2 Milandu 14 - Amazwi Yakwe Leza 2013

Umwene Asa wacimvya aina Kusyi

¹ Abiya afwa, nga yamuzika mu musumba wakwe Davidi ku nzisi ya vikolwe vyakwe. Asa umwana wakwe umonsi amupyana apa cilimba ca wene, nga mu manda ya kuteeka kwakwe, impanga yali cele apa myaka ikumi.

² Asa wacitanga ivintu visuma ivyakuzanzya Yawe.

³ Watandike ukutamola utuvuwa twa inamasi tuno yakuuzile nga ni ncende zya kupepela penepo. Fwandi waongolwile ivipilala vyamuzilo nu kuputola vimanyililo vyakwe Asyela.

⁴ Apela ilamulo ku antu amu mpanga ya Yuda yonsi ukuti yatontela Yawe, Leza wa vikolwe vyao, nu kulondela amasunde yakwe pamwi ni vyeo vyakwe.

⁵ Apamulandu wakuti wene ononyile ivintamba vyakupepelapo nu tuvuwa twa kocelapo ubani utwakuuzilwe monsi monsi umu mpanga ya Yuda camulenzile ukuti ateeke ukwaula intazi.

⁶ Apa nsita yakwe wakuuzile amalinga ukuzingulusya imisumba yamu Yuda. Nupya apa myaka ivule, kutatazile kuye izya nkondo pamulandu wakuti, a Yawe uwalenzile uwikazi wakwe uye zii, ku matwi cele.

⁷ Wanenyile aikazi amu Yuda ati, “Katukuule imisumba cipya cipya, tukuule kweneko na malinga. Apa mpongolo, twike penepo amaingwe ni mifikilo. Sweswe twateeka impanga pano asweswe tukayela Yawe. Nawe akatutuula muli vyonsi nu kututungilila.” Fwandi nayo ali pakukuula nupya yali nu longo wakwe cimwi.

⁸ Umwene Asa wali ni vita ivyaku Yuda ukulingana ni mpendwa 300,000, ala vyativiipangasya nu kuisokela uku vyanzo ni visyangu. Alino ivya ina Benjamini navyo 280,000. Navyo kwene vyativiipangasya ivisyangu ni nceto namalapwa. Vyonsi vyali ivisipe sana nu kuposya nupya vyamanyile ningo ukulwa inkondo

⁹ Umwina Kusyi umwi izina lyakwe a Zela aiza azanza impanga ya Yudeya. Wali ni vita amazimbi imyanda ikumi na maceleta nayo imyanda itatu aiza afika uku Malesya.

¹⁰ Alino Asa amukomenkanya uku kumulwisya. Iyakomenkana umu lunyika lwaku Zefata pipi nu musumba wa Malesya.

¹¹ Lyene Asa apepa kuli Leza wakwe ati, “We Yawe, kusi umwi akoline nawe wiyo angatutuula. We Yawe, Leza witu, si ule utwazwe, pasi pano amuli wewe sile muno tusintilile amaka. Umwi zina lyako amuno twatitwizila apakulwisya iumba lya vita lilyo ilikalamba. Iye we Yawe, wewe Leza witu nupya kusi nanti wenga angakucimvya.”

¹² Fwandi Yawe Leza nawe ali pakukomola aina Kusyi pa manso yakwe Asa na ikazi aku Yuda. Aina Kusyi yayacimvya nga yapuuka.

¹³ Asa ni vita vyakwe ali pakuyazinganya suka yaya yayafisya uku Gelali. Ivita ivingi ivya ina Kusyi pasi pakufwa. Navino vyasile vitakweti inzyansyo nanti limwi. Yawe pamwi ni vita vyakwe yacimvya ivita vyaku Yuda. Alino aikazi aku Yuda ali pakusenda ni visampwe ivivule vino yapokolwile.

¹⁴ Yasya yonona imisumba iyazingulwike Gelali, pano antu yano yatenzi mwenemo yakweti ntete kuli Yawe. Fwandi ivita vyazanzile imisumba yonsi ivisenda ni vintu nyanya.

¹⁵ Ivizanza na yakacema nu kuyapoka amaufyo yao amfwele, ingamila, nga viswilila uku Yelusalemu.