2 Milandu 10 - Amazwi Yakwe Leza 2013

Mitundu ikumi yaku Izlaeli yasangukila Leoboamu

¹ Leoboamu wakatwike nu kuya uku Syekemu, pasi pano aina Izlaeli yonsi kwene yaile kweneko ku kumulasika apa cilimba ca wene.

² Yeloboamu umwana umonsi wakwe Nebati wali uku Eguputo kuno uutukile apa koopa umwene Solomoni. Lino uvwa amazwi aupyanyi, awela.

³ Amutumila amazwi akuti awele, nga Yeloboamu pamwi na ina Izlaeli yonsi yaya kuli Leoboamu nu kumunena yati,

⁴ “So Solomoni watutesile uku kalili? Fwandi wemo ndi cakuti watuteeka ningo, watupeela upemwilo, swemo tumakutontelanga nu kukutumikila.”

⁵ Leoboamu nawe ayanena ati, “Mundolele kweneko apa manda yatatu apakuti nelenganye ningo. Alino muce muwele ukukuvwa.” Antu nayo yasi yakanyi, ali pakuswililamo.

⁶ Nawe umwene Leoboamu asyala auzya aikolo yano yapandanga umwene Solomoni amano ati, “Uzye antu yaa, ince injaasuke uli?”

⁷ Nayo ali pakumunena iyati, “Wemo ndi cakuti umauvwila antu, nu kwasuka umayasuka ningo lyene yamakutumikilanga ningo sana.”

⁸ Ku cisyamo umwene Leoboamu asuula amano ya ikolo. Aya auzya alumendo yauze yano yakuzile pamwi na aliwe ayano yamupanda amano.

⁹ Na pakuuzya ayano aya auzya ati, “Yayame, uzye mwemo mukuti uli? Uzye antu yaa tumayaasuka uli, pasi pano yene yizile yanena yati, ‘Wemo ndi cakuti umauvwilanga antu, nu kwasuka umayasuka ningo lyene yamakutumikilanga ningo sana.’ ”

¹⁰ Lyene alumendo yamwasuka yati, “Uyanene uti, ‘Ivyali tata asi vino nani indinzile ukuya, nemo nene muntu muze.

¹¹ Vino tata wamucuzyanga vyacepa. Nemo indi nu kucizya penepo. Tata wamuvupulanga ni mikota, lelo nemo indamuuma ni vikoti vyakwe civu nanti ni mikota ya vyela.’ ”

¹² Walanga amanda yatatu yapita, Yeloboamu na antu yonsi iyaya kuli Leoboamu wakwe muno wayanenyile.

¹³ Umwene nawe asuula amano yano aikolo yamupanzile, aasuka antu ukali ukali.

¹⁴ Alondela amano ya alumendo yauze yano yamupanzile. Aasuka ati, “Tata wamumanga ni mikota, Lelo nemo namamumanga ni vikoti vyakwe yacivu nanti iya vyela.”

¹⁵ Icalenzile ukuti umwene Leoboamu akane ukuvwa vino antu yalondanga apamulandu uno Yawe Leza walondanga ukufikilizyanga ivyasesime Aiya umwina Syilo pali Yeloboamu umwana umonsi wakwe Nebati.

¹⁶ Lino aina Izlaeli yonsi yalola ukuti umwene wakana ukuvwa kunoyali, nayo ali pakupunda yati, “Davidi nu lupwa lwakwe kayaliyali! Icani cino yatuombela? Mwe ina Izlaeli, katukini twapita kumwitu. Lekini Leoboamu alali.” Avino aina Izlaeli yamusangukile.

¹⁷ Leoboamu asyala sile umwene wa ina Izlaeli aikalanga umu misumba ya mpanga yakwe Yuda.

¹⁸ Lyene Leoboamu atuma Hadolamu, uwali kangalila wa antu aombanga ukwi sano uku mulaza. Lelo aina Izlaeli yaya yamutama na mawe mpaka afwa. Leoboamu intete zyamulema, akwela umwi celeta nu kupuukila uku Yelusalemu ukufika na pilelo kwene.

¹⁹ Fwandi ukufuma papo kwene ali pano antu akaikala ukupela uku Izlaeli yasangukile ulupwa lwakwe Davidi.