1 Petulo 2 - Amazwi Yakwe Leza 2013

Klistu ali iwe lya umi

¹ Lyene fumini viipe vyonsi munomuli. Mutatumpoka, mutacita usomvi, kuya nu uzuwa, nanti kutukana.

² Mukolane nu tunya twacivyalwa tuno twaya nu lusala lwi ziya. Ndi mwakwata lusala lwi ziya lya mpomvu, lyene myenzo inu ilalisiwa nga mulakula suka mukatuulwe.

³ Pano malembelo yati, “Mweisikulu mwati muilolela vino Mwene waya nu luse.”

⁴ Izini kuli Yesu. Wene ali iwe lya umi lino antu yakana ukuti ilya mpomvu. Lelo Leza walisolwile wi we lyamutengo cuze.

⁵ Wa mawe ya umi, lekini Leza amuomvye mu kukuula ng'anda ikulu yakwe. Mukwene amuno mulatumikila wakwe yasimapepo amuzilo mukupeela impolelwa zyamuzilo izingazumiliziwa kuli Leza muli Yesu Klistu.

⁶ Pano calembwa mu malembelo cati, “Nasolwile iwe lyamutengo cuze, lino nkwika mu Zioni liye iwe lya pitungi, na wino wensi uwataila munoli atalacitwa insonyi.”

⁷ Iwe lii ilyamutengo cuze kuli mwe muno mwataila. Lelo kuli yao atataila, kunoyali cili ndi vino malembelo yauze yakati, “Iwe lino yakakuula yakanyile, lyene lyacisilwe iwe lya pitungi lya nganda.”

⁸ Nupya cili ndi vino malembelo yauze yakati, “Lii, lili iwe ililalenga kuti antu yapumike nu kupona.” Yene yaipumileko pano yatataile mu mazwi ya Mwene. Cii cali ukulonda kwakwe Leza kunoyali.

Luko lwamuzilo

⁹ Lelo mwemwe mutundu usololwe, yasimapepo aku wene. Mwemwe luko lwamuzilo, nupya antu yakwe Leza yano asololwa kuti yalande vicitwa vyakwe Leza vyakuzunguka. Leza uwamwama kuti mufume mu mfinzi nga mwize mu luswepo lwakwe ulwakuzunguka.

¹⁰ Pa nsita imwi mutali antu yakwe Leza, ndakai mwemwe antu yakwe. Pa nsita imwi mutamanyile uluse lwakwe Leza, lelo ndakai mwati mupokelela uluse lwakwe.

Mwaikala wa yaomvi yakwe Leza

¹¹ Mwe yacuza yane, mwemwe enyi nupya mbutusi muno nsi. Acino nkumupapata kuti mutalondela nsuna zya mili, zino lyonsi zikalwisyanya nu mupasi winu.

¹² Lekini micitile inu pakasi ka antu atataila Leza iye isuma cuze, cakuti nanti angala yangamupeela milandu yakwifya, lyene pa Wanda wa upinguzi yene yalalumbanya Leza pa kulanda vintu vino yaweni mukucita.

¹³ Pamulandu wa Mwene mulinzile kuyela antu yonsi yano ali pa utunguluzi, maka maka Kateeka mukalamba.

¹⁴ Mulinzile kuyela na alasi kwene yano kateeka mukalamba wasonta pa utunguluzi, kuti yavunuka yakaifya nu kulumbanya yao akacita visuma.

¹⁵ Pano Leza akulonda kuti vicitwa vinu visuma vileke kulanda kwa ututu kwa antu awelewele kusile.

¹⁶ Mwaikala wa antu antungwa, nupya mutaomvya untungwa winu pa kuipeela insambu kuti mwaifya. Lelo mwaikala wa yaomvi yakwe Leza.

¹⁷ Mwacindika antu onsi. Temwini aina Klistu ataila wakwe mwemwe. Oopini Leza nu kucindika Kateeka mukalamba.

Klistu watupeela cilangililo mu kucula kwakwe

¹⁸ Mwe aomvi mulinzile kutontela asambazi inu nu kuyalanga mucinzi umalilike. Mulinzile kucita cii ku asambazi inu onsi, yao aya nu luse nupya afuke kunomuli, nga na atale kwene.

¹⁹ Leza alamuvwangila visuma ndi mwacita cii, cikulu muposye kucula konsi kwa lufyengo pano mumanyile kulonda kwakwe.

²⁰ Uzye cilambu cii cino mungalonka ndi mwaposya kuumwa pamulandu wa kwifya? Lelo ndi mwaposya ucuzi na lino mwati mucita visuma, Leza alamupolelela pa kucita cico.

²¹ Leza uwamusolwile kuti mupite mu macuzi lino mukulondela mu ntampulo zyakwe Klistu. Wene wamupeela cilangililo ca kucula kwakwe pamulandu winu.

²² Klistu atatazile aifye nupya kusi umwi uwatazile auvwa akutumpoka.

²³ Na lino yamutusile, wene atavwanzile vya cilanduzi. Lelo wene wapaalilanga muli Leza, kapingula uwaula lufyengo.

²⁴ Klistu umwisikulu wasenzile cisendo ca maifyo itu mu mwili wakwe. Wene watanyilwe pa lupanda pakuti swemo tute ukwifya tutandike kucita vyawololoke. Vitotwa ni vyumo vyakwe ivikatupozya.

²⁵ Mwemo mwakoline wa mfwele ziponge. Lelo ndakai Leza wamuwezya kuli Kacema nupya Kacingilila winu.