लुका 5 - माझीयेसुकर पइलो चेलालत ( मति ४:१८-२२ ; मर्कुस १:१६-२० ) 1 एक दिन येसु गनेसरेत तालकर छेउनाइ ठडाइधर्ल रइल। मान्छेल्को भिड परमेसोरकर सिछ्या सुनइलाइ ठेलाठेल गरिधर्लाइ रइला। 2 येसुन तालकर छेउनाइ दुइटो लाउ देख्ले। माछ मार्नाराइ लाउकर छेउनाइ जाल धोइ धर्लाइ रइला। 3 एउटो लाउचाइ सिमोनकर रल्ति। येसु होइ लाउनाइ चडिके सिमोनलाइ लाउ अलि ओभ्रउने पेलाइ लाल्ते र बसिके मान्छेल्को भिडकाइ सिछ्या देइ लाग्ले। 4 सिछ्या दिसक्लपछि येसुन सिमोनलाइ बलल्ते, “लाउ गइरो दिसउँने लाकाइके माछ मारइलाइ जाल हिर्काउ।” 5 ह्य सुनिके सिमोनिन येसुलाइ बलल्ते, “गुरु, हाइनिन रातभोरि जाल खेलाइले, एउटि पुनि माछ बइपाइले। तर तुइनिन बल्छस भने मुइ जाल हिकाइछु।” 6 जाल हिर्काइतिन यत्ता धेरइ माछ पर्ला कि जाल ने फाट्तेठि हकल्ते। 7 अनि होल्किन अर्को लाउनाइ हक्लाइ साथेकख्यानकाइ इसारा गरिके सघाइ बालाइल्याक। होलत आइके माछ झिकइ थाल्ला। झिक्तिन-झिक्तिन धेउटो लाउ माछन भरिके लाउ ने डुब्तेठि हकल्ते। 8 ह्य देखिके सिमोन पत्रुसिन येसुकर अगाडि घोप्टो परिके बाज्ले, “हे पर्भु, मुइ पापि आछु, मुइबान बद्दुर बस!” 9 यत्रा धेरइ माछ पर्ल देखिके सिमोन र होक्र साथेकलत छक्क पर्ला। 10 र सिमोनसिन मिलिके काम गर्नाराइ जब्दियाकर बेटाकलत याकुब र युहन्ना पुनि छक्क पर्ला। येसुन सिमोनलाइ बलल्ते, “जुनडाराउ, अबसिन तुइ माछ बया, तर मान्छेल्काइ आठाइके परमेसोरकर राज्यनाइ आन्नारआछस।” 11 ह्य सुनिके होल्किन लाउ डेङ्गानाइ आन्ला अनि सेब्बे कुरो छाडिके येसुकर पछि लाग्ला। येसुन कुस्ठरोगिलाइ बिसेक पार्ल ( मति ८:१-४ ; मर्कुस १:४०-४५ ) 12 एक दिन येसु एउटो सहरनाइ रइल। ह्व सहरनाइ कुस्ठरोग लाग्ल एउटो मानुस रइल। येसुलाइ देखिके ह्व कुस्ठरोग लाग्ल मानुसिन येसुकर अगाडि घोप्टो परिके इत्तिके बिन्ति गर्ले, “गुरु, तुइनिन चाइलइ भने मुइलाइ बिसेक पारइ सक्छस।” 13 येसुन ह्वउप्रान हात धरिके बाज्ले, “मुइ चाइछु, तुइ बिसेक हक।” र उत्तिने खेर होक्र कुस्ठ रोग बिसेक हकिहालल्ते। 14 येसुन होलाइ आग्या दितिन बलल्ते, “ह्य कुरो कुनुल्काइ जुन्बल्खन, तर पुजारिकर उछि जाइके तुइ बिसेक हक्ल आफिलाइ देखाउ। मोसान आग्या गर्ल जिन्खाए बलि चाराइके सेब्बाल्काइ तुइ बिसेक हक्ल पर्मान दिक।” 15 ह्व दिनसिन येसुकर चर्चा झन फइलितिन जाल्ते अनि बड्खो मान्छेल्को भिड येसुकर सिछ्या सुनइ र आफ्ने रोगबान बिसेक हकइ आइ थाल्ला। 16 तर येसुचाइ एकान्त ठउँनाइ पार्थना गरइ जाइतेल। येसुन पछ्यघातिलाइ बिसेक पार्ल ( मति ९:१-८ ; मर्कुस २:१-१२ ) 17 एक दिन येसुन घर भित्र मान्छेल्काइ सिछ्या दिधर्ल रइल। केइ धर्म-गुरुलत र फरिसिलत पुनि येसुकर छेउनाइ बसिधर्लाइ रइला। होलत चाइ गालिल र यहुदिया छेत्रकर सेब्बे गाउँ र यरुसलेम सहरबान पुनि आइलाइ रइला। येसुसिन बिरामिल्काइ बिसेक पार्नार परमपर्भुकर सक्ति रल्ति। 18 केइ मान्छेल्किन एउटो पछ्यघाति बिरामिलाइ ओछ्यानेसुदा बोकिके आन्ला। होल्किन होलाइ घरभित्र येसुकर अगाडि पुराइ आँट गर्ला। 19 तर मान्छेल्को भिडिन गर्तिन होल्किन बिरामिलाइ येसुकर नजिक लाकाइ बइसक्ला। होइ हुदान होलत घरकर छानाउप्रान चड्ला र छाना उधारिकइ बिरामिलाइ ओछ्यानेसुदा बिस्तारइ येसुकर अगाडि झार्ला। 