1 Milandu 5 - Amazwi Yakwe Leza 2013

¹ Yaa ana yakwe Lubeni, umwana iyeli lyakwe Izlaeli. Endi, Lubeni wali umwana iyeli, lelo lino walongwizye na nyina munono, uyeli wakwe wapilwe ku ana yakwe Yosefu umwana wakwe Izlaeli. Acino wene atatantikwe pa mazina alembwa akulondekana nu uyeli wakwe.

² Lelo umutundu wakwe Yuda wizile iuya uwamaka wakwe cimwi nga umwafumile uwakuteeka imitundu yonsi.

³ Ana yakwe Lubeni iyeli lyakwe Izlaeli a Hanoki, Palu, Heziloni na Kalimi.

⁴ Amu mupanda wakwe Yowelo aonsi a Syemaya, Gogi, Syimei,

⁵ Mika, Leaya, Baali,

⁶ na Beelaa, wino Tigilati Pilesa, umwene waku Asilya wasenzile ku uzya. Beelaa wali intunguluzi ya amu mutundu wakwe Lubeni.

⁷ Akazi kao umu nko zyao, yatantikwa wakwe vii mu vyalembwa, ukulingana nu mu vyalembwa vyakuvyalwa kwao: Yeiyeli uwali intunguluzi, Zakaliya,

⁸ na Bela umwana umonsi wakwe Azazi, umwana umonsi wakwe Syema, umwana umonsi wakwe Yowelo. Yaa yonsi yatenzi ukutandikila mu ncende ya Aloeli mpaka ukufika ku Nebo nu ku Baali Meoni.

⁹ Lwa ku ufumondaka nako yatenzi mu mpanga ilya mpaka ukufika umwapelela ulwanga lwamu nkumba ya Luzi lwa Yufulate, pamulandu wakuti iviteekwa vyao alanga vyasanduluka mu Gileadi.

¹⁰ Mu manda ya kuteeka kwakwe Saulo yakatwisye inkondo nu kulwa na ina Hagili, mpaka yayacimvya. Nga yikala mu mpanga yao yonsi mpaka ukufika na lwaku ufumondaka wa Gileadi.

Amu mupanda wakwe Gadi

¹¹ Amu mutundu wakwe Gadi yikalaga apipi nayo mu Basyani, ukufika nu ku Saleka.

¹² Yowelo uwali intunguluzi yao, wakwe ciili a Syafamu, nga palondelela Yanai na Syafati, ku Basyani.

¹³ Akazi kao, ukulingana ni ndupwa zyao, yali a Mikaeli, Mesyulamu, Syeba, Yolai, Yakani, Zia na Ebeli. Yonsi pamwi yali cinimbali.

¹⁴ Yakwene yali ana aonsi yakwe Abiaili umwana umonsi wakwe Huli, umwana umonsi wakwe Yaloa, umwana umonsi wakwe Gileadi, umwana umonsi wakwe Mikaeli, umwana umonsi wakwe Yesyisyai, umwana umonsi wakwe Yaado, umwana umonsi wakwe Buzi.

¹⁵ Aai umwana umonsi wakwe Abidieli, umwana umonsi wakwe Guni, uwali intunguluzi ya nko zii.

¹⁶ Yene yikalanga mu mizi yaku Gileadi nu ku Basyani ni mizi yakweyo iyazingulwike, nga nu ku ncende zyonsi zyamulemvwe izyaku Syaloni ukufika nu kulutwe lwaziko.

¹⁷ Amazina yao yonsi yatantikwe mu vyalembwa vyakuvyalwa kwao mu manda ya kuteeka kwakwe Yotamu umwene waku Yuda na Yeloboamu umwene waku Izlaeli.

Ivita vya mitundu yaku Ufumondaka

¹⁸ Amu mutundu wakwe Lubeni, na amu mutundu wakwe Gadi nga na amu mutundu pakasi wakwe Manase yakweti antu 44, 760 aiteinye ukulwa inkondo, yayo asambiliziwe ningo ukuomvya ivisyangu ni zyampanga, nu ulapwa ni nceto, nupya asambiliziwe ningo ukulwa inkondo.

¹⁹ Iyakatusya inkondo nu kulwa na aina Hagili, Yetuli, Nafyisi na ina Nodabu.

²⁰ Leza wayazwilizye apa nsita ino yalwanga inkondo, nga yacimvya aina Hagili pamwi na yonsi yano yalemine nayo. Yene yataile muli Leza. Acino apa nsita ino yakulwa yapepa kunoli nga nawe auvwa amapepo yao nu kuyapeela ucimvyo pa ina Hagili na yayo alemine nayo.

²¹ Yayapoka ni viteekwa vya ina Hagili ivili wakwe vii: ingamila 50,000, imfwele 250,000, na yacipambasi 2,000. Yalemile na antu 100,000.

²² Anisi yao nayauze avule yakomilwe, pamulandu wakuti Leza uwakasi kuti ciye vivyo. Alino iyatwalilila ukwikala mu mpanga ilya mpaka ukufika nu mu nsita yakusendwa uku uzya.

²³ Antu amu mutundu pakasi wakwe Manase yavuzile wakwe cimwi, Yaile yikala mu mpanga ya Basyani lwaku katutu kwene mpaka ukufika nu ku Baali Helimoni, Senili, nga nu ku Mwamba wa Helimoni.

²⁴ Intunguluzi zya nko zyao yali a Efeli, Isyi, Eliyeli, Azilieli, Yelemiya, Hodaviya na Yaadieli. Yene yali ivita viposye, antu yalumbuke, nupya intunguluzi zya nko zyao.

Imitundu yaku ufumondaka yazingwa

²⁵ Lelo yene yatali acumi kuli Leza wa vikolwe vyao nga yamufutatila kuti yapepa tuleza twa antu amu mpanga ilya, yano Leza ononyile lino yene yafisile mwenemo.

²⁶ Acino Leza wa ina Izlaeli aika ilango mu mwenzo wakwe Pulu, umwene waku Asilya, wino izina lyakwe lyuze yatangi Tigilati Pilesa, kuti akazanze impanga yao. Nga nawe asenda umu uzya amu mutundu wakwe Lubeni, na wakwe Gadi, nga nu mutundu pakasi wakwe Manase. Ayatwala ku Halaa, ku Haboli, ku Hale, nu ku luzi lwa Gozani, kuno yikala ukufika na ndakai kwene.