2 Milandu 13 - Amazwi Yakwe Leza 2013

Ulwi wakwe Abiya na Yeloboamu

¹ Umu mwaka walenga ikumi na cinani uwa kuteeka kwakwe Yeloboamu, Abiya watandike ukuteeka mu Yuda.

² Wateesile mu Yuda imyaka itatu. Nyina wali a Maaka, umwana umwanaci wakwe Uliyeli uwaku Gibeya. Kwali inkondo pakasi kakwe Abiya na Yeloboamu.

³ Abiya wakweti ivita 400,000. Alino Yeloboamu nawe wakweti ivita 800,000.

⁴ Fwandi ivita vyao vyakomenkine umu mpanga ya myamba yakwe Efulemu. Umwene Abiya wakwezile apapela ya mwamba wa Zemalaimu, umu mpanga ya myamba yakwe Efulemu, nga avwanga ati, “We Yeloboamu, pamwi na ina Izlaeli mwensi, nguvwini!

⁵ Uzye mutamanya ukuti Yawe, Leza wa ina Izlaeli wapangine upangano na Davidi uno utanga upanguluke? Upangano uo uwakuti, wene pamwi naswe swe ana yakwe, asweswe tumatekanga aina Izlaeli amanda pe.

⁶ Lelo Yeloboamu umwana umonsi wakwe Nebati, nupya cilolo wakwe Solomoni umwana wakwe Davidi, wasangukila umusambazi wakwe.

⁷ Ni viwelewele vya antu navyo vyamulondelezya, vyawila kuno ali. Vyatandika nu kupatikizya Leoboamu umwana umonsi wakwe Solomoni apamulandu sile nu wance wakwe, nawe waposiwa ukuyakanya.

⁸ “Acino fwandi mwemo mwemuno mukalonda ukulwisya uwene uno Yawe umwisikulu watupeela swe amu mupanda wakwe Davidi. Mwatimukwata ivita ivivule ni vyuma nyanya ivyapangwa na zaabu, vino Yeloboamu wapanga ivikoline na ana ya ng'ombe apakuti avino mwapepa.

⁹ Mwemo nu kuzinga mwazinga yasimapepo yakwe Yawe, ana aonsi yakwe Aloni, na ina Levi apa vifulo vyao. Mwasontela penepo yasimapepo yauze ndi vino antu amu mpanga zyuze zya inamasi yasonta. Ali kuti umuntu wensi wiyo uwiza na cipambasi nanti yasuku cinimbali, ku kuiswefya, wene ala angaya a simapepo wakwe tuleza kwene tuto utuluwi tuno mukati atuleza twinu.

¹⁰ “Lelo kwene swemo Yawe a Leza witu, nupya tutalatala tumusangukile. Yasimapepo itu ana yakwe Aaloni yacili yakuomba imilimo yao na ina Levi nayo kwene yacili yakuyazwilizya kweneko.

¹¹ Cila katondo na manguzi, yakapeela amawila yakoca ni vyamununko usuma kuli Yawe. Yakaika nu mukate api tebulo iliswefiwe ilyamuzilo. Nupya cila manguzi yakakozya inyali zino yatekwa pa vyakuteekapo inyali. Swemo tukalondela vino Yawe watukonkomizye, nomba mwemo mwamutalamila.

¹² Swemo, a Yawe akatutungulula. Yasimapepo yakwe ali yano twaya nayo pano, yalemile ni ntandala nupya aiteyanye kuti yalizye apakuti tukatuke nu kwiza ukukumulwisya. Ali cino fwandi, mwe ina Izlaeli mutaezya ukulwisya Yawe Leza wa vikolwe vinu! Pano lyene ale mwaicuzya sile nu kucimvya mutangacimvya foo!”

¹³ Lilyo kwene ale fwandi Yeloboamu watafyonsya ivita vyakwe vimwi apakuti vingaya vikateyamile ivita vya Ayuda lwaku nsizi. Alino vimwi navyo ale visile apamulola, apaswe, ukulolenkanya amanso ni vita vyakwe Abiya.

¹⁴ Lino Ayuda yati kayacelecensye yazana ukuti yatiyayalizizya. Nayo fwandi ali pakupunda Yawe Leza yati, “Tutuulwe!” Yasimapepo yao nayo yalizya intandala.

¹⁵ Aikazi amu Yuda yapundisya sana. Apakuuvwika kwa kupunda kuko, Leza acimvya Yeloboamu pamwi na ina Izlaeli yonsi apa manso yakwe Abiya na ikazi amu Yuda.

¹⁶ Aina Izlaeli mpaka yasuka yutuka aikazi aku Yuda, nga Yawe alenga kuti yacimvye aina Izlaeli.

¹⁷ Abiya pamwi na antu yakwe iyakomola aina Izlaeli wakwe cimwi, cakuti aina Izlaeli afwile yali imyanda isano.

¹⁸ Aina Izlaeli yacimviwe apa nsita ilya, lelo aikazi aku Yuda yacimvizye pamulandu wakuti yene yasintilile muli Yawe, Leza wa vikolwe vyao.

¹⁹ Abiya wazinginye Yeloboamu nu kumupoka imisumba ii: Betele, Yesyana na Efuloni, kumwi ni mizi iyazingulwike.

²⁰ Yeloboamu atatazile akwate penepo amaka akuteeka nupya. Lyene Yawe asuka amukoma afwa nu kufwa.

²¹ Cila nsita Abiya wakomelanga kweneko. Watwite anaci ikumi na yani. Wakweti ana aonsi amakumi yaili na yaili, na ana anaci ikumi na wenga.

²² Ivintu navyuze vyonsi vino Abiya wacitanga, vino waombanga na vino walandanga, vyalembwa umu lupapulo lwa ulondolozi lwakwe kasema Ido.