2 Milandu 12 - Amazwi Yakwe Leza 2013

Aina Eguputo yazanza Ayuda

¹ Lino uwene wakwe Leoboamu wakomile, umweneco kwene pamwi na antu yakwe yasuzile amasunde yakwe Yawe.

² Umu mwaka wakwe cisano uwa wene wakwe Leoboamu, Yawe atuma Syisyaki umwene waku Eguputo ku kuzanza umusumba wa Yelusalemu.

³ Syisyaki wakweti amaceleta izimbi lyonga ni myanda iili. Ivita ivyaomvyanga imfwalasi navyo vyali amazimbi amakumi mutanda. Alino ni vita navyuze ivitangapendwa, ukufuma ku Libya, nu ku Sukimu, nu ku Kusyi, vino vizile nawe ukufuma ku Eguputo.

⁴ Syisyaki ali pa kupokolola imisumba iya malinga iyali umu mpanga ya Yuda ukufika nu ku Yelusalemu.

⁵ Alino kasema Syemaya aya ku mwene Leoboamu nu ku ntunguluzi zya luko lwakwe Yuda izyakongine ku Yelusalemu umu kupuuka Syisyaki. Atandika ukuvwanga ati, “Yawe Leza wavwanga wati, ‘Apa kunsuula kuno mwatimunsuula, nani fwandi namamutazyela, muleke Syisyaki atale amupezye.’ ”

⁶ Umwene Leoboamu pamwi ni ntunguluzi zyamu Izlaeli nayo yazumila ukuti icacumi yatiyifya kuli Yawe. Yavwanga nu kuvwanga iyati, “Vino Yawe akulonda acite ivilungame.”

⁷ Nga walanga Yawe walola antu yaifusya, yamutontela, ali pakunena Syemaya ati, “Antu yaa apa kuzumila ukuti yaifya, nemo ntange njakome foo. Yapusuka sile kwempe, yatalasonda ni cipyu pamwi nu ukali wane, lino Syisyaki alayalwisya.

⁸ Nga lelo ukuyacimvya kwene alinzile wayacimvya, apakuti yailolele ulekano uwaya apakutumikila ne Yawe na yamwene amu mpanga zya inamasi.”

⁹ Syisyaki umwene waku Eguputo nawe ali vino wizile uku Yelusalemu aiza asenda iviya vyonsi ivyamu Ng'anda ikulu yakwe Leza kumwi ni vya kwisano. Asendenkanya kumwi ni visyangu vyakwe zaabu vino Solomoni wapanzile.

¹⁰ Umwene Leoboamu asyala walondelapo visyangu vyuze vya mukuvwa ivyakupyanikizya pali vyakwe zaabu. Avino apeela yakalinda yakalamba alindanga pa mpongolo zya kwisano.

¹¹ Insita yonsi lino umwene Leoboamu akuya ku Ng'anda ikulu yakwe Yawe yakalinda yaya ala yasenzile visyangu vivyo. Nga yawela yavisezezya umu muputule wakwe yakalinda.

¹² Apa mulandu nu kuicefya kuno Leoboamu waicefizye, icalenzile ukuti Yawe atamonona. Ni vintu vyonsi ivyasyala ivyamu mpanga ya Ayuda, vyapitikanga sile ningo.

Umwene Leoboamu wafwa

¹³ Umwene Leoboamu wateekanga umu Yelusalemu, ale nu wene wakwe ukukomela sile kweneko. Wali ni myaka amakumi yani na onga apa nsita ino yamulasike pa cilimba ca wene. Wene wateesile imyaka ikumi na cinimbali umu Yelusalemu, umusumba uno Yawe wasolwile mu mpanga yonsi ya ina Izlaeli ukuti amuno yangamupepela. Nyina wakwe Leoboamu wali a Naama, umwina Amoni.

¹⁴ Leoboamu wasusile waluvyanya kuli Yawe, apa kukanalondela ivikalonda Yawe Leza.

¹⁵ Imilandu yakwe Leoboamu pamwi ni ya luko lwakwe ukutandikila sile pano yamulasike pa cilimba ca wene, ukwizafika napa mfwa yakwe, vyonsi vyalembwa mu lupapulo lwakwe kasema Syemaya, alino nu mu lupapulo lwakwe Ido, kalola wa vilolwa. Leoboamu na Yeloboamu yalwanga lililili.

¹⁶ Leoboamu afwa, nga yamuzika mu musumba wakwe Davidi ku nzisi ya vikolwe vyakwe. Alino Abiya umwana wakwe umonsi amupyana pa cilimba ca wene.