PAMMUJI 67 - KITTA' MATANGKASA'

Kelong sukkuru'

¹ Untu' pamimping pakelong. Nirurungangi ri kacapi. Pammuji.

² Poro Nakamaseang laloki' siagang Nabarakkaki laloki' Allata'ala, poro lammoro' pa'maiki anciniki ngasengki'.

³ O, Allata'ala, poro naasseng laloi erotTa sikontu linoa, siagang nipa'nyata kasalamakkanTa ri sikontu bansaya.

⁴ Poro mammuji bansa-bansaya mae ri Katte, o, Allata'ala, poro appala' sukkuru' ngasengi sikontu bansaya mae ri Katte.

⁵ Poro akkio' rannu ngasengi sikontu bansaya, nakkelong a'rannu-rannu. Saba' iKatte ammarenta siagang adele' na Kirurungang massing-massing bansaya ri lino.

⁶ Poro mammuji bansa-bansaya mae ri Katte, o, Allata'ala, poro appala' sukkuru' ngasengi sikontu bansaya mae ri Katte.

⁷ Angngerammi wassele' buttaya, Allata'ala, le'ba' maki' Nabarakkaki Allata'alata.

⁸ Le'ba' maki' Nabarakkaki Allata'ala; poro nipakalompoi ri sikontu linoa!