1 Milandu 7 - Amazwi Yakwe Leza 2013

Amu mupanda wakwe Isakali

¹ Ana yakwe Isakali a Tola, Puwa, Yasyubu na Syimuloni. Yonsi pamwi yali yani.

² Ana aonsi yakwe Tola a Uzi, Lefaya, Yeliyeli, Yamai, Ibisamu na Samueli yano yali intunguluzi zya ndupwa zyao. Mu manda ya kuteeka kwakwe Davidi, yapenzile antu angalingana apa musinku wakulwa inkondo ukulingana 22,600.

³ Umwana umonsi wakwe Uzi a Izilaya. Ana yakwe Izilaya a Mikaeli, Obadiya, Yowelo na Isiya. Yonsi kwene yasano yali intunguluzi zya ndupwa zyao.

⁴ Yene yatwite aci avule, icakuti yavile ana 36,000, angalwa inkondo.

⁵ Impendwa ya vita ivyafumile mu akazi kao yonsi izyamu nko zyakwe Isakali, ndi vino yatantikwa mu kuvyalwa kwao yonsi pamwi yali 87,000.

Amu mupanda wakwe Benjamini na wakwe Dani

⁶ Ana aonsi yakwe Benjamini a Bela, Bekeli na Yediaeli.

⁷ Ana aonsi yakwe Bela a Eziboni, Uzi, Uzieli, Yelimoti na Ili, yano yali intunguluzi zya ndupwa. Yonsi pamwi yali yasano. Mu vyalembwa mwatantikwa antu ivita 22,034, ivingalwa inkondo.

⁸ Ana aonsi yakwe Bekeli a Zemila, Yoasyi, Elieza, Elioenai, Omuli na Yelemoti, Abiya, Anatoti na Alemeti. Yaa yonsi yali ana aonsi yakwe Bekeli.

⁹ Mu vyalembwa mwatantikwa intunguluzi zya ndupwa zyao nga ni vita 20,200 vivyo ivingalwa inkondo.

¹⁰ Umwana umonsi wakwe Yediaeli a Bilani. Ana aonsi yakwe Biliani a Yeusyi, Benjamini, Eudi, Kenaana, Zetani, Tasyisyi na Aisyaala

¹¹ Yene yali intunguluzi zya mitundu umu luko nupya yali ivita vilumbuke. Amu mupanda wao yali aonsi 17,200 yayo angalwa inkondo.

¹² Aina Syupimu na ina Hupimu nayo kwene yali amu mupanda wakwe Ili. Nga Aina Husyimu yali amu mupanda wakwe Aeli.

¹³ Ana aonsi yakwe Nafutali a Yazeeli, Guni, Yezeli na Syalumu. Yali amu mupanda wakwe Bilaa.

¹⁴ Amu mupanda wakwe Manase aeya: Asilieli uwavilwe mu muci muze uwaku Alamu. Muci kwene wiyo u waviile Makili isi wakwe Gileadi.

¹⁵ Makili walondile Hupimu na Syupimu aci. Kaci wakwe wali a Maaka. Muze uwamu mupanda ulya wali a Zelofeadi. Nga Zelofeadi wakweti sile ana anaci.

¹⁶ Lyene Maka, umuci wakwe Makili waviile umwana umonsi nga amutemela izina ati a Pelesyi. Umwina wakwe Pelesyi yamutemile izina yati a Syelesyi, nga ana yakwe aonsi yali a Ulamu na Lekemu.

¹⁷ Umwana umonsi wakwe Ulamu wali a Bedani. Yakwene yali ana aonsi yakwe Gileadi, umwana umonsi wakwe Manase.

¹⁸ Hamoleketi, kaci wakwe waviile Isyodi, Abiezeli na Maala.

¹⁹ Ana aonsi yakwe Syemida aeya: Aiyani, Syekemu, Likii na Aniyamu.

²⁰ Amu mupanda wakwe Efulemu a Syutela, na Beledi na Taati umwana wakwe umonsi, Eleada na Taati umwana wakwe umonsi,

²¹ Zabadi umwana umonsi wakwe Taati, na Syutela umwana umonsi wakwe Zabadi. Ezeli na Eleadi yakomilwe na akaya aku Gati, lino yaileko ku kupoka iviteekwa vyao

²² Efulemu isi wao ayalosya amanda avule, nga na akazi kakwe yizile ku kumutekezya.

²³ Nupya kwene Efulemu amanya umuci. Umuci asenda indilwa nga asuka avyala umwana umonsi. Efulemu atemela umwana wiyo izina ati a Beliya, pamulandu wakuti api yanza lyakwe paponyile imipamba.

²⁴ Umwanakwe umwanaci wali a Syeela, uwakuuzile umusumba wa Beti Holoni nu wa Uzeni Syeela.

²⁵ Umwana umonsi namuze wakwe Efulemu wali a Lefa, nga na amu mupanda wakwe aeya: Lesyefu, Tela, Taani,

²⁶ Ladani, Amiudi, Elisyama,

²⁷ Nuni na Yoswa.

²⁸ Impanga zyao kuno yene yikalanga zyali a Betele pamwi ni mizi yakweo iyazingulwike. Lwaku ufumondaka kwali Naalani, na lwaku uwondaka kwali Gezeli ni mizi yakweo iyazingulwike, na Syekemu pamwi ni mizi iyazingulwike, mpaka sile ukufika nu ku Aya pamwi ni mizi yakweo.

²⁹ Amu mupanda wakwe Manase yateekanga imisumba ii: Beti Syani, Taanaki, Megido na Doli, kumwi ni mizi yakweyo. Amu mupanda wakwe Yosefu umwana umonsi wakwe Izlaeli yikalanga mu misumba kwene ii.

Amu mupanda wakwe Asyeli

³⁰ Ana yakwe Asyeli a Imuna, Isyiva, Isyivi na Beliya. Kaci wao wali a Selaa.

³¹ Ana aonsi yakwe Beliya a Hebeli na Malikieli, wino isi wali a Bilizaiti.

³² Hebeli wali a isi wakwe Yafuleti, Syomeli na Hotamu nga na Syuwa, kaci wao.

³³ Ana yakwe Yafuleti a Pasaki, Bimali na Asyivati. Yakwene ali ana aonsi yakwe Yafeti.

³⁴ Ana aonsi yakwe Syomeli a Aai, Loga, Yeuba na Alamu.

³⁵ Ana aonsi yakwe Helemu umwina wakwe a Zofa, Imuna, Syelesyi na Amali.

³⁶ Ana aonsi yakwe Zofa a Suwa, Halenefeli, Syuali, Beli, Imula,

³⁷ Bezeli, Hodi, Syama, Syilisya, Itilani na Beela.

³⁸ Ana aonsi yakwe Yeteli a Yefune, Pisipa na Ala.

³⁹ Ana aonsi yakwe Ula a Ala, Hanieli na Liziya.

⁴⁰ Yaa yonsi yali amu mutundu wakwe Asyeli. Nupya yali intunguluzi zya mitundu, antu ampomvu, ivita viposye nupya intunguluzi zizwangane. Impendwa ya vita ivyaiteinye ukulwa inkondo, ndi vino vyatantikwa mu kuvyalwa, vyali 26,000.