamba, wene watontelanga sile Yawe Leza amanda yonsi aumi wakwe pano nsi.

¹⁸ Wisile ni viya vyonsi umu Ng'anda ikulu yakwe Leza, vino isi wapaatwilile Yawe. Aika zaabu, siluva pamwi ni vintu vyuze vino umwisikulu nawe wapatwilile Yawe Leza.

¹⁹ Kutatazile ikuya inkondo, ukufika nu mu mwaka uwalenga amakumi yatatu na isano, yakuteeka kwakwe Asa.