मर्कुस 10 - माझीछोडपत्र सम्बन्धि चेतावनि ( मति १९:१-१२ ; लुका १६:१८ ) 1 येसुन ह्व ठउँ छाडिके यहुदिया छेत्र र यर्दन लदिकर पारपटि पुग्ले र मान्छेल्को भिड येसु हक्लनाइ जम्मा हक्ला। अनि येसुन सदइ जिन्खाए होल्काइ सिछ्या देइ लाग्ले। 2 फरिसिलत येसु हक्लनाइ आइके येसुलाइ फसाइनार बिचारिन सोद्ला, “केति साहेकिन आफ्ने बोहेकलाइ छोडपत्र देइ ठिक हो?” 3 येसुन होल्काइ सोद्ल्याक,“मोसान तोराल्काइ केति आग्या दिलाछ?” 4 होल्किन बाज्ला, “एउटो छोडपत्र लेखिके आफ्ने बोहेकलाइ छाड्तिन पुनि हक्छइ बाजिके बाज्लाछ।” 5 येसुन होल्काइ बल्-ल्याक,“तोराल्को मन कठोर हक्ल हुदान मोसान ह्य आग्या दिल हो। 6 तर परमेसोरिन सिरिस्टिकर सुरुबान ने अडे र बेटि गरिके बानाइले। 7 ‘होइहुदान मानुस आफ्ने आमेक-ब्वाकलाइ छाडिके आफ्ने बोहेकसिन बस्छइ, 8 र ह्व दुइटाइ एउटे सरिर हक्छत।’ अब ता होलत दुइटाइ बया तर एउटे सरिर हो। 9 होइहुदान परमेसोरिन जुनलाइ एकसाथ जोड्लाछ, होलाइ मान्छेल्किन जुनछुटाइदिखन।” 10 येसु घरनाइ हक्तिन चेलाल्किन ह्य कुरोकर बारेनाइ येसुलाइ फेरि सोद्ला। 11 येसुन होल्काइ बल्-ल्याक,“जुनिन आफ्ने बोहेकसिन छोडपत्र गरिके अर्किसिन ब्याहा गर्छइ, होइनिन पइलाकरि बोहेककर बिरुद्दनाइ बेभिचार गर्छइ। 12 अनि इन्खाए आफ्ने साहेकसिन छोडपत्र गरिके अर्कोसिन ब्याहा गर्छइ भने, होइनिन पुनि बेभिचार गर्छइ।” छानाछुनिल्काइ येसुकर आसिर्बाद ( मति १९:१३-१५ ; लुका १८:१५-१७ ) 13 येसुन आफ्ने हात धरिके आसिर्बाद दिदिक बाजिके मान्छेल्किन आफ्ने छानाछुनिल्काइ येसु हक्लनाइ आन्ला, तर चेलाल्किन होल्काइ हप्काइल्याक। 14 ह्य देखिके येसु रिसाइले र चेलाल्काइ बल्-ल्याक,“छानाछुनिल्काइ मुइ हक्लनाइ आइ दिखन, होल्काइ जुनरोको, किनारइभने परमेसोरकर राज्य ता इन्खाएल्को लागि हो। 15 साँच्चि मुइ तोराल्काइ बल्छु, जुनिन परमेसोरकर राज्यलाइ छानाछुनिल्किन जिन्खाए बइसुइकार ह्व कइले पुनि ह्व भित्र पसइ बइपाक।” 16 अनि येसुन होल्काइ आफ्ने साथनाइ लिके होलत उप्रान आफ्ने हात धरिके आसिर्बाद दिल्याक। धनि मानुस र परमेसोरकर राज्य ( मति १९:१६-३० ; लुका १८:१८-३० ) 17 येसु बाटनाइ जाइतिन गर्तिन एउटो मानुस कुत्तिन आइके येसुकर अगाडि घोडा टेकिके येसुलाइ सोदल्ते, “हे असल गुरु, अजम्बरि जिबन पाइलाइ मुइनिन केति गरइ पर्छइ?” 18 येसुन होलाइ बलल्ते,“तुइनिन मुइलाइ किनारे असल बल्छस? परमेसोर बाएक आने कोइ पुनि असल बइनेत। 19 तुइलाइ परमेसोरकर आग्या ता था रोइस्यास, मान्छे बइमारइ, बेभिचार बइगरइ, बइचोराइ, झुटो साछि बइदेइ, बइठगइ र आफ्ने आमेर-ब्वारलाइ आदर गरइ।” 20 होइनिन बाज्ले, “गुरु, ह्य सेब्बे आग्या ता मुइनिन छोडारिसिन ने पालन गर्तिन आइलाछु।” 