लुका 6 - माझीबिस्राम-दिनकर पर्भु ( मति १२:१-८ ; मर्कुस २:२३-२८ ) 1 येसु बिस्राम-दिननाइ गहुँ हक्ल खेतकर बाट हकिके जाइतिन रइल। येसुकर चेलाल्किन गहुँकर बाला टुनिकइ हातिन माड्तिन खाइ लाग्ला। 2 ह्य देखिके फरिसिल्किन चेलाल्काइ बल्-ल्याक, “बिस्राम-दिननाइ गरइ बइहक्नार काम तोरा किनारइ गर्छो?” 3 येसुन होल्काइ बल्-ल्याक, “दाउद राजा र होक्र साथेकलत भोकाइल बेलानाइ होइनिन केति गर्ल रइल? केति तोराल्किन पढ्लाइ बइने? 4 होइनिन ता परमेसोरकर मन्दिरभित्र पसिके परमेसोरलाइ चाराइल पिठो साथेककोसिन मिलिके खाइले। जब कि परमेसोरकर नियम अन्सार पुजारिबाएक आने कुन्नुल्किन पुनि ह्व पिठो खाइ बइहक्तेल। तर दाउदिन ता आफि झिकिकइ खाइले र साथेककाइ पुनि दिल्याक।” 5 फेरि येसुन होल्काइ बल्-ल्याक, “मानुसकर बेटाक बिस्राम-दिनकर पुनि पर्भु हो।” येसुन हात सुक्ल मानुसलाइ सद्दे पार्ल ( मति १२:९-१४ ; मर्कुस ३:१-६ ) 6 फेरि अर्को एक बिस्राम-दिननाइ येसुन सभाघरनाइ जाइके सिछ्या दिल्याक। उछि दाइने हात सुक्ल एउटो मानुस पुनि रइल। 7 धर्म-गुरुलत र फरिसिल्किन येसुलाइ दोस लाइनार कुरो हेरिधर्लाइ रइला। होइ हुदान होल्किन येसुन ह्व मानुसकर हात बिस्राम-दिननाइ बिसेक पार्छइ कि बाजिके हेर्तिन रइला। 8 तर होल्को मनकर कुरो था पाइके येसुन हात सुक्ल मानुसलाइ बलल्ते, “तुइ उठिके इतइ आबे।” झट्टइ उठिके ह्व अगाडि जाइले। 9 येसुन होल्काइ बल्-ल्याक, “मुइ तोराल्काइ एउटो कुरो सोद्छु, बिस्राम-दिननाइ केति गरइ ठिक आछि? मजार गरइ कि बइमजार गरइ? जिबन बाचाइ कि मारइ?” 10 अनि येसुन चारेदिस सेब्बाल्काइ हेर्तिन ह्व मानुसलाइ बलल्ते, “तोर हात तन्काउ।” होइनिन हात तन्काइले र होक्र हात सद्दे हकिहालल्ते। 11 ह्य देखिके फरिसिलत र धर्म-गुरुलत रिसिन चुर हक्ला र येसुलाइ अब केति गर्नार हो बाजिके सल्ला गरइ लाग्ला। येसुन बारुटाकाइ चेला छान्ल ( मति १०:१-४ ; मर्कुस ३:१३-१९ ) 12 एक दिन येसु डाँरानाइ जाइके रातभोरि परमेसोरसिन पार्थना गर्ले। 13 ब्यान हक्ल पछि येसुन आफ्ने चेलाल्काइ बालाइल्याक र होलत मद्देबान बारुटाकाइ आफ्ने चेला छान्ले र होल्काइ पेरित नाउँ दिल्याक। 14 होलत हेइलत हो, सिमोन, जुन्लाइ येसुन पत्रुस नाउँ पुनि धर्दिल्ते, सिमोनकर भाएक अन्दिरियास, याकुब, युहन्ना, फिलिप, बारथोलोमाइ, 15 मति, थोमा, अल्फयसकर बेटाक याकुब, देसभक्त बल्ल सिमोन 16 र याकुबकर बेटाक यहुदा अनि यहुदा इस्करियोत, जुन पछि जाइके धोकेबाज हक्ले। येसुन धेराइ मान्छेल्काइ बिसेक पार्ल ( मति ४:२३-२५ ) 17 येसु चेलाल्कोसिन डाँराबान झरिके होलत एउटो सम्म ठउँनाइ आइपुग्ला। उछि यहुदिया छेत्रकर सेब्बेपट्यान, यरुसलेम सहरबान अनि समुन्द्रकर छेउनाइ पर्नार टुरोस र सिदोन सहरबान धेराइ मान्छेलत घुइँचो लागिकइ आइला। 