1 Samueli 4 - Amazwi Yakwe Leza 2013

Mbokosi ya Upangano yapokololwa

¹ Pa nsita ilya aina Filisti iyakongana ku kulwa inkondo na ina Izlaeli, acino aina Izlaeli iyafuma ku kulwa na ina Filisti. Aina Izlaeli iyaya yakuula insakwe pa Ebenezeli, na ina Filisti nayo pa Afeki.

² Aina Filisti iyakatuka nu kulungatana na ina Izlaeli. Nga lino ulwi wakoma sana, aina Filisti iyacimvya aina Izlaeli. Iyakoma antu ukulingana manye amazimbi yani pa ncende ya ulwi.

³ Lino ivita vyaweluluka ku nkambi, intunguluzi zya ina Izlaeli iziinong'onya iziti, “Uzye pacani cino Yawe waleka ukuti aina Filisti yatucimvye? Katuye tukasende Mbokosi ya Upangano ku Syilo pakuti twapita nayo nga yatutuulanya ku maka ya anisi itu.”

⁴ Acino antu iyatuma aonsi yamwi ku Syilo, nga nayo iyawezya Mbokosi ya Upangano wakwe Yawe Wamaka yonsi, wino icilimba cakwe ica wene caya pakasi kakwe yakelubi. Ana yakwe Eli yaili. Hofini na Pineasi, yali kuku pamwi ni Mbokosi ya Upangano ilya.

⁵ Lino yafisya Mbokosi ya Upangano mu nkambi, aina Izlaeli yonsi iyasanzula amazwi yao iyapunda cakuti nu musili iutenta.

⁶ Lino aina Filisti yuvwa icongo, iyuzya iyati, “Uzye icongo cii mu nkambi ya Ayebulai calola mwi?” Lino yamanya ukuti Mbokosi ya Upangano yakwe Yawe yatiletwa mu nkambi,

⁷ iyuvwa intete. Alino yavwanga iyati, “A leza wataiza umu nkambi! Awe lyene twafwa! Icintu ca mwata ndi uu citatala cacitika.

⁸ Kalanda kunotuli! Uzye aweni amatutuula ku maka yakwe leza wi uwa maka? Wikwene ali leza wino wakomile aina Eguputo ku vilumbelo ivipusanepusane umu lwanga.

⁹ Si mungala musipe, muposye iconsi. Pano ndi cisi vivyo Ayebulai yaa yamamutekanga uzya wakwe vino mwemo mwayateesile. Fwandi posyini iconsi, nu kulwa!”

¹⁰ Acino aina Filisti iyalwa, iyasuka iyacimvya aina Izlaeli, yao autukile kumwao. Kwali ukucimviwa kukulu wakwe cimwi, nga asilika ya pa ngazo, aina Izlaeli akomilwe yali amazimbi amakumi yatatu.

¹¹ Pali pakupoka Mbokosi ya Upangano yakwe Leza, nga iyakoma Hofini na Pineasi, ana aonsi yaili yakwe Eli.

Imfwa yakwe Eli

¹² Uwanda kwene ulya umuntu umwi uwamu mutundu wakwe Benjamini atandika ulwilo ukufuma ukwayelile ulwi nga aya afika ku Syilo. Umuntu wilya pakulanga ulanda uno yali nao, alepola ivyakuzwala vino wazwite nu kuisansa ulukungu ku mutwe.

¹³ Lino wafika sile kuku, Eli ala wataikala pa cilimba cakwe umu mbali ya museo, akucevya pamulandu wakusakamikwa pa Mbokosi ya Upangano yakwe Leza. Lino umuntu wilya wasuka wingila mu musumba nu kulondolola vyonsi ivyativicitika, aikazi amu musumba ulya yonsi iyapomola impoma iyazakaza ku ntete.

¹⁴ Eli nawe lino uvwa impoma, auzya ati, “Uzye impoma iyo yalola mwi?” Umuntu wilya pali pakusimwila kuli Eli nu kumulandila.

¹⁵ Lilyo ale Eli ali ni myaka yakuvyalwa ukulingana na makumi fundimbali na cinani na manso yakwe yapafwile cakuti yalolanga akanda.

¹⁶ Alino umuntu wilya atandika ukunena Eli ati, “Ilelo kwene natinutuka nzila yonsi ukufuma ku ulwi nupya vikwene ili mifikile kuno.” Eli nawe amuuzya ati, “Kuli ci fwandi, we mwanane?”

¹⁷ Nawe kaleta wa mazwi aasuka ati, “Aina Izlaeli yatiyutuka aina Filisti, nga ni vita vitu vyativikomwa wakwe cimwi. Na ana yako kwene yoili, Hofini na Pineasi, yatiyafwa. Ni Mbokosi kwene ya Upangano yakwe Leza yatiyapoka.”

¹⁸ Lino umuntu wilya walumbula sile ica Mbokosi ya Upangano yakwe Leza, Eli apenuka pa cilimba, apona asalile lwa pa mpongolo. Vivyo kwene ni nsingo ikomfama, nga afwa nu kufwa, pano walanga watakota wakwe cimwi nupya wali umwine sana. Wene watungulwile aina Izlaeli pa myaka amakumi yani.

Imfwa yakwe mukamfwilwa uwali umuci wakwe Pineasi

¹⁹ Nyinavyala, uwali umuci wakwe Pineasi, ale wasenda indilwa nga walanga ali pipi nu kulela. Lino uvwile ukuti yatiyapoka Mbokosi ya Upangano yakwe Leza nu kuti sivyala pamwi na iya kwene yatiyafwa, lilyo kwene alwala iviine yamangu nga avyala umwana.

²⁰ Lino alambalile pansi akufwa, nakambuza uwamwazwilizyanga amunena ati, “Utaitazyela we kaci we, watuvyala umwana umonsi.” Lelo wene atavwanzile cimwi nanti ukusumba kweneko amano.

²¹ Atemela umwana wilya umonsi izina ati a Ikabodi, ale akuti, “Ululumbi lwatilufuma pakasi ka ina Izlaeli” ala akusontelela ku Mbokosi ya Upangano yakwe Leza ino yapokwa nga nu ku mfwa yakwe sivyala na yakwe iya.

²² Avwanga ati, “Ululumbi lwatilufuma pakasi ka ina Izlaeli, pamulandu wakuti Mbokosi ya Upangano yakwe Leza yatipokwa.”