1 Tesalonika 2 - Amazwi Yakwe Leza 2013

¹ Mwe ina itu, mweisikulu mumanyile ukuti tutaisumbile nsita lino twamutandalile.

² Mumanyile vino antu yatucuzizye nu kututuka mu musumba wa Filipi lino tutali twize kuno muli ku Tesalonika. Lelo Leza watukomelizye cuze kuti tukosole Ilandwe Lisuma kunomuli lya pali aliwe, nanti angala antu yatulwisizye cuze.

³ Kupapata kwitu kunomuli kusi pa kuluvyanya kumwi nanti melenganyo ya ukakasi, nanti kwezya kusomba umuntu ali wensi.

⁴ Mu cifulo cakwe cii, swemo lyonsi tukalanda wakwe vino Leza akalonda kuti tucite, pano wene walola ukuti twati tulinga kupelwa mulimo wa kukosola Ilandwe Lisuma. Tusyaezya kuzanzya antu, lelo tukaezya kuzanzya Leza, wino akaezya melenganyo itu.

⁵ Mumanyile ningo ukuti tutizile mukwezya kutumpika umuntu umwi. Leza umwisikulu amanyile ukuti vino twacisile vitali ivyakufikilizya lwiswa munotuli.

⁶ Swemo tutezizye kulonda lulumbi kufuma kunomuli nanti antu yauze,

⁷ nanti cingaya ukuti twange tulenge uwazwilizyo kufuma kunomuli pamulandu wakuti sweswe atumwa yakwe Klistu. Lelo twali afuke pakasi kinu ndi vino nyina wa ana akasunga ana yakwe ningo.

⁸ Pamulandu wa kumutemwa kuno twamutemwa, swemo twaiteinye kumusakamala, cakuti twalondesyanga kupeela maumi itu kunomuli lilyo lino twakosozile Ilandwe Lisuma kunomuli. Mwemo mwali akundwe cuze kunotuli.

⁹ Mwe ina itu akundwe, cumi kwene mukwiusya ntazi zitu lino twaombanga munomuli. Mukwiusya vino twaomvile musanya nu usiku kulonda vyakutwazwa kuti tutaya wa cisendo kunomuli, lino tukukosola Ilandwe Lisuma kunomuli lyakufuma kuli Leza.

¹⁰ Mwemo pali pamwi na Leza mwemwe yakambone itu ukuti micitile itu kunomuli yali yamuzilo, yololoke, nupya yaula mulandu.

¹¹ Mumanyile ukuti twamusunganga ndi vino isi wa muntu akacita ku ana yakwe.

¹² Swemo twamukomelizye, twamutekizye myenzo nu kutwalilila kumupapata kwikala umi uno ukazanzya Leza, wino uwa mwama kuti mukumeko ku Wene nga nu lulumbi lwakwe.

¹³ Nupya kuli mulandu nauze uno swemo tukataizya Leza lyonsi. Lino twamuletile mazwi yakwe Leza, mwemo mwayuvwile nu kuyapokelela, asi wa mazwi ya muntu lelo wa mazwi yakwe Leza, nu mucumi akwakwe. Ndakai Leza akuomba muno muli mwe muno mwataila.

¹⁴ Mwe ina itu, ivintu ivyamucitikile, ivili vimwi ni vyacitikile amu mauvi yakwe Leza mu Yudeya, azumila Klistu Yesu. Mwemo mwacuzile pamulandu wa kuzunyiwa na akazi kinu ndi vino Ayuda yayazunyizye.

¹⁵ Ayuda ayano yakomile Umwene Yesu na yakasema, nga nu kutuzunya. Leza asyazangila muli vino yakacita, nga antu kwene yaa yapusana na auze onsi!

¹⁶ Nupya yakwene yezizye kutulesya kukosola ilandwe ku Akulukuwa, lino lyange liyatungulule ku ufyusi. Ayuda yapitilila mu kwifya. Acino ndakai Leza wasoka nu kuyavunuka.

Paulo walondesya kutandalila mauvi nupya

¹⁷ Mwe ina itu, nanti angala twapalukine ku mwili, swemo tutatile kumwiusya. Twalondesyanga kumulola nga twezizye kuti tumutandalile nu kwiza mulola nupya.

¹⁸ Twalondanga kuwela kunomuli. Nemo nemwisikulu nezizye kuswililamo maila aingi, lelo Ciwa walenzile kuti citacitika.

¹⁹ Pano amwemwe kusi nayauze, mwe muno tukapaalilamo nu luzango, nu kwiza pokelela penepo cilambu cino tulailumbanyizizya penepo pali Yesu Mwene witu lino aliza nupya.

²⁰ Cumi kwene, mwemwe muli lulumbi nu luzango lwitu.