1 Yamwene 1 - Amazwi Yakwe Leza 2013

Umwene Davidi mu ukote wakwe

¹ Umwene Davidi pa nsita ilya wali umukote cuze. Nanti angala aomvi yakwe yamuvimbanga yaulangeti, nalyo kwene atuvwanga icikaililwa.

² Acino intunguluzi zyakwe izimunena iziti, “Musambazi leka tukulondele umukazyana uwakuti mwaikala nawe nupya akusakamala. Wene amalambalalanga pipi pipi nawe kuti akulenge ukuvwa icikaililwa.”

³ Kwali ukulondalonda umukazyana mu mpanga yonsi iya ina Izlaeli, nga mu Syunemu iyazanamo umukazyana wino yamanga izina yati a Abisyagi. Lyene iyamuleta ku mwene.

⁴ Wene wali umuyembe wakwe cimwi, nga wimulanga umwene nu kumusunga. Lelo umwene atatazile amanyane nawe.

Adoniya wakumbukila kuya pa cilimba ca wene

⁵ Lyene Adoniya, wino nyina wali a Hagiti, aiza inkolelo nga avwanga ati, “Nene ndaya umwene.” Acino ateyanya amaceleta ni mfwalasi kumwi na antu amakumi yasano akusimula inkolelo yakwe, iyamukolelela.

⁶ Isi Davidi, atatazile amunenole ati, “Uzye pacani imicitile yako ili wakwe vii?” Adoniya nawe kwene wali umuyembe wakwe cimwi nupya uwali uwikolo pacisila cakwe Abusalomu.

⁷ Adoniya alanzyanya na Yoabu umwana wakwe Zeluya nga na Abyata simapepo, nga nayo iyalemana nawe pa kumutungilila.

⁸ Lelo simapepo Zadoki, na Benaya umwana wakwe Yeoyada, na kasema Natani na Syimei na Lei nga na yakalinda yakwe Davidi, yene yatalemine na Adoniya.

⁹ Uwanda umwi Adoniya atoola imfwele, ni ng'ombe nga nu twana twa ng'ombe utwine apeela impolelwa piwe lyakwe Zoeleti pipi nu ku Eni Logeli. Aama aina yakwe yonsi, ana ya mwene aonsi, nga ni vilolo vyonsi vyamu Yuda.

¹⁰ Lelo atamile Natani kasema nanti Benaya nanti yakalinda ya mwene nanti Solomoni umwina.

¹¹ Lyene Natani aya kuli Batisyeba, nyina wakwe Solomoni, nga amuuzya ati, “Uzye utuvwile ukuti Adoniya umwana wakwe Hagiti watailasika pa cilimba ca wene? Nga lelo umwene Davidi atamanyile cico!

¹² Ndu kasi leka lyene nkupanzye amano ivyakupususya umi wako nu umi wakwe Solomoni umwana wako.

¹³ Yanga ku mwene Davidi likwene nga umuzye uti, ‘Musambazi, uzye utandavile ukuti Solomoni umwana wako aalaya umwene pacisila cako? Nga ciza uli ukuti Adoniya aye umwene?’ ”

¹⁴ Nga Natani alundapo kulanda ati, “Lino ucili ukulanda nu mwene Davidi, nani namaiza ningile nu kusininkizya ukuti amazwi yako acumi.”

¹⁵ Acino Batisyeba aya ku kulola umwene mu muputule wakwe uwa kulalamo. Umwene wali umukote wakwe cimwi, nga Abisyagi, umukazyana umwina Syunemu, ala akumusunga.

¹⁶ Batisyeba afukama pansi akontama apisika sana apa manso ya mwene nga umwene amuuzya ati, “Zyani zyakuleta?”

¹⁷ Nawe aasuka ati, “Musambazi, wemo wandavile nu mulapo umwi zina lyakwe Yawe Leza wako ukuti Solomoni alaya umwene pacisila cako, nupya alikala pa cilimba cako ica wene.

¹⁸ Lelo ndakai Adoniya wataya umwene nga nawe utamanyile cimwi pali cico.

