1 Milandu 20 - Amazwi Yakwe Leza 2013

Davidi wapoka umusumba wa Laba

¹ Apa mwela, lino yamwene yakaya ku ulwi, Yoabu atungulula impuka ya vita, nga aonona impanga ya ina Amoni. Alino aya ku musumba wa Laba nga auteyamila nu ku uzanza. Lelo Davidi wene asyala mu Yelusalemu. Lyene Yoabu azanza umusumba wa Laba nu kuonona.

² Davidi azula umwene wao ingala yakwe zaabu, nga lino waipima ukunyoma, azana ukuti inyomile amakilogalamu 5, nga pa ngala kwene iyo pali utumawe twamutengo ukulu wakwe cimwi. Alino Davidi yamuzwika ingala iyo, nga asenda ivisampwe vivule mu musumba ulya.

³ Azingila ukunzi antu aikalanga mwenemo, nu kuyapeela imilimo yakuomvya yamukalalu na yapiki ya vyela ni zyampasa. Davidi wacisile icili cimwi kwene ku misumba ya ina Amoni. Pacisila cakwe vii Davidi ni vita vyakwe vyonsi yaswilila ku Yelusalemu.

Davidi walwisya aina Filisti

⁴ Pacisila ca nsita imwi, inkondo ikatuka pakasi ka ina Izlaeli na ina Filisti ku Gezeli. Pa nsita ilya Sibekai waku Husya akoma Sipai, uwali wenga uwamu mupanda wakwe Lefaimu, nga aina Filisti yacimviwa.

⁵ Kwakatwike ulwi na uze uwakulwisyanya na ina Filisti. Elianani umwana wakwe Yaili akoma Laimi umwina wakwe Golyati waku Giti, wino wakweti isumo ilyakweti umusako utimbe wa mulongoti wakwe kapikula.

⁶ Lyene umu ulwi uze uwacitike ku Gati, kwali ipaka ilyatemilwe ukulwa. Lyali ni minwe mutanda ukwi kasa lilunji na mutanda ukwi kasa limani kwene. Nalyo kwene lyali ilyamu mupanda wakwe Lafa.

⁷ Ipaka lii ilisausya aina Izlaeli, nga Yonatani umwana umonsi wakwe Syimea, umwina wakwe Davidi, alikoma.

⁸ Amapaka yaa yali amu mpanda wakwe Lafa uwaku Gati, nga uwayakomile a Davidi na antu yakwe.