मर्कुस 1 - माझीबप्तिस्मा दिनार युहन्नाकर पर्चार ( मति ३:१-१२ ; लुका ३:१-१८ ; युहन्ना १:१९-२८ ) 1 परमेसोरकर बेटाक येसु खिरिस्टकर सुसमचार इत्तिके सुरु हक्छि। 2 परमेसोरिन बाज्ल कुरो यसइया अगमबक्ताकर किताबनाइ इनिखे लेख्लाछ, “हेर, मुइ मोर दुतलाइ तोर अगि-अगि पाठाइछु, होइनिन तोर बाट तयार पार्नारआछ। 3 केइ बइहक्नार उजाड ठउँनाइ एउटोन बड्खो सोरिन इत्तिके बाज्तिन आछ, ‘पर्भु आइनार बाट तयार पारो, ह्व हिन्नार बाटलत सोजो बानाओ।’” 4 बप्तिस्मा दिनार युहन्ना केइ बइहक्नार उजाड ठउँनाइ देखा पर्ले र मान्छेल्काइ इत्तिके बाज्तिन पर्चार गर्ले, “तोराल्किन आफ्ने पाप मानिलिके छाडो र बप्तिस्मा लिओ अनि परमेसोरिन तोराल्को पाप छेमा गर्नार आछ।” 5 अनि यहुदिया छेत्र र यरुसलेमकराइ सेब्बाइ मान्छेलत युहन्ना हक्लनाइ आइला। र आ-आफ्ने पाप मानिलिके युहन्नाबान यर्दन लदिनाइ बप्तिस्मा लिला। 6 युहन्नान उँटकर रउँबान बुन्ल लुगा लाइतेल, र कम्मरनाइ छालाकर पट्का बाँन्तेल अनि सलह र बन मह खाइतेल। 7 होइनिन मान्छेल्काइ इत्तिके पर्चार गर्ले, “मुइभन्दा पछाडि एउटो आइतिन आछ, ह्व मुइ भन्दा सक्तिसालि आछ। मुइ ता निउरिकइ होक्र जुत्ताकर तुना फुकाइनार लाएककर पुनि बइने। 8 मुइ तोराल्काइ पानिन बप्तिस्मा दिलाछु, तर होइनिन तोराल्काइ पबित्र आत्मान बप्तिस्मा दिनारआछ।” येसुकर बप्तिस्मा र परिछ्या ( मति ३:१३-१७ ; ४:१-११ ; लुका ३:२१-२२ ; ४:१-१३ ) 9 ह्व दिननाइ येसु गालिल छेत्रकर नासरतबान आइले र युहन्नाबान यर्दन लदिनाइ बप्तिस्मा लिले। 10 येसु पानिबान बाइर निस्किलेसात स्वर्ग उघ्रिल र पबित्र आत्मालाइ ढुकुरकर रुपनाइ आफिउप्रान आइतिन गर्ल देख्ले। 11 अनि स्वर्गबान इन्खा आवाज आल्ते, “तुइ मोर प्यारो बेटाक हो, मुइ तुइसिन एकदम खुसि आछु।” 12 ह्व पछि पबित्र आत्मान येसुलाइ तुरुन्तइ केइ बइहक्नार उजाड ठउँनाइ लाकाल्ते। 13 सइतानिन उछिका येसुलाइ चालिस दिनसम्म परिछ्या गरल्ते। उछिका बनकराइ जनाबरलत पुनि रइला र स्वर्गदुतकिन होक्र सेवा-टहल गर्ला। चेलाल्को बोलावट ( मति ४:१८-२२ ; लुका ५:१-११ ; युहन्ना १:३५-४२ ) 14 युहन्ना थुनानाइ पर्लपछि परमेसोरकर सुसमचार पर्चार गर्तिन येसु गालिलनाइ आइले। 15 येसुन बाज्ले,“समय पुरा हक्लाछि, र परमेसोरकर राज्य नजिक आइलाछि। आफ्ने पाप मानिलिके छाडो र सुसमचारनाइ बिस्वास गरो।” 16 येसु गालिल तालकर छेउ-छेउ हकिके जाइतिन गर्तिन सिमोन र होक्र भाएक अन्दिरियासलाइ तालनाइ जाल खेलिधर्ल देख्ले। किनारइभने होलत जालहारि रइला। 17 येसुन होल्काइ बल्-ल्याक,“मोर पछि लागो, मुइ तोराल्काइ मान्छेल्को जालहारि बानाइनारआछु।” 18 अनि होलत उत्तिने खेर आफ्ने जाल छाडिके येसुकर पछि लाग्ला। 19 अनि अलि ओभर जाइल पछि येसुन जब्दियाराइ दुइभाइ बेटाकलत याकुब र युहन्नालाइ देख्ले। होलत लाउनाइ बसिके जाल टालिधर्लाइ रइला। 20 येसुन होल्काइ झ्वाट्टइ बालाइल्याक। अनि होल्किन आफ्ने ब्वाक जब्दियालाइ काम गर्नारकोसिन लाउनाइ छाडिके येसुकर पछि लाग्ला। येसुन भुत आत्मा लाग्ल मानुसलाइ बिसेक पार्ल ( लुका ४:३१-३७ ) 21 येसु आफ्ने चेलाल्कोसिन कफर्नहुम सहरनाइ जाइले, र बिस्राम-दिननाइ सभाघरका जाइके सिछ्या देइ लाग्ले। 22 येसुकर सिछ्या सुनिके सेब्बाइ मान्छेलत छक्क पर्ला, किनारइभने येसुन आने धर्म-गुरुल्किन सिकाइल जिन्खाए बया, तर अधिकार सहित सिकाइले। 