1 Milandu 27 - Amazwi Yakwe Leza 2013

Ivita ni ntunguluzi zyao

¹ Uu, uli utantiko wa ntunguluzi zya ndupwa zya ina Izlaeli, yamusika ya vita izimbi na yamusika ya vita umwanda onga, na akalamba yao yano yatumikilanga umwene, muli vyonsi ivikumile impuka zya vita ivyali pa luti cila mwezi mukasi ka mwaka uli onsi. Cila mpuka yakweti antu ukulingana 24,000.

² Yasyobeamu umwana umonsi wakwe Zabidieli wali akangalila wa mpuka yakwe conga mu mwezi wakwe conga. Mu mpuka yakwe mwali ivita ukulingana 24,000.

³ Wene wali uwamu mupanda wakwe Pelezi nupya musika mukulu uwa vita vyonsi mu mwezi wakwe conga.

⁴ Dodai uwamu mupanda wakwe Aoi wali akangalila wa mpuka yakwe ciili mu mwezi wakwe ciili. Mikiloti wali intunguluzi ya mpuka yakwe. Mu mpuka yakwe mwali ivita ukulingana 24,000.

⁵ Musika wa vita mu mwezi wakwe citatu, wali a Benaya umwana umonsi wakwe simapepo Yeoyada. Uwali intunguluzi, nga mu mpuka yakwe mwali ivita ukulingana 24,000.

⁶ Benaya wi ali wino wali intunguluzi pakasi ka antu amakumi yatatu yalya. Amizabadi umwana wakwe umonsi uwatozile amalo yakwe akwangalila impuka yakwe.

⁷ Asaeli umwina wakwe Yoabu, uwali intunguluzi mu mwezi wakwe cini, nga Zebadiya umwana wakwe umonsi uwamupyanyile. Mu mpuka yakwe mwali ivita ukulingana 24,000.

⁸ Intunguluzi yamu mwezi wakwe cisano wali a Syamuti uwamu mupanda wakwe Izila. Mu mpuka yakwe mwali ivita ukulingana 24,000.

⁹ Intunguluzi mu mwezi walenga mutanda wali a Ila umwana umonsi wakwe Ikesyi uwaku Tekoa. Mu mpuka yakwe mwali ivita ukulingana 24,000.

¹⁰ Intunguluzi yamu mwezi wakwe cinimbali wali a Helezi uwaku Peloni, wenga uwamu mutundu wakwe Efulemu. Mu mupanda wakwe mwali ivita ukulingana 24,000.

¹¹ Intunguluzi yamu mwezi wakwe cinani wali a Sibekai uwaku Husya, uwamu luko lwakwe Zela. Mu mpuka yakwe mwali ivita ukulingana 24,000.

¹² Intunguluzi yamu mwezi walenga fundimbali yali a Abiezeli, wenga uwaku Anatoti, uwamu luko lwakwe Benjamini. Mu mpuka yakwe mwali ivita ukulingana 24,000.

¹³ Intunguluzi yamu mwezi walenga ikumi yali a Maalai uwaku Netofa, uwamu luko lwakwe Zela. Mu mpuka yakwe mwali ivita ukulingana 24,000.

¹⁴ Intunguluzi yamu mwezi uwalenga ikumi na conga yali a Benaya uwaku Pilatoni, uwamu mutundu wakwe Efulemu. Mu mpuka yakwe mwali ivita ukulingana 24,000.

¹⁵ Intunguluzi yamu mwezi uwalenga ikumi na iili yali a Helidai uwaku Netofa, uwamu mupanda wakwe Otinieli. Mu mpuka yakwe mwali ivita ukulingana 24,000.

Yakangalila ya mitundu ikumi na iili ya ina Izlaeli.

¹⁶ Intunguluzi izyangalilanga imitundu ya ina Izlaeli aizi: Intunguluzi ya mutundu wakwe Lubeni yali a Elieza umwana umonsi wakwe Zikili. Intunguluzi ya mutundu wakwe Simeoni yali a Syefatiya umwana umonsi wakwe Maaka.

