1 Yamwene 19 - Amazwi Yakwe Leza 2013

Eliya wapuukila ku Mwamba wa Sinai

¹ Alino umwene Aabu anena Yezebele vyonsi pyu vino Eliya wacisile, kumwi navino wakomile yakasema yakwe Baali yonsi pyu ku lupanga.

² Fwandi Yezebele muka Aabu nawe pali pakutuma inkombe kuli Eliya kuti zikamunene ziti, “Icumi nalapa yakatai yandepule! Mutondo pa nsita ndi ikwene, indi nu kucita kuli wewe umusango uli umwi kwene nga uno wacitile yakasema.”

³ Eliya pakuvwa vivyo, intete izimulema nga apuuka pamwi nu muomvi wakwe. Lino wafika ku Belisyeba, umusumba uwamu mpanga yakwe Yuda, asya umuomvi wakwe kweneko.

⁴ Lelo Eliya umwisikulu apita pa ulendo wa wanda onga mu lwanga. Asuka afika umu cimuti ca yunipa, nga aikala pansi mu cisao. Alino apepa kuti afwe, ati, “Owe! Yawe, ala cacilamo sile! Awe cumi ni mfwa yazipa! Uzye nene nacila pa vikolwe vyane?”

⁵ Fwandi ali vino walambalile mwisika lya cimuti. Papo kwene ali pano umungeli wakwe Yawe wamukumya nga amunena ati, “Katuka ulye icakulya.”

⁶ Lino wakatuka nu kucelecensya amanso, ali pakulola umukate umu pipi lwaku mitwe na manzi akumwa mu lufinga lwa manzi. Alino alya, amwelapo na manzi, nga aswilila ku kulala.

⁷ Umungeli wakwe Yawe ali pakumunena nupya ati, “We katuka ulye nupya, pano limwi ungawa ulwezwe uposiwe nu kupita.”

⁸ Eliya nawe akatuka alya nga amwa na manzi. Ivyakulya ivimupeela amaka akupita apa manda amakumi yani, asuka afika nu ku Mwamba wa Holebu, umwamba wakwe Leza.

⁹ Lino wafika ku Mwamba wa Sinai, Eliya alala kuku kwene mwi cele. Alino Yawe alanda kunoli ati, “Uzye icani cino ukulonda kuno, we Eliya?”

Yawe waloleka kuli Eliya

¹⁰ Eliya nawe ali pakwasuka ati, “We Yawe, Leza Wamaka yonsi, nemo nkamutumikila amanda yonsi nupya awewe sile mpo wino nkatumikila. Aina Izlaeli yonona upangano uno mwapangine nayo. Yene yatamola utuvuwa twako nu kukomola yakasema yako yonsi. Anene mutupu nemuno nasyala penepo. Alino nani kwene yakundunga akanyama kisi, yakulonda uku nkoma.”

¹¹ Yawe nawe amwaasuka ati, “Ndanga wimilile papela ya mwamba, pa manso yane.” Lyene Yawe aiza apita penepo, alino cipunga cikulu sana cikatuka nga icilepula umwamba pakasi icivungola na mawe, lelo Yawe atali mwenemo mu cipunga cico. Lino cipunga cata, kwiza icilundumusi. Lelo Yawe atali mwenemo mu cilundumusi cico.

¹² Lino icilundumusi capita, ipiza penepo umoto, nga lelo Yawe atali mwenemo mu moto uwo. Lino umoto wata, ipalondelela penepo izwi lyaku totoza.

¹³ Pakuvwa vivyo, Eliya avimba icikuwalo cakwe pa manso, afuma aimilila na pa mulyango wi cele. Izwi ali pakumunena liti, “Uzye icani cino ukulonda kuno we Eliya?”

¹⁴ Eliya nawe aasuka ati, “We Yawe, Leza Wamaka yonsi, nemo nkakutumikila amanda yonsi nupya awewe wenga mpo wino nkatumikila. Nga lelo aina Izlaeli yonona upangano wakwe wewe nayo. Yaongolola nu tuvuwa twako, yalunda penepo nu kukoma yakasema yako yonsi sile. Anene sile nasyala nenga. Nani kwene yakulonda kuti yankome.”

¹⁵ Yawe nawe amunena ati, “Swilila, utoole inzila iyaya ku Lwanga lwaku Damasiko. Lino umaya ukafike kweneko, ukapake Hazaeli amafuta nu kumulasika pa wene waku Asilya.

¹⁶ Alino Yeu umwana wakwe Nimisyi, nawe ukamupake amafuta nu kumulasika pa wene waku Izlaeli. Nga Elisya, umwana wakwe Syafati uwaku Abeli Meolaa, ukamupake amafuta kuti akupyane pali ukasema.

¹⁷ Wensi uwafyufyuntuka ukukana komwa na Hazaeli, Yeu alamukoma. Alino wensi uwafyufyuntuka ukukana komwa na Yeu, Elisya alamukoma.

¹⁸ Lelo nemo indi nu kusya penepo antu ukulingana na mazimbi cinimbali, yao atatala yantalamila nupya yatatala yafukamila Baali nanti ukutonsola kaluwi kakwe.”

Lwamo lwakwe Elisya

¹⁹ Eliya ali pakufuma penepo nu kuya zana Elisya, umwana umonsi wakwe Syafati, ala akulima na pulao. Apa nkolelo yakwe Elisya pali penepo yamasaye anyefilwe mu makoli ikumi na yaili, yayo alimanga na pulao. Wene ale akulima sile ni koli lyakwe yamasaye ilyalenga ikumi na yaili, ilyasyalikile. Eliya ali pakuzula icikuwalo cakwe azwika Elisya.

²⁰ Elisya nawe ali pakusya yamasaye yakwe alondela Eliya. Asimula amupunda amunena ati, “Leka tale inje nkapakasye tata na mayo, alino nize nkulondele.” Eliya nawe amunena ati, “Ee, pitanga cili sile ningo, ntange nkulesye!”

²¹ Elisya ali pakuswilila kuli yamasaye yakwe, ayafyula nga aeleka ni nyama. Amayoko kwene ayano acita inkwi. Alino atoola inyama zizyo aankanya na antu, iyalya. Alino alondela Eliya, pakuti amwazwilizya kweneko mu milimo yakwe.