मर्कुस 9 - माझी1 अनि येसुन होल्काइ बल्-ल्याक,“साँच्चि, मुइ तोराल्काइ बल्छु, इछि ठडाइलाइ मद्दे कोइ-कोइकिन परमेसोरकर राज्य सक्तिसिन आइल नदेखुन्जेलसम्म मर्नाराइ बइनेत।” येसुकर रुप परिबर्तन ( मति १७:१-१३ ; लुका ९:२८-३६ ) 2 हेक्र छ दिनपछि येसुन पत्रुस, याकुब र युहन्नालाइ सँगिन लिके एउटो ढाङ्गो डाँरानाइ जाइले। उछिका आने कोइ पुनि बइरइला, होल्किन हेर्तिन-हेर्तिन येसुकर रुप परिबर्तन हकल्ते। 3 अनि येसुकर लुगा चम्किके इन्खा गोरो हकल्ते कि धर्तिनाइ कुन्नुल्किन पुनि धोइकइ इन्खा गोरो पारइ बइसकत। 4 उछिका एलिया र मोसा देखा पर्ला र येसुसिन कुरो गरइ लाग्ला। 5 ह्य देखिके पत्रुसिन येसुलाइ बलल्ते, “गुरु, हाइ इछि बसइ मजार रल्तिसइ। हाइ इछि तिन्टो छाप्रो बानाउ, एउटो तुइलाइ, एउटो मोसालाइ र एउटो एलियालाइ।” 6 होलत एकदम डाराइलाइ हुदान पत्रुसिन आफिन केति बाज्ल हो था ने बइहकल्ते। 7 अनि एउटो बादल आइके होल्काइ छोप्ल्याक, र बादलबान एउटो इन्खा आवाज आल्ते, “ह्य मोर प्यारो बेटाक हो, तोराल्किन हेइनिन बल्ल मानो।” 8 इन्खा बल्ल सुन्लेसात चेलाल्किन वरिपोरि हेर्तिन येसु बाएक आने कुनुल्काइ पुनि बइदेख्ला। 9 होलत डाँराबान हेठ्ठ झर्तिन खेर येसुन चेलाल्काइ बल्-ल्याक, “मानुसकर बेटाक मर्लबान जिउँते नहकुन्जेल सम्म तोराल्किन आज जे देख्लाछो ह्व कुनुल्काइ जुनबल्खन।” 10 चेलाल्किन ह्य कुरो आफ्ने मननाइ धर्ला, तर आपसनाइ इन्खा कुरो गरइ लाग्ला, “मर्लबान जिउँते हकइ बल्लचाइ केति हो?” 11 अनि चेलाल्किन येसुलाइ सोद्ला, “धर्म-गुरुल्किन किनारे खिरिस्ट भन्दा पइला एलिया ने आइपर्छइ बाज्छत?” 12 येसुन बाज्ले,“साँच्चि ने, एलिया पइला आइके सेब्बे कुरो तयार गरइ पर्छि। तर मानुसकर बेटाकिन धेरइ दुख भोगइ पर्छि र सेब्बाल्कोबान त्यागइ पर्छि बाजिके धर्मसास्तरनाइ लेख्ल बइने र? 13 हेरो, मुइ तोराल्काइ बल्छु, एलिया ता आइसक्लाछ, र होक्र बारेनाइ धर्मसास्तरनाइ लेख्ल अन्सार मान्छेल्किन जे मन लाग्ल होइ गर्ला।” भुत लाग्ल छोडारि ( मति १७:१४-२१ ; लुका ९:३७-४३ ) 14 अनि होलत आने चेलाल्कोनाइ फर्किके आइतिन होल्काइ मान्छेल्को बड्खो भिडिन घेरिधर्लाइ र धर्म-गुरुलत होल्कोसिन बहस गरिधर्लाइ भेट्टाइला। 15 सेब्बाइ भिडकिन येसुलाइ देख्लेसात एकदम अचम्म मान्ला र कुत्तिन जाइके येसुलाइ सेवाढोग गर्ला। 16 अनि येसुन चेलाल्काइ सोद्ल्याक,“तोरा हेल्कोसिन केतिकर बारेनाइ बहस गर्तिन आछो?” 17 मान्छेल्को भिडबान एउटोन बाज्ले, “गुरु, मोर बेटाकलाइ तुइ हक्लनाइ आन्लाछु होलाइ गुँगो पार्नार भुत आत्मा लाग्लाछि। 