18 होलत येसुकर सिछ्या सुनइ र आ-आफ्ने रोगबान बिसेक हकइ आइलाइ रइला। भुत आत्मान सताइलाइ मान्छेलत पुनि बिसेक हक्ला। 19 भिडकराइ सेब्बाइ मान्छेल्किन येसुलाइ छुइ हेर्तिन रइला, किनारइभने येसुबान बिसेक पार्नार सक्ति निस्किधर्ल रल्ति, अनि सेब्बाइ बिसेक हक्तेला। येसुन दिल अर्ति ( मति ५:१-१२ ) 20 येसुन आफ्ने चेलाल्काइ हेर्तिन बल्-ल्याक, हे गरिब हो, तोरा आसिस पाइनारआछो, किनारइभने परमेसोरकर राज्य तोराल्के लागि हो। 21 अखन भोकाइनाराइ हो, तोरा आसिस पाइनारआछो, किनारइभने तोरा आघाइनारआछो। अखन कान्नाराइ हो, तोरा आसिस पाइनारआछो, किनारइभने तोरा पछि हाँस्नारआछो। 22 मानुसकर बेटाकलाइ पछ्याइल हुदान मान्छेल्किन तोराल्काइ हेला गर्छत, बिजेत गर्छत, झुटो दोस लाइके सताइछत र समाजबान बहिस्कार गर्छत तर पुनि तोराल्किन आसिस पाइनारआछो। 23 ह्व बेला खुसि हको, र नाच्तिन रामाओ, किनारइभने तोराल्को लागि स्वर्गनाइ बड्खो इनाम आछि। होल्को पुर्खाल्किन पुनि अगमबक्ताल्काइ उन्खाए गरिके सताइलाइ रइला। 24 तर धिक्कार, अखन धनि हक्नाराइ हो, किनारइभने तोराल्किन सुखकर जिबन बिताइसक्लो। 25 धिक्कार, अखन आघाइनाराइ हो, किनारइभने तोरा भोक्ले हक्नारआछो। धिक्कार, अखन हाँस्नाराइ हो, किनारइभने तोरा बिलाप गर्तिन कान्नारआछो। 26 धिक्कार, अखन सेब्बाइ मान्छेल्को पर्सन्सा पाइनाराइ हो, किनारइभने इन्खा पर्सन्सा ता होल्को पुर्खाल्किन पुनि झुटो अगमबक्ताल्काइ गर्लाइ रइला। सतुरकाइ पुनि मया गरइपर्छइ ( मति ५:३८-४८ ; ७:१२ ) 27 “तर मोर सिछ्या सुन्नाराइ तोराल्काइ मुइ बल्छु, सतुरकाइ मया गरो अनि आफिलाइ घिर्ना गर्नारकाइ मजार गरो। 28 तोराल्काइ सराप्नारकाइ आसिर्बाद दिखन, तोराल्काइ बइमजार गर्नारको लागि पार्थना गरो। 29 यदि कुन्नुल्किन तुइलाइ एउटो गालानाइ हिर्काइछइ भने अर्को गाला पुनि थाप्दिक। तोर बर्को खोसिकइ लाकाइनारलाइ भोटो पुनि लाकाइ दिक। 30 तुइसिन माङ्नार सेब्बाल्काइ दिखन, र खोसिकइ लाकाइनारसिन फेरि जुनमाग। 31 आनेल्किन तोराल्काइ जे गर्ल चाइछो, तोराल्किन पुनि आनेल्काइ उन्खाए गरो। 32 “तोराल्काइ मया गर्नारकाइ मात्र मया गर्छो भने तोराल्किन केति बड्खो काम गर्लो र? किनारइभने पापिल्किन पुनि आफिलाइ मया गर्नारकाइ मया गर्छत। 33 फेरि आफिलाइ मजार गर्नारकाइ मात्र मजार गर्छो भने तोराल्किन केति बड्खो काम गर्लो र? इन्खा ता पापिल्किन पुनि गर्छत। 34 यदि तिरइ सक्नारलाइ मात्र रिन दिछो भने तोराल्किन केति बड्खो काम गर्लो र? पापिल्किन पुनि तिरइ सक्नारकाइ रिन दिछत। 