1 Milandu 29 - Amazwi Yakwe Leza 2013

Amawila akuomvya apa kukuula Ng'anda ikulu yakwe Yawe

¹ Pacisila cakwe vii umwene Davidi anena iumba lyonsi ilyakongine ati, “Solomoni umwanane umonsi, wino Leza wasolola, umwance nupya atakweti umanyililo wa vintu. Umulimo uukulu, pamulandu wakuti icikulwa cii ica lulumbi. Ing'anda ii isi ya muntu, lelo iyakwe Yawe Leza.

² Nemo napeela consi icingapelwa apa kuteyanya vyonsi ivyakuomvya apa kukuula Ng'anda ikulu yakwe Leza, zaabu wakupangila iviya vyakwe zaabu, siluva wakupangila iviya vyakwe siluva, umukuwa wakupangila iviya vya mukuwa, ivyela ivya kupangila iviya vya vyela nga ni mbao zyakupangila iviya vya mbao, nga na mawe yamutengo amusango wakwe onikisi, daimondi, akupangila ivintu vyamutengo, na mawe ya malangi ya misango yonsi, ni misango yonsi yuze ya mawe kumwi na mawe yano yakati malabulo. Vyonsi vii vyali anyanya.

³ Ukulunda pali vii vyonsi, nemo nkupeela ku Ng'anda ikulu yakwe Leza, icuma cane cakwe zaabu na siluva, ukuluta pali vyonsi vino napeela ku mulimo wa Ng'anda yakwe ikulu.

⁴ Namapeela amatani 100 yakwe zaabu, umusuma wakwe cimwi uwaku Ofili, nga na matani 240 yakwe siluva umuswefiwe, uwakupomela ing'umba zya vikulwa,

⁵ nga ni viombelo vyonsi vino yafundi ya milimo yalapanga. Lyene aweni namuze akasi ukupelesya kuli Yawe apilelo?”

⁶ Alino intunguluzi zya nko, ni ntunguluzi zya mitundu, na yamusika ampuka ya vita izimbi lyonga na yamusika ya vita umwanda onga, nga na yakapitao ya milimo ya mwene yapeela vino yakweti nu mwenzo onsi.

⁷ Vino yalavile kupeela ku mulimo wa kukuula Ng'anda ikulu yakwe Yawe aevi: amatani 170 yakwe zaabu, amakilogalamu 84 ya mpiya zyakwe zaabu zya musango uze, amatani 340 yakwe siluva, amatani ya mukuwa manye 620, nga na matani 3, 400 a cela.

⁸ Ali wensi uwakweti amawe amutengo ukulu, nawe ayatwala ku ng'anda ya kusungilamo cuma cakwe Yawe. Uwangalilanga ivintu kwene vii a Yeeiyeli uwa mutundu wakwe Gelisyoni.

⁹ Antu yazanzile wakwe cimwi pamulandu wakuti intunguluzi zyao zyapelisye kuli Yawe nu mwenzo onsi. Umwene Davidi nawe kwene wazanzile wakwe cimwi.

Davidi walumbanya Yawe

¹⁰ Davidi alumbanya Yawe apa manso ya antu yonsi akongine. Avwanga ati, “We Yawe Leza wakwe Izlaeli icikolwe citu, si antu yakulumbanye umuyayaya.

¹¹ We Yawe, wewe mukulu nupya uwamaka, uwalulumbi, nu usambazi. Pano ivintu vyonsi umwiyulu na pano nsi ivyakwako. Uwene uwakwako we Yawe. Wewe uli mukulu mpo pa vintu vyonsi.

¹² Icuma nu mucinzi vikafuma kunuli. Wewe uli kateeka wa vintu vyonsi. Pano wewe wakwata amaka akucindamika umuntu ali wensi nu kumukomya.

¹³ Acino lyene, we Leza witu, tukukutaizya, nu kulumbanya izina lyako ilyalulumbi.”

¹⁴ “Lelo nene pamwi na antu yane pasi cimwi cino tungakupeela, pamulandu wakuti ivintu vyonsi uwila ukufuma kunuli, nga naswe twatitukuwezezya sile ivyakwako.