¹⁷ Intunguluzi ya ina Levi yali a Hasyabiya umwana umonsi wakwe Kemueli. Intunguluzi ya amu mutundu wakwe Aaloni yali a Zadoki.

¹⁸ Intunguluzi ya mutundu wakwe Yuda yali a Eliu, umwina wakwe Davidi. Intunguluzi ya amu mutundu wakwe Isakali yali a Omuli umwana umonsi wakwe Mikaeli.

¹⁹ Intunguluzi ya amu mutundu wakwe Zebuluni yali a Isyimaya umwana wakwe Obadiya. Intunguluzi ya amu mutundu wakwe Nafutali yali a Yelemoti umwana umonsi wakwe Azilieli.

²⁰ Intunguluzi ya amu mutundu wakwe Efulemu yali a Hosyea umwana umonsi wakwe Azaziya. Intunguluzi ya mutundu pakasi wakwe Manase, lwa ku uwondaka, yali a Yowelo umwana umonsi wakwe Pedaiya.

²¹ Intunguluzi ya mutundu pakasi wakwe Manase mu Gileadi yali a Ido umwana umonsi wakwe Zakaliya. Intunguluzi ya aina Benjamini yali a Yaasieli umwana umonsi wakwe Abineli.

²² Intunguluzi ya amu mutundu wakwe Dani yali a Azaleli umwana umonsi wakwe Yeloamu. Zikwene zili ntunguluzi zya mitundu ya ina Izlaeli.

²³ Davidi atapendenkinye antu atakweti imyaka ukuluta pa myaka amakumi yaili yakuvyalwa, pamulandu wakuti walanga Yawe walaya ukusandulula aina Izlaeli wa ntanda zya mwiyulu.

²⁴ Yoabu umwana umonsi wakwe Zeluya atandika ukupenda antu lelo atamalilile awe. Ukali wakwe Yawe nao uponela aina Izlaeli pamulandu wakupenda kuu, nga ni mpendwa iyo yatingizye mu lupapulo lwa milandu ya mwene Davidi.

²⁵ Azimaveti umwana umonsi wakwe Adiyeli wangalilanga amang'anda ya mwene akusungilamo icuma. Yonatani umwana umonsi wakwe Uziya wangalilanga amang'anda akusungilamo icuma mu vitungu, mu misumba, mu mizi nu mu mpungu.

²⁶ Ezili umwana umonsi wakwe Kelubi wangalilanga aomvi alimanga ivyalo.

²⁷ Syimei uwaku Lama wangalilanga vyalo vya matingi. Zabidi uwaku Syifami wangalilanga waini kuti asungwe ningo mu vyakusungila mwenemo waini.

²⁸ Baali Hanani uwaku Gedeli wawakanga imiolivi nga ni misamvu mu misana ya twamba twaku uwondaka. Yoasyi wawakanga umwakusungila amafuta ya miolivi.

²⁹ Syitilai waku Syaloni wawakanga amaufyo ya iviteekwa ivya cemelwanga ku Syaloni. Syafati umwana umonsi wakwe Adilai wawakanga amaufyo ya viteekwa umu vifoloma.

³⁰ Obili umwina Isumeli wawakanga ingamila. Yedeiya waku Melonoti wasunganga yapunda.

³¹ Yazizi umwina Hagili wawakanga imfwele ni mbuzi. Yaa yonsi yali akalamba awakanga icuma ca mwene Davidi.

Yampandamano yakwe Davidi

³² Yonatani, nyinalume wakwe Davidi, wali a mpandamano, umuntu umulamoke nupya wasambilile wakwe cimwi. Yeeiyeli umwana umonsi wakwe Hakimoni wasambilizyanga ana yamwene.

³³ Aitofeli wali a mpandamano wa mwene. Husyai umwina Aliki wali acuza wa mwene.

³⁴ Lino Aitofeli wafwile, Yeoyada umwana umonsi wakwe Benaya pamwi na Abyata kwene, yamupyana. Yoabu wali a musika mukulu uwa vita vya mwene.