35 तर आफ्ने सतुरलाइ मया गरो, सेब्बाल्काइ मजार गरो र रिन माङ्नारकाइ फिर्ता पाइनार आस नधरिकइ रिन दिखन। उन्खाए गर्लो भने तोराल्किन बड्खो इनाम पाइनारआछो र महान परमेसोरकर सन्तान हक्छो। किनारइभने परमेसोरिन ता बइगुनि र दुस्टल्काइ पुनि दया गर्छइ। 36 जिन्खाए तोराल्को परमेसोर ब्वा दयालु आछ, उन्खाए तोरा पुनि दयालु हको। आनेल्काइ दोस जुनलाओ ( मति ७:१-५ ) 37 “आनेल्को न्याय जुनगरो र तोराल्को पुनि न्याय गर्नार बइने। आनेल्काइ दोस जुन लाओ र तोराल्काइ पुनि दोस लाइनार बइने। आनेल्काइ छेमा दिखन अनि तोराल्काइ पुनि छेमा दिनारआछ। 38 दिखन र तोराल्किन पुनि पाइनारआछो। परमेसोरिन ता खाँदि-खाँदि झुसि पारिके हर्कुन्जेल दिनारआछ। जुन नापिन तोराल्किन आनेल्काइ दिछो, होइ नापिन तोराल्किन पुनि पाइनारआछो।” 39 अनि येसुन होल्काइ इन्खा उखान बल्-ल्याक, “केति अन्धान-अन्धालाइ डोराइ सक्छइ र? यदि डोराल्ते भने पुनि होलत धेउटाइ खाल्टोनाइ पर्छत। 40 कुनइ पुनि चेला आफ्ने गुरु भन्दा बड्खो बइहक, तर सेब्बे सिकिसक्ल पछि ह्व गुरु जिन्खाए हक्नारआछ। 41 “आफ्ने आँखिनाइ हक्ल मुडा बइदेख्नारिन किनिखे आनेको आँखिकर कसिङ्गर देख्छइ? 42 आफ्ने आँखिकर मुडा बइदेख्नारिन किनिखे आनेको आँखिकर कसिङ्गर झिक्दिछु बाजइ सक्छइ, ए कपटि, पइला आफ्ने आँखिबान मुडा निकाल अनि आनेको आँखिकर कसिङ्गर छर्लङ्ग देख्छस र निकालइ सक्छस। गाछ र होक्र फल ( मति ७:१६-२० ; १२:३३-३५ ) 43 “मजार गाछिन बइमजार फल बइफलाक, न ता बइमजार गाछिन मजार फल फलाइ सक्छइ। 44 हरेक गाछ होक्र फलबान चिन्छे। काँटो घारिबान नेभारा बइटुनत न ता अङ्गुर ने बटल्छत। 45 मजार मानुसिन आफ्ने हिर्दयनाइ हक्ल मजारे कुरो ने गर्छइ। बइमजार मानुसिन आफ्ने हिर्दयनाइ हक्ल बइमजारे कुरो ने गर्छइ। किनारइभने जे हिर्दयनाइ आछि, होइ कुरो मानुसिन बाज्छइ। दुइ किसिमकर जग ( मति ७:२४-२७ ) 46 “मुइ बल्ल कुरो तोराल्किन बइमानो भने किनारइ तोराल्किन मुइलाइ ‘पर्भु, पर्भु’ बाज्छो? 47 मुइ हक्लनाइ आइके मोर कुरो सुन्नार र मुइ बल्ल कुरो मान्नार मानुस चाइ किन्खा हक्छइ, मुइ तोराल्काइ बल्छु। 48 ह्व एउटो घर बानाइनार मानुसजिन्खाए हो, जुनिन गइरो जग खनिके आफ्ने घर चट्टानउप्रान बानाइले। अनि पानि परिके बाढि आल्ते र ह्व घरनाइ ठोकल्ते तर ह्व घर चट्टान उप्रान बानाइल हुदान भत्काइ बइसकल्ते। 49 तर जुनिन मोर सिछ्या सुनिके बइमान ह्व इन्खा मानुस हो, जुनिन जग नखनिके घर बानाइले। अनि बड्खो पानि परल्ते, बाढि आल्ते र ह्व घरनाइ ठोकल्ते, अनि ह्व घर ढल्कल्ते र सर्बनास हकल्ते।” |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.