1 Milandu 14 - Amazwi Yakwe Leza 2013

Ivicitwa vyakwe Davidi mu Yelusalemu

¹ Lyene umwene Hilamu waku Tuli atuma inkombe kuli Davidi, ayalongelezya ni milando ya mikelide, amutumila yakaconga ya mawe na yakawaza ya mbao kuti yakamukuulile isano.

² Acino Davidi wamanyile ukuti Yawe watamulasika pa cilimba ca wene waku Izlaeli, nu kuti Yawe watapeela uwene wakwe ulongo pakuti cizipile antu yakwe aina Izlaeli.

³ Mumu kwene mu Yelusalemu, Davidi asaka anaci nayauze nga nayo yamuvyalila ana nayauze aonsi na anaci.

⁴ Ana kwene yano aci yamuvyalile mu Yelusalemu aeya: Syamua, Syobabu, Natani, Solomoni,

⁵ Ibaala, Elisyua, Elipeleti,

⁶ Noga, Nefegi, Yafiya,

⁷ Elisyama, Beeliyada, na Elifeleti.

Aina Izlaeli yacimvya aina Filisti

⁸ Lino ivita vya ina Filisti vyuvwa ukuti Davidi watalasikwa pa wene wa mpanga yonsi ya Izlaeli, iyapita yonsi pyu ku kumulondalonda kuti yamuleme. Lelo lino Davidi uvwa vivyo, nawe aya ku kuyakomenkanya.

⁹ Alanga aina Filisti yatiyafika mpiti yatandika nu kuzanza mu Lwanga lwa Lefaimu.

¹⁰ Acino Davidi auzya Yawe ati, “Uzye mpite kuti nkazanze ivita vya ina Filisti? Uzye mumampela ucimvyo pano yali?” Yawe aasuka ati, “Endi, wemo pita nga nani namakupeela ucimvyo panoyali.”

¹¹ Acino Davidi pamwi na antu yakwe yaya ku Baali Pelazimu, nga kuku kwene akuno acimvya aina Filisti yalya.

¹² Aina Filisti nayo iyasya tuleza twao kuku kwene, nga Davidi apeela ilamulo kuti yatoce.

¹³ Patapisile insita, nupya aina Filisti yaweluluka ku cifoloma cici nu kutandika ukuzanza.

¹⁴ Caleka Davidi auzya kuli Leza, nga Leza nawe amwaasuka ati, “Utezya kuyazanza ukufuma apa ncende kwene ii. Lelo mutale muyalizizye konsikonsi nga lyene muyazanze ulunga ni miti imiku.

¹⁵ Zuwazuwa lino muvwa umutinti wa vita pa tunsonsi twa miku, lyene mutandike ukuzanza, pamulandu wakuti cico calola mukuti Leza watafuma nu kumukolelela ku kukomola aina Filisti.

¹⁶ Davidi acita ndi muno Leza wamupelile ilamulo, nga yakomola ivita vya ina Filisti, nzila yonsi ukufuma ku Gibyoni mpaka ukufika ku Gezeli.

¹⁷ Acino Davidi alumbuka wakwe cimwi umu mpanga ilya yonsi, nga Yawe alenga kuti amu nko zyonsi yamoopa.”