1 Yoane 4 - Amazwi Yakwe Leza 2013

Vintu vya pa Mupasi wa Cumi nu mupasi uno utazumila Klistu

¹ Mwe yacuza akundwe, mutataila yonsi akati yakwata Mupasi Wamuzilo. Lelo muyezye nu kumanya ndi cakuti mupasi uno yakwata wafuma kuli Leza. Pano yakasema yaufi aingi yasalangana konsi muno nsi.

² Vii avino mungamanyilako Mupasi wakwe Leza, umuntu ali wensi wino wazumila ukuti Yesu Klistu wizile avyalwa wa muntu, wene wakwata Mupasi kufuma kuli Leza.

³ Muntu ali wensi wino asizumila Yesu Klistu ala wene atakwata Mupasi kufuma kuli Leza. Mupasi uno wakwata wene wafuma ku mwanisi wakwe Klistu. Muvwile ukuti wene uliza, nga nu kwiza wiza mpiti nupya uli muno nsi.

⁴ Lelo mwe ana yane, mwemwe yakwe Leza. Mwemo mwacimvya mpiti yakasema yaufi, pano Mupasi uwaya muno muli wene uwamaka kuluta Mupasi utazumila Klistu uli muli yao amu nsi.

⁵ Yakasema yaufi yene yakalanda pa vintu vyamu nsi nga na antu amu nsi yakayuvwa pano yene amu nsi.

⁶ Lelo swemo sweswe yakwe Leza. Wino wensi uwamanya Leza wene akauvwa kunotuli. Wino wensi asi wakwe Leza wene asyauvwa kunotuli. Vii avino tungalanda upusano uwaya pakasi ka Mupasi ukalanda icumi nga nu mupasi ukalanda intumpu.

Leza ali kutemwa

⁷ Mwe yacuza akundwe, lekini twatemwana pano ukutemwa kukafuma kuli Leza. Wino wensi akatemwa auze wene umwana wakwe Leza nupya wene wamanya Leza.

⁸ Muntu asyatemwa auze wene atamanya Leza, pano Leza ukutemwa.

⁹ Leza watulanzile kutemwa kwakwe pakutuma Mwana wakwe wenga sile muno nsi, pakuti aliwe atupeele umi.

¹⁰ Kuu kuli kutemwa kwakuti asi sweswe twatemwa Leza, lelo pano wene uwatutemilwe nga atuma Mwana wakwe kuti aye impolelwa ya pa maifyo itu.

¹¹ Mwe yacuza akundwe, ndi Leza watutemilwe vivyo, catuzipila kuti naswe twatemwana.

¹² Kusi umwi uwalola Leza. Lelo ndi twatemwana ale Leza wikala munotuli, nga nu kutemwa kwakwe kwaya ukufumaluke munotuli.

¹³ Twasininkizya ukuti tukaikala muli Leza nawe akaikala munotuli, pano wene watupeela Mupasi wakwe.

¹⁴ Naswe twati tulola, nupya tukupeela umboni vino watumile Mwana wakwe kuti aye ali Katuula wa antu amu nsi.

¹⁵ Muntu ali wensi ndi walanda paswe ukuti Yesu ali Mwana wakwe Leza, Leza akaikala munoli nga nawe muli Leza.

¹⁶ Naswe sweisikulu twamanya nu kutaila ndi vino Leza watutemwa. Leza ukutemwa, na wino akaikala mu kutemwa akaikala muli Leza na Leza akaikala munoli.

¹⁷ Ndu kutemwa kwakwe Leza kwaya ukufumaluke munotuli lyene tulaposya pa Wanda wa upinguzi, pano vinoli avino naswe tuli mu nsi.

¹⁸ Mu kutemwa mutaya intete, kutemwa kufumaluke kukazinga intete zyonsi. Muntu ali ni ntete ala akoopa upinguzi, nu kutemwa kutaya ukufumaluke munoli.

¹⁹ Swemo tukatemwa pano Leza uwatandike ukututemwa.

²⁰ Umwi ndi wati watemwa Leza, lelo wapata umwina wakwe, wene uwa ntumpu. Pano wene asyatemwa umwina wakwe wino akalola, uzye angatemwa Leza uli wino asilola?

²¹ Ilamulo lino Klistu watupeela likati wino wensi uwatemwa Leza wene alinzile kutemwa nu mwina wakwe kwene.