2 Kolinto 2 - Amazwi Yakwe Leza 2013

¹ Caleka nemo nasolwile ku ntiza kuno muli nupya kuti ntamulenga muvwe ulanda.

² Pano ndi namulenga kuvwa ulanda, lyene aweni angasyala kuti ansansamusya? Suka sile antu kwene yano ningalenga kuvwa ulanda.

³ Cino nkulonda kuya nu luzango apamulandu wakuti namwe kwene muye nu luzango. Nalemvile kalata pano ntalondanga kumutandalila nu kundenga kuvwa ulanda, mucifulo cakuti mwemwe mulinzile kundenga kuya nu luzango.

⁴ Pa nsita ino nalemvile kalata kuli mwemwe, nali mu kucululuka cuze. Manso yane yazilemo minsozi, nga nu kunyunguluka mu mwenzo. Lelo ntalondanga kuti muvwe ulanda. Nemo nalondanga sile kuti mumanye kutemwa kuno namutemwa.

Kwelela muntu ali nu mulandu.

⁵ Lyene muntu umwi ndi watalenga muze kuvwa ulanda, ale wene atacisile cii kuno ndi lelo kuno muli mwensi. “Nalanda cii pamulandu wakuti ntakomya mulandu kuno muli.”

⁶ Cati cilingana pali vino aingi muno muli mwati muvunuka muntu wii pakumunenola pali vino waluvyanya.

⁷ Lelo nanti angala muntu wifya, mulinzile kumwelela nga nu kumukomelezya, kuti mutaleka auvwe ulanda nga nu kunenuka.

⁸ Caleka nkumupapata kuti muleke wene amanye mu cumi vino mwamutemwa.

⁹ Nalemvile kalata wiya kuti nezye kumanya ndi mukaposya mu mezyo nupya ndi munganjela muli vyonsi.

¹⁰ Muntu wino mwelela nani ala namwelela, na cino namwelela nda kuno cili cakwelela ala namwelela pamulandu winu pa manso yakwe Klistu.

¹¹ Nemo nacita cii kuti ntaleka Satana aye na maka pano tuli. Pano twamanya mapange yakwe vino yaya.

Paulo wasakamikwa mu musumba wa Tuloa

¹² Lino nafisile mu Tuloa kuti nkosole Ilandwe Lisuma lya pamulandu wakwe Klistu, nazanyile vino Mwene wayula inzila kweneko.

¹³ Lelo nasakamikwe cuze, pano naposiwe kuzana mwina witu Tito. Caleka napakisye antu kweneko nga mpita ku Makedoniya.

Ucimvyo kupitila muli Klistu.

¹⁴ Tutaizye Leza pano muli Klistu akatutungulula nsita zyonsi uku ucimvyo. Leza akatuomvya kuti kumanya kwakwe Klistu kusalangane konsi wa mununko usuma.

¹⁵ Pano swemo tukoline wa mununko usuma uwa ubani uno Klistu wapela kuli Leza. Mununko uu, waya usuma ku antu akutuulwa, na kuli yao akulowa.

¹⁶ Lelo ku antu akulowa, wene waya mununko wa mfwa nupya ukakoma. Lelo kuli yao akatuulwa mununko uu uwa cumi nupya ukayapeela umi. Uzye lyene aweni alinzile kuomba mulimo uwa musango uu?

¹⁷ Swemo tutakoline wa antu yauze aingi, yano yakaezya kuya akama kupitila mu kukosola ilandwe lyakwe Leza. Lelo pano twaya muli Klistu tuli wa nkombe zyakwe Leza, tukakosola mu cumi kulingana nu kulonda kwakwe.