PAMMUJI 19 - KITTA' MATANGKASA'

KalompoanNa Batara lalang bate pare'Na siagang hukkunNa

¹ Untu' pamimping pakelong. Pammujina Daud.

KalompoanNa Batara lalang ri bate pare'Na

² Langi' ampa'nyatai kalompoanNa Allata'ala, siagang allaka ancaritai bate pare'Na.

³ Allo se'rea ampabattui mae ri allo ammukoa; bangngi se'rea ancaritai mae ri bangngi poleanga.

⁴ Tena a'bicara yareka akkana-kana, tena sa'ra kalangngerang.

⁵ Mingka pakkio'Na kalangngerangi ri sikontu linoa, pappasanNa ta'rapiki sa'genna cappa'-cappa'na buttaya. Appareki Batara balla' ri langi' untu' mataalloa.

⁶ ammumbai ri bari'basaka sanrapang bunting bura'ne assulu' battu ri kamara'na, sanrapang tubarani eroka ampakaramulai pa'lampanna.

⁷ Najappai langika battu ri cappa' se'rea mange ri cappa' maraenga; tena tanitaba ri bambanna.

HukkunNa Batara

⁸ Anjo hukkunNa Batara sukku' ganna'na, napakabajiki pakkasia'na nyawaya. ParentaNa Batara akkullei nipatappa' assare kacara'dekang mae ri tu biasaya.

⁹ Anjo paratoranNa Batara coco' sikali, appakasannangi pa'mai'. Anjo Napattantua Batara maci'nongi, napa'jari pahangi taua.

¹⁰ Anjo manynyombaya ri Batara bajiki, nigaukang satunggu-tungguna. Anjo hukkunNa Batara tojengi, na adele' ngaseng.

¹¹ Lompoangangi anggaranna HukkunNa Batara na bulaeng ti'no', te'neangangi naje'ne' bani tenaya bengkoro'na.

¹² Yangasenna anjo mappakainga' ri atanTa; sadiai pahala lompoa mange ri tau anturukiai.

¹³ Tena akkulle mangngu'rangi ri kalinguanna; o, Batara Kilappassanga' battu ri kasalang taccokkoa.

¹⁴ Pakabella' battu ri dosa kusangajakkia, teaKi' lappassangngia' nikoasai. Nakuma'jari tena callangku, kuta'lappasa' battu ri gau' sala lompoa.

¹⁵ Poro Kipassiratang kana-kanangku siagang nawa-nawangku ri Katte, o, Batara, pa'la'langangku siagang tumappasulukku!