2 Milandu 11 - Amazwi Yakwe Leza 2013

Usemo wakwe kasema Syemaya

¹ Lino umwene Leoboamu waswilile ku Yelusalemu, waile akonganika ivita vyakwe, ukulingana ni mpendwa ya mazimbi umwanda onga na makumi cinani amu nko zyakwe Benjamini na Yuda, apakuti yangaca yaye yakalwisye aina Izlaeli, imitundu ikumi yao aikalanga ukupela. Walondanga kuti yace yawezezye Leoboamu uwene.

² Nga lelo Yawe anena kasema Syemaya,

³ apa kuti anene umwene Leoboamu na antu yonsi yakwe Benjamini na Yuda ati,

⁴ “Mwemo mutaezya ukuya ku kulwisya aina Izlaeli yauzo. Lelo swililini sile kumwinu. Uwatacita icintu cii anene ne Yawe.” Fwandi nayo ali pa kuvwa amazwi yayo afuma kuli Yawe, nu kulwisya yataile ku kulwisya umwene Yeloboamu foo.

Umwene Leoboamu wakuula amalinga uku musumba

⁵ Leoboamu watenzi umu Yelusalemu nu kukuula wakuuzile imisumba ya malinga umu mpanga yakwe Yuda ni ya ina Benjamini iili wakwe ii:

⁶ Betelemu, Etamu, Tekoa,

⁷ Beti Zuli, Soko, Adulamu,

⁸ Gati, Malesya, Zifu,

⁹ Adolaimu, Lakisyi, Azeka,

¹⁰ Zola, Aiyoni, na Hebuloni. Ikwene yali imisumba ya malinga yamu mpanga yakwe Yuda ni mpanga yakwe Benjamini.

¹¹ Wakuuzile amalinga akome sana mu misumba yonsi. Asonta mwenemo na yamusika akulinda imisumba iyo. Muli cila musumba aikamo inkoma zya vyakulya, amafuta ya miolivi na waini umupangwe ukufuma ku matingi.

¹² Alino alundamo ni visyangu ni vyanzo. Fwandi wene ali vino wateesile antu amu mutundu wakwe Yuda na wakwe Benjamini.

Yasimapepo na ina Levi yasaamila ku Yuda.

¹³ Yasimapepo yonsi na ina Levi aikalanga umu mpanga ya ina Izlaeli yonsi, yafumile mu vitungu vyao nu kusaamila ku citungu ca Yuda.

¹⁴ Icalenzile kuti yasimapepo yakwate ukusya imfwele zyao umu ncende zyao zyakucemelamo kumwi ni mpanga yao nu kuya ku kwikala umu Yuda nu mu Yelusalemu, umulandu wakuti umwene Yeloboamu uwaku Izlaeli, walesizye yasimapepo yonsi aina Levi ukuomba umulimo wao uwa usimapepo, uku kucindika Yawe Leza wa ina Izlaeli.

¹⁵ Yeloboamu wene wasonsile yasimapepo yakwe akuti yapepa apa ncende zyakupepela penepo, apa myamba nu kutumikila tuleza tuluwi tuno walanga wamata, utukoline ni ng'ombe.

¹⁶ Antu ukufuma mu mitundu yonsi iya ina Izlaeli yano yapepanga Yawe, Leza wa ina Izlaeli nayo kwene yalondelela aina Levi ku Yelusalemu, apakuti yaocela Yawe Leza wao impolelwa.

¹⁷ Cico calenzile nu kuti uwene waku Yuda ukome. Apa myaka itatu yakomelezyanga Leoboamu umwana wakwe Solomoni, nu kwikala ndi vino yatenzi umu manda ya uteko wakwe Davidi na wakwe Solomoni kwene.

Akazi ka mwene Leoboamu

¹⁸ Leoboamu watwite Maalati umwana wakwe Yelimoti. Yelimoti wali umwana wakwe Davidi. Nyina wakwe Leoboamu wali a Abiaili, umwana wakwe Eliabu, umwana wakwe Yese.

¹⁹ Mangu wiyo waviile ana yatatu. Amazina yao a Yeusyi, Syemaliya na Zaamu.

²⁰ Umukaya amanda, Leoboamu watwite na Maaka umwana wakwe Abusalomu. Nawe amuvyalila ana aonsi yani. Amazina yao a Abiya, Atai, Ziza na Syelomiti.

²¹ Leoboamu watemilwe Maaka umwana umwanaci wakwe Abusalomu ukuluta vino watemilwe aci yauze asyala. Aci yano wakweti yonsi pamwi yali ikumi na cinani. Wakweti aci nayauze amakumi mutanda. Ana aonsi yano wakweti yali amakumi yaili na cinani, nga wakweti na ana anaci amakumi mutanda.

²² Alino apa ana yakwe yonsi aonsi Leoboamu watemwisizye Abiya umwana umonsi wakwe Maaka, nga nu kusolola ali wino wasile wasolola ukuti aka mupyane apa wene.

²³ Leoboamu wankinye imilimo uku ana yakwe usaka sana. Wayasilile ni misumba iya malinga iyayelile umu citungu consi ica mpanga ya Yuda na yakwe Benjamini. Wayapeelanga ivintu vyonsi vino yalondanga kumwi na anaci akuti yangatwala.