¹⁹ Wene watatola impendwa ikulu iya ng'ombe nu twana twa ng'ombe utwine ni mfwele. Wataama ana ya mwene aonsi, na simapepo Abyata na Yoabu, musika mukalamba uwa vita. Lelo atamile Solomoni umwana wako.

²⁰ Musambazi, aina Izlaeli yonsi yakulolekesya kunuli kuti uyanene umuntu wino alaya umwene pacisila cako.

²¹ Ndu tacisile vivyo, ale lyene zuwazuwa lino ulafwa Solomoni umwana wane umonsi pamwi nani kwene yalatukoma kwati sweswe yacisanguka.”

²² Lino Batisyeba acili akulandana nu mwene, Natani afika kwi sano.

²³ Antu nayo iyanena umwene yati, “Kasema Natani wataiza.” Acino Natani aingila mu muputule ulya nga akontama pa manso ya mwene.

²⁴ Alino Natani avwanga ati, “Musambazi, uzye watunena antu ukuti Adoniya alaya umwene pacisila cako?

²⁵ Ilelo kwene wene wataya atoola ing'ombe ni mfwele nu twana twa ng'ombe utwingi utwine, nga apeela impolelwa. Wataama ana yako aonsi yonsi, na Yoabu, musika mukalamba uwa vita vyako, na simapepo Abyata. Nga vikwene yakulya nu kumwa pamwi na aliwe, nu kupunda yati, ‘Si kalukuwala we mwene Adoniya!’

²⁶ Lelo wene atamile nene ne muomvi winu, nanti ukwama simapepo Zadoki nanti Benaya umwana wakwe Yeoyada nanti Solomoni.

²⁷ Uzye lyene tumati we musambazi waliwazumilizya cii nu kunena intunguluzi zyako izina lya muntu alaya umwene pacisila cako?”

²⁸ Lyene umwene Davidi nawe avwanga ati, “Ngamilini Batisyeba, aize kuno.” Batisyeba aingila, aiza aimilila pa manso ya mwene.

²⁹ Lyene umwene amunena ati, “Nakulaya umwi zina lyakwe Yawe uwa umi, wino wantuula ku ntazi zyane zyonsi,

³⁰ ukuti ilelo namafikilizya ulayo wane uno nacisile kunuli umwi zina lyakwe Yawe, Leza wa ina Izlaeli, ukuti Solomoni umwana wako umonsi alaya umwene pacisila cane.”

³¹ Nga Batisyeba akontama nga avwanga ati, “Si angala kalukuwala ku mwene wane Davidi pe na pe!”

³² Lyene umwene Davidi atuma akuya aama Zadoki, na Natani, nga na Benaya umwana wakwe Yeoyada. Lino yiiza yingila,

³³ ayanena ati, “Sendini intunguluzi zyane izya mwi tengo. Muleke Solomoni umwana wane akwele nu kupita pa nyumbu yane kololo, nga mumusukilile mutentemukile ku kafukoka ka Giooni.

³⁴ Kuku kwene akuno Zadoki simapepo na kasema Natani yalinzile kumupongolwela amafuta kuti aye umwene wa Izlaeli. Alino lyene mulizye intandala nu kupunda muti, ‘Si kawala we mwene Solomoni!’

³⁵ Lyene mulinzile mumulondele lino amaweluluka nu kwiza ikala pa cilimba cane ica wene. Aliwe amampyana pa wene, pamulandu wakuti awino nasolola kuti ateeka mu Izlaeli nu mu Yuda.”

³⁶ Benaya umwana wakwe Yeoyada nawe avwanga ati, “Cimacitwa vivyo kwene. Si angala Yawe, Leza wako nawe azumilizye cintu cii!

³⁷ Vino Yawe waya nawe lyonsi we musambazi, avino ciye na kuli Solomoni umwana wako nupya amupeele ulongo nu kuteeka kwakwe aleke kuye ukukulu ukuluta kuteeka kwako, we mwene wane Davidi.”