18 जब ह्यलाइ भुत आत्मान छोप्छि ह्व भुइनाइ पछारिछइ, मुखबान फिँज काड्छइ, दारा किट्छइ र अरठ्ठ पर्छइ। मुइनिन तोर चेलाल्काइ भुत आत्मा निकाल्देओ बाजिके बिन्ति गर्नाइ, तर होल्किन बइसक्ला।” 19 येसुन होल्काइ जबाफ दिल्याक,“ए बिस्वास बइगर्नाराइ पुस्ता, मुइ तोराल्कोसिन कखनसम्म बस्छु र? मुइ तोराल्काइ कत्तासम्म सइधरइ? होलाइ मुइ हक्लनाइ आनो।” 20 होल्किन ह्व छोडारिलाइ येसु हक्लनाइ आन्ला। भुत आत्मान येसुलाइ देख्लेसात ह्व छोडारिलाइ मुर्छा पारिके भुइनाइ पछारल्ते र मुखबान फिँज काड्तिन लडिबडि गरइ लाग्ले। 21 येसुन होक्र ब्वाकलाइ सोदल्ते,“ह्यलाइ कखनसिन इन्खा हक्ल हो?” ब्वाकिन बाज्ले, “स्यान्खोसिन ने। 22 ह्यलाइ भुत आत्मान मारइकर लागि घरि-घरि आगिनाइ र पानिनाइ फ्याङ्छि, यदि तुइनिन सक्छस भने दया गरिके हाइलाइ सायता गर्देउ।” 23 येसुन होलाइ बलल्ते,“यदि तुइनिन सक्छस भने बाजिके किनारे बाज्छस? बिस्वास गर्नारको लागि ता सेब्बे कुरो सम्भब आछि।” 24 ह्य सुन्लेसात छोडारिकर ब्वाकिन साराइतिन बाज्ले, “मुइ बिस्वास गर्छु, मोर बिस्वासलाइ अजइ बाडाइदेउ।” 25 येसुन मान्छेल्को भिड कुत्तिन आइधर्ल देखिके भुत आत्मालाइ हाकार्तिन बलल्ते,“ए गुँगो र बइरा पार्नार आत्मा, मुइ तुइलाइ आग्या गर्छु, ह्व छोडारिबान निस्किके आबे र फेरि कइले ह्व भित्र जुनपोस।” 26 अनि ह्व भुत आत्मा चिच्याइकइ, छोडारिलाइ अरठ्ठ पारिके पछारल्ते र निस्किके जाइले। छोडारि मर्लठि हक्ले, धेराल्किन ता मर्लसइ बाजइ लाग्ला। 27 तर येसुन होक्र हातनाइ आठाइके उठाल्ते, र ह्व जुरुक्क उठ्ले। 28 अनि येसु घरभित्र पस्लपछि चेलाल्किन येसुलाइ सुटुक्क सोद्ला, “हाइनिन चाइ ह्व भुतलाइ किनारे निकालइ बइसक्ले?” 29 येसुन होल्काइ बल्-ल्याक,“इन्खा खालकर भुत आत्मा पार्थनाबान मात्र निकालइ सक्छे, आने केइ उपाय बइने।” येसुन फेरि आफ्ने मर्नार बारेनाइ बाज्ल ( मति १७:२२-२३ ; लुका ९:४३-४५ ) 30 अनि उछ्यान निस्किके होलत गालिल हक्तिन जाइला। ह्य कुरो कुनुल्काइ था जुनहक्दिक बाजिके येसुन चाइतेल। 31 किनारइभने येसुन आफ्ने चेलाल्काइ सिछ्या दितिन रइल। येसुन होल्काइ बल्-ल्याक,“मानुसकर बेटाकलाइ आठाइके मान्छेल्को हातनाइ जिम्मा लाइदिनार आछत, र होल्किन होलाइ मार्नार आछत तर मार्ल तिन दिननाइ फेरि ह्व जिउँते हकिके उठ्नारआछ।” 32 तर चेलाल्किन ह्य कुरो बइबुज्ला र येसुलाइ सोद्नार आँट पुनि बइगर्ला। सेब्बाइ भन्दा बड्खो कुन हो? ( मति १८:१-५ ; लुका ९:४६-४८ ) 33 होलत कफर्नहुम आइपुग्ला, घरभित्र पस्लपछि येसुन चेलाल्काइ सोद्ल्याक,“बाटनाइ आइतिन तोरा केतिकर बारेनाइ हानाथाप गर्तिन रइलो?” 