1 Milandu 28 - Amazwi Yakwe Leza 2013

Davidi watantika vyakukuula Ng'anda ikulu yakwe Yawe

¹ Umwene Davidi apeela ilamulo ku akalamba amu Izlaeli kuti yakongane ku Yelusalemu. Kuli kuti akalamba ya mitundu, yakapitao ampuka zino zyatumikilanga umwene, yamusika ampuka ya vita izimbi, na yamusika ya vita umwanda onga, na akalamba akawaka iviteekwa vyonsi ivya mwene ni vya ana yakwe aonsi, nga na akalamba ya kwisano, na antu yamaka ni vita iviposye.

² Alino umwene Davidi aimilila nga avwanga ati, “Nguvwini, mwe inane na mwe antu yane. Nemo nelenginye ku kuula ng'anda yakusungilamo Mbokosi ya Upangano yakwe Yawe, ino ikoline wa cilimba ca ngazo cakwe Leza witu. Nga netetwile ivya kuipanga.

³ Lelo Leza wanenyile ati, ‘Asi awewe uli nu kunkuulila ng'anda awe, pamulandu wakuti wewe cita nupya wazwisya uwazi wakwe cimwi.’

⁴ “Lelo Yawe, Leza wa ina Izlaeli, wansolola ukufuma mu akazi kane yonsi kuti nje umwene wa ina Izlaeli umuyayaya. Wene wasolwile amu mutundu wakwe Yuda kuti yatungulula, nga ukufuma mu mutundu wakwe Yuda wasolwile akazi kane. Alino ukufuma mu inane amuli tata camuzanzizye kuti ansolole nu kundasika pa cilimba ca wene wa Izlaeli.

⁵ Yawe wampeela ana aonsi avule, nga ukufuma mu ana kwene yayo, wene wasolola Solomoni kuti ateeka aina Izlaeli, umu wene wakwe Yawe.

⁶ “Anena ati, ‘Solomoni umwana wako aliwe alankuulila ng'anda nu kumpangila imisolo, pasi pano namusolola kuti aye umwanane umonsi, nga nani namaya isi.

⁷ Uwene wakwe ndautantalizya mpaka umuyayaya, ndi cakuti wene watwalilila ukuyela amalamulo na masunde yane, ndi vino akucita pali ndakai.’

⁸ “Acino lyene apa manso yakwe Yawe, Leza witu na ina Izlaeli yonsi atiyakongana pano, nkukukonkomezya ukuyela amalamulo yonsi yakwe Yawe Leza wako, kuti upyane impanga ii isuma, nu kuti ikasyalile amu mupanda winu umuyayaya.”

⁹ “Acino we mwanane Solomoni, wauvwila Yawe Leza wa vikolwe vyako, nu kumutumikila nu mwenzo wako onsi, umu kuitemelwa. Pasi pano Yawe akaceceta umwenzo wa muntu ali wensi, nu kumanya ilango ni vilondwa vitu vyonsi. Ndi cakuti wamulondalonda, ulamuzana. Lelo ndi wamufutatila, nawe kwene alakutazyela umuyayaya.

¹⁰ Lyene elenganya ningo apa vintu vii, pasi pano Yawe wakusolola kuti umukuulile ng'anda, umwakuti wene aikalamo ungati umwakwe. Posya kuti uombe umulimo uu.”

¹¹ Alino Davidi apeela Solomoni umwanakwe uwanziko wa Ng'anda iyo ikulu yakwe Yawe, ni vikulwa vyuze vyakweyo, ni miputule yakweyo yakusungilamo ivyuma, ni laali lyaiko, ni miputule yakweyo yamukasi nga ni ncende yakwelelapo amaifyo.

¹² Wene amupeela uwanziko wa vintu vyonsi vino Mupasi wamulenzile ukwelenganyizizya imisolo ya Ng'anda ikulu yakwe Yawe, kumwi ni miputule yonsi ukuzinguluka, yakusungilamo icuma ca Ng'anda ikulu yakwe Leza, nga ni miputule yakusungilamo amawila apaatwilwa Yawe.

¹³ Amupeela amazwi ya utunguluzi yapa mpuka zyakwe yasimapepo na ina Levi, nga nu mulimo onsi uwa kutumikila mu Ng'anda ikulu yakwe Yawe, ukwikapo ni viya ivyakuomvya mu Ng'anda ikulu kwene iyo.

¹⁴ Apela utunguluzi wa mipimile ya kunyoma kwakwe zaabu wakupangila iviya vyonsi vyakwe zaabu ivyalondekwanga, nga nu kunyoma kwakwe siluva wakupangila iviya vyakwe siluva ivyalondekwanga,

¹⁵ nu kunyoma kwakwe zaabu wakupangila ivyakutekapo inyali vyakwe zaabu ni nyali zyaviko, nu kunyoma kwa cakutekapo inyali cakwe zaabu icili consi kumwi ni nyali zyakweco. Apima nu kunyoma kwakwe siluva wakupangila cakutekapo inyali cakwe siluva icili consi kumwi ni nyali zyakweco, ukulingana nu mulimo wa cakutekapo inyali icili consi,

¹⁶ nu kunyoma kwakwe zaabu wakupangila cila tebulo lyakwikapo umukate wakupeela kuli Yawe, nu kunyoma kwakwe siluva wakupangila amatebulo yakwe siluva,

¹⁷ nu kunyoma kwakwe zaabu umuswefiwe wakupangila yafoloko, ingeso zyakukanyizizya ni ngako, nu kunyoma kwakwe zaabu wakupangila cila mbale yakwe zaabu, nu kunyoma kwakwe siluva wakupangila cila mbale yakwe siluva.

¹⁸ Apima nu kunyoma kwakwe zaabu umuswefiwe wakupangila kavuwa kakocelapo ubani, nu wanziko wakupangila iceleta, kuli kuti, yakelubi yakwe zaabu yano yatiyakonzolola amapa yao nu kuvimba apa Mbokosi ya Upangano yakwe Yawe.

¹⁹ Davidi avwanga ati, “Vi vyonsi vili mu wanziko ulembwe ukulingana na mazwi ya utunguluzi yano Yawe umwisikulu wampeela kuti mfikilizye.”

²⁰ Davidi anena Solomoni umwana wakwe ati, “Uposye nupya uzyansye kuti uombe umulimo uu. Utuvwa intete nanti kutovoka, pano Yawe, Leza wane, ali nawe. Wene atalakutazyela nanti kukusya, mpaka uce umale umulimo onsi wa Ng'anda ikulu yakwe Yawe.

²¹ Impuka zyakwe yasimapepo na ina Levi zyatiziiteyanya ukuomba umulimo onsi waku Ng'anda ikulu yakwe Leza, nga nu muntu wensi akasi nupya fundi wa mulimo uli onsi alakwazwilizya ukuomba umulimo onsi. Ivilolo na antu yonsi yalayela ilamulo ilyakucita icili consi cino ulayanena ukucita.”