³⁸ Acino simapepo Zadoki, na kasema Natani, na Benaya umwana wakwe Yeoyada, na yakalinda akwi sano aina Keleti na ina Peleti, iyakwezya Solomoni pa nyumbu ya mwene Davidi nga iyamusukilila ku kafukoka ka Giooni.

³⁹ Kuku kwene akuno simapepo Zadoki atoola umusazi wa mafuta ya miolivi uno wafumizye kwi Taalu lwakwe Yawe nga apongolwela Solomoni amafuta. Alino iyalizya intandala, nga antu yonsi iyapunda yati, “Si kawala we mwene Solomoni!”

⁴⁰ Lyene antu yonsi kwene iyamulondela iyaswilila, yala yakupunda ni nsansa nga nu kulizya imitolilo, ala yakukavya cakuti nu musili iutenta.

⁴¹ Lino Adoniya pamwi na yonsi yano wimwile yakumalila ukulya nu kumwa iyuvwa icongo. Nga lino Yoabu uvwa ukulila kwa ntandala, auzya ati, “Uzye icongo cico consi mu musumba calola mwi?”

⁴² Lino atacili amalile ukulanda, Yonatani umwana wakwe simapepo Abyata afika. Adoniya nawe avwanga ati, “Iza nduwingile muno. Wewe muntu umusuma. Ulinzile utuletele ilandwe lisuma.”

⁴³ Yonatani nawe aasuka ati, “Kuntu kuu kusi visuma, awe! Umusambazi witu umwene Davidi watalasika Solomoni pa cilimba ca wene.

⁴⁴ Waliwatuma Zadoki, na Natani, na Benaya umwana wakwe Yeoyada nga na yakalinda akwi sano aina Keleti na ina Peleti kuti yamusukilile nga nayo iyakwezya Solomoni pa nyumbu ya mwene nu kuleka kuti apita.

⁴⁵ Nga Zadoki na Natani yaliyamupongolwela amafuta pa kafukoka ka Giooni kuti aye umwene. Lyene iyaya nu mu musumba yala yakupunda ni nsansa, nga ndakai antu yakukavya cuze. Icili congo cino mwatimuvwa.

⁴⁶ Ndakai Solomoni ali mwene.

⁴⁷ Ukuluta pali cico, intunguluzi zyamwi tengo zyali zingila ku kupeela umucinzi ku musambazi umwene Davidi nga izivwanga iziti, ‘Si angala Leza wako aleke Solomoni alumbuke ukuluta wewe, nupya amupeele ulongo mu kuteeka kwakwe ukuluta vino wapile wewe.’ Lyene umwene Davidi afukama pa musanzi wakwe nu mucinzi

⁴⁸ nga apepa ati, ‘Alumbanyiwe Yawe, Leza wa ina Izlaeli, wino ilelo kwene wataika wenga uwamu mupanda wane pa cilimba ca wene. Nupya wene watandenga ukuya nu umi nu kulola icintu cii!’ ”

⁴⁹ Lyene antu yano Adoniya wamile iyuvwa intete, nga iyakatuka iyamusya, cila muntu apita kuno akasi.

⁵⁰ Adoniya apakoopa Solomoni, nawe aya kwi Taalu lyakwe Yawe nga alemelela ku matungi ya kavuwa.

⁵¹ Lyene umwene Solomoni auvwa ukuti Adoniya akumoopa nu kuti wataya alemelela ku matungi ya kavuwa, nu kuvwanga ati, “Icankolelo, inkasi kuti umwene Solomoni alape kunondi ukuti atamapeela ilamulo ilyakuti yankome.”

⁵² Solomoni nawe aasuka ati, “Ndi cakuti wene uwacuvwilo, ntalamucitila iciipe icili consi. Lelo ndi asi ni cuvwilo, ale wene alafwa.”

⁵³ Lyene umwene Solomoni atuma akuya aama Adoniya nga iyamuleta ku kavuwa. Alino Adoniya aya apaali umwene afukama pansi, nga umwene amunena ati, “Pitanga ukwako.”