¹⁵ We Yawe, umanyile ukuti mu umi witu tuli wa enyi na inamasi, ndi vino ivikolwe vitu vyali. Amanda itu akwikala pano nsi yali wa cinzingwa icikupita, nupya tutangutuka imfwa.

¹⁶ We Yawe Leza witu, endi silola uwingi wa vintu vino twatitupela ku mulimo waku kukuulila Ng'anda ikulu kuti tucindike izina lyako. Wewe watupeela vyonsi, nupya vyonsi kwene ivyakwako.

¹⁷ We leza wane, imanyile ukuti wemo ukaezya umwenzo wa muntu ali wensi, nu kuti ukazangila mu muntu akacita ivisuma. Ndakai nailolela ni nsansa kuno antu yako yakupeela kunuli mu kuitemelwa.

¹⁸ We Yawe, Leza wakwe Abulaamu, Isaki na Izlaeli, si ule walukwika umuzonda uu mu myenzo ya antu yako, nga yaye nu mwenzo wakukuyela mpaka umuyayaya.

¹⁹ Upeele Solomoni umwanane umonsi insuna ya kuyela amalamulo yako yonsi nga nu ku kukuulila Ng'anda ikulu ino natinteyanyizizya vii vyonsi.”

²⁰ Lyene Davidi anena antu akongine yonsi ati, “Lumbanyini Yawe Leza winu.” Acino antu yonsi iyalumbanya Yawe, Leza wa vikolwe vyao. Yakontama nu kucindika Yawe nga nu mwene kwene.

Solomoni yamulasika apa cilimba ca wene

²¹ Uwanda uwalondelela yapeela impolelwa nga na mawila yakoca kuli Yawe, ndi vii, yacipambasi izimbi, yasuku izimbi nga na ana yamfwele izimbi, ukwika penepo na mawila yao ya vyakumwa nga ni mpolelwa zyuze izya ina lzlaeli izivule wakwe cimwi.

²² Lyene apa wanda kwene ulya, iyalya nu kumwa nu luzango ulukulu apa manso yakwe Yawe. Alino lyene iila lyakwe ciili yalasika Solomoni umwana umonsi wakwe Davidi apa cilimba ca wene, nga apa manso yakwe Yawe iyamupaka amafuta akumusolola ukuya intunguluzi na Zadoki nawe aya simapepo.

²³ Acino Solomoni aikala apa cilimba ca wene uno Yawe wateinye, atoola amalo yakwe isi Davidi. Aya nu longo mu vintu vyonsi, nga aina Izlaeli yonsi yayelanga amalamulo yakwe.

²⁴ Intunguluzi zyonsi, ni vita nga na ana aonsi yonsi a mwene Davidi, iyalaya ukuti yamayelanga umwene Solomoni.

²⁵ Aina Izlaeli yonsi yalola ukuti Yawe watatumpula Solomoni. Wene amupeela uteko uwa lulumbi uno kutatazile kuya umwene muze uwa ukweti mu mpanga ya Izlaeli.

Imfwa yakwe Davidi

²⁶ Davidi umwana umonsi wakwe Yese wali umwene wa ina Izlaeli.

²⁷ Wene wateesile umu Izlaeli imyaka amakumi yani. Umu Hebuloni wateesile imyaka cinimbali, nga mu Yelusalemu namo wateesile imyaka amakumi yatatu na itatu.

²⁸ Davidi afwa ala umukombe wa myaka ivule. Watenzi amanda nyanya pano nsi, nupya wakweti icuma nyanya nu mucinzi ukulu.

²⁹ Ivintu vino Davidi wacisile ukufuma ku kutandika ukufika nu kumpela vyaya mu vyalembwa vyakwe kasema Samueli, Natani na Gadi.

³⁰ Ivyalembwa vivyo vikalanda pa musango uno wene wateekilemo, na maka yano wakweti nga ni vintu ivyamucitikile, ni vyacitikile uluko lwa Izlaeli, kumwi ni mpanga zyuze ukuzinguluka.