21 येसुन होलाइ हेरल्ते र मया गर्तिन बलल्ते,“तुइनिन अजइ एउटो काम गरइ बाकि आछि। तुइसिन हक्ल सेब्बे सम्पति बेचिके गरिबकाइ बाड्दिखन र तुइनिन स्वर्गनाइ धन पाइनारआछस, अनि आइके मोर पछि लाग।” 22 ह्य कुरो सुनिके ह्व मानुसिन अध्यारो मुख लाइले र दुखित हकिके जाइले, किनारइभने होइसिन धेरइ धन-सम्पति रल्ति। 23 येसुन वरिपोरि हेर्तिन आफ्ने चेलाल्काइ बल्-ल्याक, “धनि मान्छेल्काइ परमेसोरकर राज्यनाइ पसइ एकदम गारो आछि।” 24 येसुकर ह्य कुरो सुनिके चेलाल्काइ अचम्म लाग्ल्याक। तर येसुन फेरि होल्काइ बल्-ल्याक,“नानि हो! धन-सम्पतिनाइ भरोसा गर्नारकाइ परमेसोरकर राज्यनाइ पसइ एकदम गारो आछि। 25 धनि मानुसलाइ परमेसोरकर राज्यनाइ पसइ भन्दा ता बुरु उँटलाइ सियोकर नाथ्रिबान छिरइ सजिलो हक्छि।” 26 ह्य सुनिके अचम्म मान्तिन होल्किन आफि-आफिनाइ बाज्ला, “उन्खा हक्लासिन कुनिन मुक्ति पाइ सक्छइ ते?” 27 येसुन होल्काइ हेर्तिन बल्-ल्याक,“मान्छेल्को लागि ह्य असम्भब आछि, तर परमेसोरकर लागि सम्भब आछि, किनारइभने परमेसोरकर लागि सेब्बे कुरो सम्भब आछि।” 28 अनि पत्रुसिन बाज्ले, “हेर, हाइनिन ता सेब्बे कुरो छाडिके तोर पछि लाग्लाछे।” 29 येसुन होल्काइ बल्-ल्याक,“साँच्चि मुइ तोराल्काइ बल्छु, जुनिन मोर लागि र सुसमचारकर लागि आफ्ने आमा-ब्वा, बेटाक-बेटेक, दाजि-भाइ, दिदि-बइनि, घरबार, जग्गा-जमिन छाड्छइ, 30 होइनिन सतावट र दुखकर साथनाइ सय गुना आमा-ब्वा, बेटाक-बेटेक, दाजि-भाइ, दिदि-बइनि, घरबार, जग्गा-जमिन पाइनार आछ, अनि आइनार युगनाइ अजम्बरि जिबन पाइनार आछ। 31 तर अखन पइला हक्नाराइ धेराइ पछि हक्नार आछत र अखन पछि हक्नाराइ धेराइ पइला हक्नार आछत।” तेस्रो पल्ट येसुन आफि मर्नार बारेनाइ बाज्ल ( मति २०:१७-१९ ; लुका १८:३१-३३ ) 32 येसु आफ्ने चेलाल्कोसिन यरुसलेम जाइतिन रइल। येसु चेलाल्को अगि-अगि हिनिधर्ल रइल। चेलालत छक्क पर्लाइ रइला र पछि-पछि आइनाराइ आने मान्छेलत चाइ डाराइधर्लाइ रइला। येसुन बारेउटाइ चेलाल्काइ फेरि अर्केपटि लाकाइके आफि उप्रान आइपर्नार दुखकर बारेनाइ बल्-ल्याक, 33 “सुनो, हाइ यरुसलेम जाइतिन आछे। उछिका मानुसकर बेटाकलाइ मुख्य पुजारि र धर्म-गुरुल्को हातनाइ सुम्पिनार आछत, र होल्किन होलाइ मारइ पर्छइ बाजिके आने जातिकराइ मान्छेल्काइ जिम्मा दिनार आछत। 34 होल्किन होलाइ गिल्ला गर्नारआछत, थुक्नारआछत, कोर्रा लाइनारआछत र मार्नारआछत, तर तिन दिननाइ ह्व मर्लबान जिउँते हकिके उठ्नारआछ।” याकुब र युहन्नाकर बिन्ति ( मति २०:२०-२८ ) 35 ह्व पछि जब्दियाराइ दुइटाइ बेटाक याकुब र युहन्ना येसु हक्लनाइ आइके बिन्ति गर्तिन बाज्ला, “गुरु, हाइ तुइसिन जे माङ्छे ह्व तुइनिन पुरा गर्देउ बाजिके हाइ चाइछे।” 