23 होइ बेला सभाघरभित्र एउटो भुत आत्मा लाग्ल मानुस पुनि रइल। 24 होइनिन साराइतिन बाज्ले, “हे नासरतकर येसु, तुइनिन हाइलाइ केति गरइ लाग्ल? केति तुइ हाइलाइ नस्ट गरइ आइल हो? मुइ तुइलाइ चिन्छु, तुइ परमेसोरिन पाठाइल पबित्र जन हो।” 25 तर येसुन भुत आत्मालाइ हाकार्तिन बलल्ते,“चुप लाग, र ह्व मानुसबान निस्कि जा।” 26 अनि भुत आत्मान ह्व मानुसलाइ लछारपछार पारिके बड्खो सोरिन चिच्याइतिन ह्व मानुसबान निस्किके जाइले। 27 ह्य देखिके सेब्बाइ अचम्म मान्ला, र आफि-आफिनाइ सोदासोद गरइ लाग्ला, “ह्य केति हो? ह्य ता नयाँ सिछ्या रल्तिसइ। हेइनिन ता अधिकार सहित भुत आत्माल्काइ आग्या दिस्याक, र होल्किन हेक्र आग्या मान्छत।” 28 अनि छिट्टइ येसुकर चर्चा गालिलकर चारेपटि फइलल्ते। येसुन धेराइ बिरामिल्काइ बिसेक पार्ल ( मति ८:१४-१७ ; लुका ४:३८-४१ ) 29 येसु सभाघरबान निस्किलेसात याकुब र युहन्नासिन सिमोन र अन्दिरियासकर घरनाइ जाइले। 30 ह्व बेला सिमोनकरि सासेक जोरोन थाला पर्लि रइलि र घरका हक्नारकिन ह्य कुरो येसुलाइ आइलेसात सुनाइला। 31 येसु बिरामिकर नजिक जाइके हातनाइ आठाइके उठाल्ते र होलाइ जोरोन छाडिहालल्ते। अनि होइनिन होल्को सेवा-सत्कार गरइ लाग्लि। 32 घाम अस्ताइल पछि ह्व दिन साँझनाइ मान्छेल्किन रोगि बिरामिलत र भुत लाग्लाइ सेब्बाल्काइ येसु हक्लनाइ आन्ला। 33 ह्व सहरकराइ सेब्बाइ मान्छेलत घरकर चात्रानाइ जम्मा हक्लाइ रइला। 34 येसुन धेरे किसिमकर रोगिन सताइलाइ सेब्बाइ बिरामिकाइ बिसेक पार्ल्याक अनि धेराइ मान्छेल्कोबान भुतकाइ निकाल्दिल्याक। तर भुतकिन येसुलाइ चिन्ल हुदान येसुन होल्काइ बाजइ बइदिल्याक। गालिलनाइ येसुकर पर्चार ( लुका ४:४२-४४ ) 35 अर्को दिन उज्यालो हकइ भन्दा अगाडि येसु उठिके एकान्त ठउँनाइ जाइके पार्थना गरइ लाग्ले। 36 सिमोन र होक्र साथेकलत मिलिके येसुलाइ हेरइ जाइला। 37 येसुलाइ भेट्टाइल पछि होल्किन बाज्ला, “सेब्बाल्किन तुइलाइ हेरिधर्लाछत।” 38 ह्य सुनिके येसुन बाज्ले,“हाइ वरिपोरिकर आने गाउँनाइ जिउँ र उछि पुनि मुइ सुसमचार सुनाइ पर्छइ। किनारइभने मुइ हेइ कामकर लागि आइल हो।” 39 अनि येसु यहुदि सभाघरनाइ सिछ्या दितिन र भुतकाइ निकाल्तिन गालिल छेत्रभरि घुम्ले। कुस्ठ रोग लाग्ल मानुस बिसेक हक्ल ( मति ८:१-४ ; लुका ५:१२-१६ ) 40 एउटो कुस्ठ रोग लाग्ल मानुस आइके येसुकर अगाडि घोडा टेकिके बिन्ति गर्तिन बाज्ले, “तुइनिन चाइलइ भने मुइलाइ बिसेक पारइ सक्छस।” 41 ह्य सुनिके येसुकर मन दयान भरल्ते र आफ्ने हात ह्व उप्रान धर्तिन बाज्ले,“मुइ चाइछु, तुइ बिसेक हकिहाल।” 42 उत्तिने खेर होक्र कुस्ठ रोग हटल्ते र ह्व बिसेक हकिहाल्ले। 43 अनि येसुन होलाइ कडा आग्या दिके इत्तिके बलिके पाठाल्ते, 44 “हेर, तुइ बिसेक हक्ल कुरो कुनुल्काइ जुनबल्खन, तर पुजारिकर उछि जाइके देखाउ। अनि तुइ बिसेक हक्ल कुरो मान्छेल्काइ देखाइकर लागि मोसान दिल नियम अन्सार पर्मानकर लागि बलि चाराउ।” 45 अनि ह्व निस्किके जाइले, र आफि बिसेक हक्ल कुरो सेब्बेपटि सुनाइ लाग्ले। होइहुदान येसु फेरि खुल्लमखुल्ला सहरनाइ पोसइ बइसक्ले र एकान्त ठउँनाइ बसइ लाग्ले। तर मान्छेलत चारेपट्यान येसु हक्लनाइ आइला। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.