PAMMUJI 83 - KITTA' MATANGKASA'

Pala' doang appala' tulung angngewai musua

¹ Pammujina Asaf: se're kelong-kelong.

² O, Allata'ala, teaKi' a'mereki, teaKi' lappakki limanTa siagang ammantang a'mereki.

³ Ciniki musunTa a'jalloki, sikamma tau birisika ri Katte apparicu ngasengi.

⁴ Appareki rancana cara'de' untu' angngewai ummatTa; assikongkoloki ke'nanga angngewai sikamma tau Kijagaia.

⁵ Nakana ke'nanga, “Umba niancuruki bansa Israel, sollanna nikaluppai arenna ke'nanga.”

⁶ Assamaturu'mi bansa-bansaya, assikongkolo'mi ero' angngewaKi':

⁷ bansa Edom, siagang Ismael, tu Moab siagang Hagar;

⁸ bansa Gebal, Amon, siagang Amalek, bansa Filistea siagang pandudu'na Tirus.

⁹ Kammayatompa Asyur asse're tommi ke'nanga, a'jari mata-matana turunganna Lot.

¹⁰ Gau' kammami ke'nanga tu Midian, sangkamma Sisera siagang Yabin ri Binanga Kisyon,

¹¹ le'baka niancuru' ri Endor, na'jari pupu' ri butta.

¹² Gau'mi pamimpinna ke'nanga sangkamma Oreb siagang Zeeb, patunduki tukoasana ke'nanga sangkamma Zebah siagang Salmuna,

¹³ lanri nakanamo ke'nanga, “Umba naniempoi butta pammantanganNa Allata'ala.”

¹⁴ O, Allata'ala, pasimbung laloi ke'nanga sanrapang limbu'bu', sanrapang rarame niirikanga ri anging.

¹⁵ Sanrapang pepe' angkanreai romanga, rinra pepe' ampamutungai moncong-monconga.

¹⁶ Ondangi ke'nanga siagang anging lompoTa, pabangkai ke'nanga siagang anging puttusutTa.

¹⁷ O, Batara, boli'mi kamma nihina ke'nanga, sollanna naakui ke'nanga kakoasanTa.

¹⁸ Boli'mi kamma tuli nipakasiri' siagang malla' ke'nanga, boli'mi kamma mate lalang hina ke'nanga.

¹⁹ Poro naassengi ke'nanga angkana iKatteji bawang Kaminang Tinggi, O, Batara, makoasaya ri sikontu linoa.