2 Kolinto 5 - Amazwi Yakwe Leza 2013

¹ Umwili uno twakwata pano pansi waya wa mutanda. Twamanya vino umutanda ndi waca ononeka tukweti ng'anda yuze kwi yulu, yene itakulwa na makasa ya antu nupya iyape na pe.

² Lino tucili pano pa nsi, tukateta pano tukulonda kwikala mu wikalo ulya uwa mwi yulu.

³ Tukulonda kuuzwala wa nsalu kuti tutaya tupu.

⁴ Swemuno tuli mu mutanda uu tukanyomelwa nupya tukateta. Tusyalonda kusya mili ino ilafwa, lelo tukalonda kuzwalilapo yuze ino italatala ifwe. Pakuti icikafwa cizimiwe ni cisyafwa.

⁵ Leza aliwe watuteyanyizya kusenulwa kuu nga watupela Mupasi Wamuzilo mu myenzo kuti alangilile vino sweswe akwakwe.

⁶ Acino lyonsi twaya akomeleke! Lyonsi lino tuli mu mili ii, ala tuli kutali nu Mwene.

⁷ Lelo tukaikala umi wakutaila, usi uwa pali vino tukalola.

⁸ Tulinzile kuya akomeleke, pamulandu wakuti catuzipila kusya mili ii kuti tuye mu wikalo wa Mwene.

⁹ Kuluta pali vyonsi, nanti cingaya uli, swemo tukulonda kuzanzya Mwene lino tuli pamwi nawe mu wikalo wakwe nanti lino tuli kutali kufuma kunoli.

¹⁰ Pano swensi kwene tulimilila nkolelo yakwe Klistu, kuti atupingule. Cila muntu alapokelela viine ni milimo ino wacita muno nsi, iipe nanti isuma.

Ucuza pamwi na Leza kupitila muli Klistu.

¹¹ Twamanya vino cikasenula koopa Mwene, caleka tukaezya kukonkomezya yauze kucita cii. Leza watumanya mu ufumaluke, nupya nkupaalila vino mu myenzo inu naswe kwene mwatumanya.

¹² Tusyakuitumika kuno muli lelo tukuvwanga kuti mungaya ni cakwasuka yano akailumba pali vino muntu akaloleka, ukuluta pali vino muntu waya mu mwenzo wakwe.

¹³ Ndi twaloleka avulungane ale pamulandu twacindika Leza. Lelo ndi twaloleka amano ale pamulandu wakumwazwa.

¹⁴ Kutemwa kwakwe Klistu ukukatupindulula pano twamanya kwaula kutwisika kuti muntu wenga wafwilile antu onsi, lyene swensi kwene twakuma ku mfwa yakwe.

¹⁵ Klistu watufwilile swensi. Wafwile pakuti tutaikala umi uwakuizanzya, lelo uwakuzanzya wino uwafwile nupya wazyukwike pamulandu witu.

¹⁶ Caleka ndakai tusyapingula antu kulingana na vino yakaloleka. Nanti angala pa nsita imwi twatazile tupingula Klistu kulingana na vino muntu akaloleka, lelo ndakai tusyacita vivyo.

¹⁷ Lino umuntu wailundanya kuli Klistu, wene akaya ciumbwa cipya. Vyampiti vyasila, vyonsi vikaya vipya.

¹⁸ Leza aliwe uwacita vii vyonsi. Wene watumile Klistu kupanga mutende pakasi kakwe Leza naswe, nupya watupela mulimo uwa kupanga mutende pakasi kakwe umwisikulu na antu.

¹⁹ Cino tukusenula cakuti Leza akupanga mutende pakasi kakwe na antu muli Klistu. Nupya wene watupela mulimo uwa kusalanganya ilandwe ilya kupanga mutende.

²⁰ Twatumilwe kuya nkombe zyakwe Klistu, Leza umwisikulu akumupapata kuti mupange mutende pakasi kinu na aliwe.

²¹ Klistu atatazile aifye! Lelo Leza wamucisile wakwe kaifya pamulandu witu, kuti muli Klistu tukume ku wololole wakwe Leza.