1 Milandu 24 - Amazwi Yakwe Leza 2013

Ukwankanya imilimo ku amu mupanda wakwe Aloni

¹ Zii zili mpuka zya amu mupanda wakwe Aloni. Ana yakwe Aaloni a: Nadabu, Abiu, Eleaza, na Itamali.

² Lelo Nadabu na Abiu yafwile ala isi acili nu umi, nga yatakweti ana aonsi awe. Acino Eleaza na Itamali yatumikilanga wakwe yasimapepo.

³ Umwene Davidi aika amu mupanda wakwe Eleaza mu maumba maumba, ukulingana ni milimo ino yapilwe. Zadoki uwamwazwilizye ukucita vivyo, pamwi na Aimeleki uwamu mupanda wakwe Itamali.

⁴ Pakasi ka amu mupanda wakwe Eleaza pazanyilwe intunguluzi izivule ukuluta mu amu mupanda wakwe Itamali. Acino Davidi wasolwile intunguluzi 16 pakasi ka amu mupanda wakwe Eleaza, nga nayauze cinani pakasi ka amu mupanda wakwe Itamali.

⁵ Yayasolola ukupitila mu kupendola, pasi pano yene yali aomvi ya Ng'anda Ikulu yakwe Yawe nupya intunguluzi zya mapepo zyamu mupanda wakwe Eleaza ni zyamu mupanda wakwe Itamali.

⁶ Amu mupanda wakwe Eleaza na wakwe Itamali yalekelana ukupendola. Lyene kalemba, Syemaya umwana wakwe Netaneli, wino wali umwina Levi, alemba mazina yao. Yakambone yakwe aeya: umwene, ivilolo, simapepo Zadoki, Aimeleki umwana umonsi wakwe Abyata, nga ni ntunguluzi zya ndupwa zyakwe yasimapepo ni zya ina Levi

⁷ Ukupendola kwa nkolelo ikulema Yeoyalibu, nga kwakwe ciili ikulema Yedaya,

⁸ kwakwe citatu ikulema Halimu, kwakwe cini ikulema Seolimu,

⁹ kwakwe cisano ikulema Malikiya, kwakwe mutanda ikulema Miyamini,

¹⁰ kwakwe cinimbali ikulema Hakozi, ukwalenga cinani ikulema Abiya,

¹¹ ukwalenga fundimbali ikulema Yesyua, ukwalenga ikumi ikulema Syekaniya,

¹² ukwalenga ikumi na conga ikulema Elyasyibu, ukwalenga ikumi na viili ikulema Yakimu,

¹³ ukwalenga ikumi na vitatu ikulema Hupa, ukwalenga ikumi na vini ikulema Yesyebeabu,

¹⁴ ukwalenga ikumi na visano ikulema Biliga, ukwalenga ikumi na mutanda ikulema Imeli,

¹⁵ ukwalenga ikumi na cinimbali ikulema Hezili, ukwalenga ikumi na cinani ikulema Hapizezi,

¹⁶ ukwalenga ikumi na fundimbali ikulema Petaya, ukwalenga amakumi yaili ikulema Yeezikele,

¹⁷ ukwalenga amakumi yaili na conga ikulema Yakini, ukwalenga amakumi yaili na viili ikulema Gamuli,

¹⁸ ukwalenga amakumi yaili na vitatu ikulema Delaya, ukwalenga amakumi yaili na vini ikulema Maaziya.

¹⁹ Umulimo wa antu kwene yaa wali uwakutumikila mu Ng'anda ikulu yakwe Yawe, ukulingana ni vipope vino Aaloni icikolwe cao cayasilile, ndi muno Yawe, Leza wa ina Izlaeli wamupelile ilamulo.

Utantiko wa ina Levi asyala

²⁰ Intunguluzi zyuze zya amu mupanda wakwe Levi aizi: Yedeiya umwizikulu wakwe Syubaeli,

²¹ Intunguluzi ya amu mupanda wakwe Leabiya a Isiya.

²² Yaati umwizikulu wakwe Syelomoti, wino wali umwizikulu wakwe Izali.

²³ Ana yakwe Hebuloni aeya: Yeliya, uwali iyeli lyakwe, nga wakwe ciili a Amaliya, wakwe citatu a Yaazieli nga wakwe cini a Yekameamu.

²⁴ Syamili wali umwizikulu wakwe Mika, ni cikolwe cao wali a Uzieli

²⁵ Umwina wakwe Mika wali a Isiya. Zakaliya wali umwizikulu wakwe Uzieli. Icikolwe cao wali a Isiya.

²⁶ Amu mupanda wakwe Melali yali a Maali, Musyi. Umwana umonsi wakwe Yaaziya a Beno.

²⁷ Ana aonsi yakwe Melali, ukufuma muli Yaaziya umwana wakwe, a: Beno, Syoamu, Zakuli na Ibili.

²⁸ Ana aonsi yakwe Maali aeya: Eleaza, wino atakweti ana aonsi.

²⁹ Umwana wakwe Kisyi a Yelameeli.

³⁰ Ana yakwe Musyi aonsi aeya: Maali, Edeli na Yelimoti. Yakwene yali aina Levi ukulingana ni ndupwa zyao.

³¹ Cila ntunguluzi zya mitundu, ukwika penepo nu mwina wakwe wenga, yapendola kuti yamanye umulimo uno yapilwe, ndi vino aina yao amu mupanda wakwe Aaloni yacisile, aikolo na ance kwene. Yakambone yao umwene Davidi, Zadoki, Aimeleki, ni ntunguluzi kwene zizi zyakwe yasimapepo na ina Levi.