1 Milandu 17 - Amazwi Yakwe Leza 2013

Amazwi yano Natani wanenyile Davidi

¹ Pacisila lino Davidi watandika ukwikala mwi sano lyakwe, uwanda umwi anena kasema Natani ati, “Nemo nkwikala mwi sano lino lyakuuliwa ku miti ya mikelide, lelo Mbokosi ya Upangano yene ikusungwa mwi Taalu!”

² Natani amunena ati, “Cita icili consi cino ukwelenganya, pasi pano Leza ali nawe.”

³ Lelo usiku kwene ulya Yawe anena Natani ati,

⁴ “Pita ukanene Davidi umuomvi wane uti, ‘Yawe wavwanga wati, asi awewe ulankuulila ing'anda iyakwikala mwenemo.

⁵ Intatala nikala umu ng'anda ukutandika sile lino nafumizye aina Izlaeli mu Eguputo, ukufika na pilelo kwene. Nemo nasaamanga ku na ku, nupya nikalanga mwi taalu.

⁶ Nemo nkapita pamwi na ina Izlaeli yonsi konsi kuno nkaya, lelo ntatala nuzya intunguluzi zino nasonta umulandu uno zitankuulila Ng'anda ikulu iyakuulilwa ni miti ya mikelide.’ ”

⁷ Acino nena umuomvi wane Davidi uti, “Nene ne Yawe Wamaka, yonsi nkumunena inti, ‘Anene nakufumizye kuku kuno wacemanga imfwele, nu kwiza kulasika uwene pa antu yane aina Izlaeli.

⁸ Nayanga nawe konsi kuno wapitanga. Nacimvyanga na anisi yako yonsi. Ndakucindamika ukulingana na antu acindamisye apano nsi.

⁹ Ndalondela antu yane icifulo cisuma. Ndayalasika cakuti nayo ali muno yalikalilila umu cifulo kwene cico. Kusi umuntu aalayafumya mwenemo. Aipe nayo yatalatwalilila uku yacuzya wakwe vino yacitanga mpiti,

¹⁰ mu manda yalya yano nasonsile intunguluzi zyakuti zyatungulula antu yane aina Izlaeli. Ndayacimvizya anisi yao. Anene ne Yawe nalanda kunuli ukuti ndacita vivyo.

¹¹ Lino waca wafwa nu kuzikwa pamwi ni vikolwe vyako, ndalasika wenga uwamu ana yako kololo pa cilimba ca wene, kuti akupyane. Nupya ndakomya uwene wakwe.

¹² Aliwe alankuulila ng'anda, nga nani ndakomya utesi wakwe amanda pe.

¹³ Nani ndaya isi, nawe alaya umwanane. Ntalatala nte ukumusakamala ndi vino natiile ukusakamala Saulo, wino nafumizye apa wene kuti wewe umupyane.

¹⁴ Ndamwika apa utunguluzi mu antu yane nu mu wene wane amanda pe.’ ”

¹⁵ Lyene Natani anena Davidi ivintu vyonsi vino Leza wamusokolwile.

Ipepo lyakwe Davidi ilyakutaizya

¹⁶ Lyene umwene Davidi aingila mwi Taalu lya Ukongano, nga aya aikala pansi atandika ukupepa kuli Yawe ati, “We Yawe Simwandalali, uzye nene weni pamwi na akazi kane, pa kunsunga ukufika na pano mpezile?

¹⁷ Nandakai ucili ukongezya navyuze pali vivyo. We Yawe Leza, walaya ivintu ku amu mupanda wane, nupya ukandola kwati nene muntu umwi umucindamisye.

¹⁸ Uzye icani cuze cino ningalanda kuli wewe? Wemo wamanya ningo, nga lelo ukancindamika ne muomvi wako.

¹⁹ Cali uku kulonda kwako, nga nu kwi pange lyako, kuti we Yawe umucitile icintu icikulu wakwe cii apa kumanyisya ivya ukulu wane ivili inkolelo.

²⁰ We Yawe, kusi umuntu nanti wenga angaya wakwe wewe, nupya kutaya Leza muze suka sile wewe wenga mpo.

²¹ Uzye kwaya uluko pano nsi ulukoline na antu yako aina Izlaeli, yano we Leza waile ku kuyakulula kuti yaye antu yako kololo? Ivintu ivyakuzunguka nupya ivyakoofya, vino wemo wacisile, ivyalenzile kuti ulumbuke wakwe cimwi, apa kuzinga antu amu nko zizi pa manso ya antu yako, yano wakuulwile ukufuma ku ina Eguputo.

²² Walenga aina Izlaeli kuti yaye antu yako amanda pe, nu kuti nawe uye Leza wao.

²³ “Acino ndakai, we Yawe nkukulenga kuti ufikilizye amalayo yako yano wacita pali nene ne muomvi wako na ang'anda yane, ukucita ndi muno walavile.

²⁴ Lyene alino izina lyako lilalumbuka umuyayaya. Alino na antu yalalanda yati, ‘Yawe Wamaka yonsi, ali Leza wa ina Izlaeli, aliwe kwene ali Leza wa ina Izlaeli.’ Nga ulasunga ang'anda yane, ne muomvi wako Davidi, umuyayaya.

²⁵ We Leza wane watunsokolwela ne muomvi wako ukuti ulalasika amu mupanda wane pa cilimba ca wene. We Yawe, wewe uli Leza wenga mpo! Nupya walaya ivintu vii ivisuma ku muomvi wako. Acino ne muomvi wako nkupepa nu kupama kunuli.

²⁶ Endi, we Yawe, wewe uli Leza! Walaya ivintu vii ivisuma ku muomvi wako.

²⁷ Acino nkukulenga kuti upolelele amu mupanda wane ne muomvi wako, kuti yatwalilile ukuya nu longo umuyayaya. Pasi pano we Yawe wayapolelela mpiti, nga yalaya apolelelwe umuyayaya.”