20 ह्व मान्छेल्को इन्खा बिस्वास देखिके येसुन ह्व बिरामिलाइ बलल्ते, “ए साथि, तोर पाप छेमा हक्लाछि।” 21 येसुन बाज्ल ह्य कुरो सुनिके धर्म-गुरु र फरिसिल्किन मनमननाइ बिचार गरइ लाग्ला, “परमेसोरकर निन्दा गर्नार ह्य कुन हो? परमेसोरिन पो पाप छेमा गरइ सक्छइ। मान्छेन पुनि पाप छेमा गरइ सक्छइ र?” 22 होल्को मनकर कुरो था पाइके येसुन बाज्ले, “तोरा किनारइ इन्खा बिचार गर्छो? 23 ह्व पछ्यघातिलाइ ‘तोर पाप छेमा हकल्ते’ बलइ कि ‘उठिके हिन’ बलइ कुन्टो चाइ सजिलो आछि? 24 तर ह्य धर्तिनाइ मानुसकर बेटाकलाइ मान्छेल्को पाप छेमा गर्नार अधिकार आछि बाजिके तोरा जानो।” अनि येसुन ह्व पछ्यघाति बिरामिलाइ बलल्ते, “मुइ तुइलाइ बल्छु, अब उठ र आफ्ने ओछ्यान बोकिके घर जा।” 25 ह्व मानुस जुरुक्क उठ्ले अनि आफ्ने ओछ्यान बोकिके परमेसोरकर पर्सन्सा गर्तिन घर जाइले। 26 होलत सेब्बाइ अचम्म मान्ला र परमेसोरकर इन्खा सक्ति देखिके डाराइला। होल्किन परमेसोरकर पर्सन्सा गर्तिन बाज्ला, “आज हाइनिन कइले बइदेख्ल अचम्मकर कुरो देख्ले।” येसुन लेबिलाइ चेला हकइ बालाइल ( मति ९:९-१३ ; मर्कुस २:१३-१७ ) 27 ह्व पछि येसु बाइर निस्किके बाट्नाइ जाइतिन रइल। लेबि नाउँ हक्ल एउटो कर उठाइनार मानुसलाइ कर उठाइनार ठउँनाइ बसिधर्ल देख्ले। येसुन होलाइ बलल्ते, “मोर पछि लाग।” 28 अनि लेबिन सेब्बे कुरो छाड्ले र उठिके येसुकर पछि लाग्ले। 29 ह्व पछि लेबिन येसुकर लागि आफ्ने घरनाइ बड्खो भोज तयार गर्ले। ह्व भोजनाइ धेराइ कर उठाइनाराइ र आने थुप्राइ मान्छेलत पुनि आइलाइ रइला। 30 फरिसिलत र होल्को समुहकराइ धर्म-गुरुल्किन गनगनाइतिन येसुकर चेलाल्काइ बल्-ल्याक, “किनारइ तोरा कर उठाइनाराइ र पापिल्कोसिन बसिके खाइछो?” 31 येसुन होल्काइ बल्-ल्याक, “डाक्टर सद्देल्काइ बया, तर बिरामिल्काइ चाइछइ। 32 उन्खाए ने मुइ धर्मातिल्काइ बया, तर पापिल्काइ आफिन गर्ल पाप मानिलिके परमेसोरदिसउने फर्को बाजिके बालाइ आइल हो।” उपबास सम्बन्धि परस्न ( मति ९:१४-१७ ; मर्कुस २:१८-२२ ) 33 केइ मान्छेल्किन येसुलाइ बल्ला, “बप्तिस्मा दिनार युहन्नाकराइ चेलालत बेला-बेलानाइ उपबास बस्छत र पार्थना गर्छत। फरिसिकराइ चेलालत पुनि उन्खाए गर्छत, तर तोर चेलालत चाइ उपबास बइबसत, खाइनार पिनार मात्र गर्छत।” 34 येसुन होल्काइ बल्-ल्याक, “केति ब्याउला जन्तिल्को साथनाइ हकुन्जेल जन्तिल्काइ तोरा उपबास बसइ लाइ सक्छो? 35 तर इन्खा दिन पुनि आइछि, ह्व बेला ब्याउला होल्कोबान छुट्टाइनार आछ, अनि होलत उपबास बस्नारआछत।” 36 येसुन फेरि पुनि अर्को उदारन बाज्ले, “कुन्नुल्किन पुनि नयाँ लुगा च्यातिकइ पुरानो लुगानाइ बइटालत। यदि टालिहाल्लो भने नयाँ लुगा पुनि बिग्रिछि र नयाँ टालो पुरानो लुगासिन पुनि बइमिलि। 37 उन्खाए ताजा अङ्गुरकर मद्य पुरानो छालाकर थइलोनाइ धर्छत र? यदि धरिहाल्लो भने पुनि थइलो फाट्छि अनि मद्य पुनि खेर जाइछि। 38 ताजा अङ्गुरकर मद्य चाइ नयाँ छालाकर थइलोनाइ ने धरइपर्छइ। 39 अनि कुन्नुल्किन पुनि पुरानो अङ्गुरकर मद्य खाइके ताजा अङ्गुरकर मद्य खाइनार इछ्या बइगरत। होइनिन बाज्छइ, ‘पुराने स्वाद आछि।’” |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.