36 येसुन होल्काइ बल्-ल्याक,“मुइ तोराल्को लागि केति गर्दिल चाइछो?” 37 होल्किन येसुलाइ बल्ला, “तोर महिमित राज्यनाइ हाइ मद्दे एउटो तोर दाइने पटि र अर्को देब्रे पटि बसइ पाइनार अनुमति देउ।” 38 तर येसुन होल्काइ बल्-ल्याक,“तोराल्किन केति माङ्तिन आछो ह्व तोराल्काइ था बइन्या। केति मुइनिन भोगइ पर्नार जिन्खाए कस्ट तोरा भोगइ सक्छो? अथवा जुन दुखर बप्तिस्मा मुइनिन लिलाछु ह्व तोराल्किन लेइ सक्छो?” 39 होल्किन बाज्ला, “हाइ सक्छे।” येसुन होल्काइ बल्-ल्याक,“जुन्टो कस्ट मुइनिन भोग्छु ह्व तोरा पुनि भोग्नार आछो, र जुन्टो बप्तिस्मा मुइनिन लिछु ह्व तोरा पुनि लिनार आछो। 40 तर मोर दाइने र देब्रे पटि बसइ चाइ मुइनिन दिनार बया। ह्य ठउँ ता परमेसोरिन जुनकर लागि तयार पार्लाछ, होल्के लागि हक्नार आछि।” 41 ह्य सुनिके दसेउटाइ चेलालत याकुब र युहन्नासिन रिसाइला। 42 ह्व पछि येसुन चेलाल्काइ आफि हक्लनाइ बालाइके बल्-ल्याक,“तोराल्काइ था रोइस्या, आने जाति उप्रान सासन गर्नारकिन आफ्ने मनलाग्दि सासन चालाइछत। र हाकिमकिन होलत उप्रान अधिकार जमाइछत। 43 तर तोराल्कोनाइ चाइ उन्खा जुनहक्दिक। तोरा मद्दे जुन बड्खो हकइ चाइछइ ह्व सेब्बाल्को सेबक हकइपर्छइ। 44 र जुन सेब्बाइ भन्दा पइलो हकइ चाइछइ ह्व सेब्बाल्को नोकर हकइपर्छइ। 45 किनारइभने मानुसकर बेटाक सेवा पाइ बया, तर सेवा गरइ र धेराल्काइ छुट्कारा देइ बाजिके आफ्ने परान देइ आइल हो।” अन्धा बारतिमइ ( मति २०:२९-३४ ; लुका १८:३४-४३ ) 46 येसु चेलाल्कोसिन यरिहो सहरनाइ आइपुग्ले। येसु आफ्ने चेलालत र बड्खो मान्छेल्को भिडसहित यरिहो सहर छाडिके जाइतिन गर्तिन बाटकर छेउनाइ तिमइकर बेटाक बारतिमइ बाज्नार अन्धा भिक मागिकइ बसिधर्ल रइल। 47 जब होइनिन नासरतकर येसु जाइतिन आछ बाजिके सुन्ले, तब होइनिन साराइतिन बाज्ले, “हे येसु, दाउदकर बेटाक, मुइलाइ दया गर।” 48 अनि धेराल्किन होलाइ चुप लाग बाजिके हाकार्ला। तर ह्व झन बड्खो सोरिन साराइले, “हे दाउदकर बेटाक, मुइलाइ दया गर।” 49 तब येसु टक्क अडिले र बाज्ले,“होलाइ बालाओ।” अनि होल्किन अन्धालाइ बालाइके बल्ला, “तुइ खुसि हक, छिटो आबे, होइनिन तुइलाइ बालाइतिन आछ।” 50 होइनिन आफ्ने बर्को फ्याकिकइ जुरुक्क उठ्ले र येसु हक्लनाइ आइले। 51 येसुन होलाइ बलल्ते,“तुइ केति चाइछस, मुइ तोर लागि केति गर्दिउ?” ह्व अन्धान बाज्ले, “रब्बि, मुइ देखइ चाइछु।” 52 अनि येसुन होलाइ बलल्ते,“तोर बिस्वासिन तुइ देख्नार हक्लाछस, अब तुइ जा।” तब तुरुन्तइ ह्व देख्नार हक्ले र येसुकर पछि-पछि लाग्ले। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.