34 तर होलत चुप लाग्ला, किनारइभने बाटनाइ आइतिन होल्किन “हाइ मद्दे सेब्बाइ भन्दा बड्खो कुन हो” बाजिके हानाथाप गर्लाइ रइला। 35 अनि येसु बस्ले र बारे जन चेलाल्काइ बालाइके बल्-ल्याक,“सेब्बाइ भन्दा बड्खो बनइ चाइनारिन सेब्बाइ भन्दा स्यान्खो हकिके सेब्बाल्को सेवा गरइपर्छि।” 36 अनि येसुन एउटो स्यान्खो नानिलाइ होल्को अगाडि आन्ले र कोलानाइ बोकिके होल्काइ बल्-ल्याक, 37 “जुनिन मोर नाउँनाइ ह्य नानिलाइ सुइकार गर्छइ, होइनिन मुइलाइ सुइकार गर्छइ, अनि मुइलाइ सुइकार गर्नारिन, मुइलाइ पाठाइनार ब्वालाइ पुनि सुइकार गर्छइ।” येसु नाउँकर सक्ति ( लुका ९:४९-५० ) 38 युहन्नान येसुलाइ बलल्ते, “गुरु, हाइनिन तोर नाउँनाइ एउटो मानुसिन भुतलत निकालिधर्ल देख्ले। अनि हाइनिन होलाइ रोक्ले, किनारइभने ह्व हाम्रो समुहकर बया।” 39 येसुन बाज्ले,“होलाइ जुनरोको, मोर नाउँनाइ अचम्मकर काम गर्नारिन तुरुन्तइ मोर बिरोदनाइ बइमजार कुरो बइबाज। 40 किनारइभने हाम्रो बिरोद बइगर्नार हाम्रे पछ्यकर हो। 41 साँच्चि मुइ तोराल्काइ बल्छु, कुन्नुल्किन तोराल्काइ खिरिस्टकराइ हो बाजिके मोर नाउँनाइ एक गिलास पानि मात्र खाइ दिल्या भने पुनि होइनिन आफ्ने इनाम बइगुमाक।” पापबान किनिखे बाच्नार? ( मति १८:६-९ ; लुका १७:१-२ ) 42 येसुन बाज्ले,“जुनिन मुइलाइ बिस्वास गर्नाराइ स्याउनाइ मद्दे एउटोलाइ पाप गरइ लाइछइ, होलाइ ता बुरु घेन्टिनाइ बड्खो जाँतो झुन्डाइके समुन्द्रनाइ फ्याङ्देइ मजार हक्छि। 43 यदि तुइलाइ तोर हातिन पाप गरइ लाइस्यास भने होलाइ काटिके फ्याङ्दिक। धेउटे हात लिके नरककर कइले बइनिभ्नार आगिनाइ परइ भन्दा ता डुरे हकिके अजम्बरि जिबन पाइ मजार हो। 44 [नरकनाइ ता न किरालत मर्छत, न आगि ने निभ्छि।] 45 अनि तोर गोडिन तुइलाइ पाप गरइ लाइस्यास भने होलाइ काटिके फ्याङ्दिक। धेउटे गोड हकिके नरकनाइ परइ भन्दा ता खोरन्डे हकिके अजम्बरि जिबन पाइ मजार हो। 46 [नरकनाइ ता न किरालत मर्छत, न आगि ने निभ्छि।] 47 अनि तोर आँखिन तुइलाइ पाप गरइ लाइस्यास भने होलाइ निकालिके फ्याङ्दिक। दुइटो आँखि लिके नरकनाइ परइ भन्दा ता काना हकिके परमेसोरकर राज्यनाइ पसइ मजार हो। 48 नरकनाइ ता न किरालत मर्छत, न आगि ने निभ्छि। 49 “किनारइभने पर्त्येककाइ आगिन ने नुनिलो पार्छि। 50 “नुन असल हो, तर नुनकर स्वाद जाल्ते भने ह्व केतिन फेरि नुनिलो पार्छि? तोरा आफिनाइ हक्ल नुन स्वाद हक्दिक, र आपसनाइ मिलिके बसो।” |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.