लुका 24 - माझीयेसु मर्लबान जिउँते हक्ल ( मति २८:१-१० ; मर्कुस १६:१-११ ; युहन्ना २०:१-१० ) 1 हप्ताकर पइलो दिन ब्यानिन्न उज्यालो हकइ आँट्तिन ह्व बेटिलत आफिन तयार गर्ल बास्नादार तेल लिके येसुकर चिहाननाइ जाइला। 2 उछि आइपुग्तिन होल्किन चिहानकर मुख छोप्ल पाथर पन्छाइल भेट्टाइला। 3 होलत चिहान भित्र पस्ला तर होल्किन पर्भु येसुकर लास बइभेट्टाइला। 4 होलत उछि अलमल परिके ठडाइधर्ल बेलानाइ एक्कासि चहकिलो लुगा लाइलाइ दुइटाइ मान्छेलत होल्को छेउनाइ ठडाइल देख्ला। 5 बेटिलत डाराइके भुइदिसउने निउरिला। अनि ह्व दुइटाइ मान्छेल्किन बाज्ला, “तोरा जिउँते मानुसलाइ मर्लाइ मान्छेल्को माजनाइ किनारइ हेर्छो? 6 ह्व इछि बइने, तर मर्लबान जिउँते हक्लाछ। गालिलनाइ हक्तिन होइनिन तोराल्काइ केति बाज्ल रइल याद गरो ते? 7 ‘मानुसकर बेटाक पापि मान्छेल्को हातनाइ पर्नारआछ, कुरुसनाइ झुन्डाइके मार्नारआछत र मर्ल तिन दिननाइ फेरि जिउँते हकिके उठ्नारआछ।’” 8 होइ बेला होल्किन येसुन बल्ल कुरो सम्जिला। 9 होलत चिहानबान फर्किल पछि आफिन देख्ल सेब्बे कुरो एघार पेरितकाइ र आने सेब्बाल्काइ सुनाइदिल्याक। 10 ह्व बेटिलत चाइ मरियम मग्दलिनि, याकुबकरि आमेक मरियम र योअन्ना रइला। होल्कोसिन हक्लाइ आने बेटिल्किन पुनि ह्य कुरो पेरितकाइ सुनाइला। 11 तर ह्य बेटिल्किन नहक्ल कुरो गर्लाइ हो बाजिके होल्किन बइपत्याइला। 12 तर पत्रुस जुरुक्क उठिके कुत्तिन चिहाननाइ जाइले। उछि निउरिकइ भित्र हेर्तिन कात्रो मात्र देख्ले। ह्य देखिके ह्व अचम्म मान्तिन फर्किले। इम्माउसकर बाटनाइ येसु ( मर्कुस १६:१२-१३ ) 13 होइ दिन येसुराइ दुइटाइ चेलालत यरुसलेमबान लगभग एघार किलोमिटर बद्दुर इम्माउस गाउँनाइ जाइतिन रइला। 14 होलत भखरइ घट्ल सेब्बे घटनाकर बारेनाइ कुरो गर्तिन रइला। 15 इत्तिके कुरो गर्तिन हिनिधर्ल बेलानाइ येसु पुनि आइके होल्कोसगिँन हिनइ लाग्ले। 16 तर होल्किन येसुलाइ देखिके पुनि चिनइ बइसक्ला। 17 येसुन होल्काइ बल्-ल्याक, “तोरा केति कुरो गर्तिन हिनिधर्लाछो?” होलत निरास हक्तिन डिनिक्क ठडाइला। 18 होलत दुइटाइ मद्दे क्लेओपासिन जबाफ दिल्ते, “यरुसलेम घुमफिर गरिके आइतिन पुनि आचाल घट्ल घटनाकर बारेनाइ केति हकिधर्लाछि बाजिके तुइलाइ था बइन्यास?” 19 येसुन होल्काइ बल्-ल्याक, “कुन्टो घटना?” होल्किन बाज्ला, “नासरतकर येसुकर बारेनाइ, ह्व परमेसोर र मान्छेल्को माजनाइ सक्तिसालि काम गर्नार अनि मजार सिछ्या सिकाइनार अगमबक्ता रइल। 20 तर हाम्राइ मुख्य पुजारिल्किन र सासककिन होलाइ मिर्त्यु दन्ड दिके कुरुसनाइ झुन्डाइ लाइला। 21 होइनिन ने इज्राएलिल्काइ छुट्कारा दिछइ बाजिके हाइनिन आस गर्लाइ रइले। तर होलाइ मार्ल आज तिन दिन हकिसकल्ते। 22 फेरि हाम्रो समुहकराइ केइ दिदि-बइनिल्को कुरो सुनिके हाइ छक्क पर्लाछे। होलत आज ब्यानिन्न चिहाननाइ जाइला, 23 तर उछिका होल्किन येसुकर लास बइभेट्टाइला अनि होलत हक्लनाइ स्वर्गदुत देखा परिके ‘येसु जिउँते हकिसक्लाछ’ बाज्ल कुरो हाइलाइ सुनाइला। 24 ह्य सुनिके हाम्राइ कोइ-कोइ साथिलत पुनि चिहाननाइ हेरइ जाइला, होल्किन पुनि बेटिल्किन बल्लठि ने भेट्टाइला तर येसुलाइ चाइ बइदेख्ला।” 25 येसुन होल्काइ बल्-ल्याक, “तोरा ता किन्खा अबुज मान्छेलत, तोराल्को हिर्दय बोदो हक्लाछि, अगमबक्ताल्किन बल्ल कुरो पुनि तोराल्किन बिस्वास बइगरो। 26 केति खिरिस्टनिन ह्य दुख भोगइ र आफ्ने महिमानाइ जाइ आबस्यक बइरल्ति र?” 27 अनि येसुन होल्काइ मोसान र सेब्बाइ अगमबक्ताल्किन लेख्ल धर्मसास्तरनाइ आफ्ने बारेनाइ लेख्ल कुरो बुझाइदिल्याक। 28 होलत जुन गाउँनाइ जातिन रइला होक्र नजिक पुग्ला। येसु चाइ अजइ बद्दुर जाइनारठि गर्ले। 29 तर होल्किन येसुलाइ बिन्ति गर्तिन बल्ला, “आज तुइ हाइसिन ने बस, घाम अस्ताइ सकल्ते र रात पर्लाल्ति।” होइ हुदान येसु होल्कोसिन बास बसइ जाइले। 30 जब येसु होल्कोसिन खाइ बस्ले पिठो लिके धन्नेबाद दिल्ते र भाचिके होल्काइ दिल्याक। 31 अनि होल्को आँखि खोल्-ल्याक र होल्किन येसुलाइ चिन्ला। तर येसु चाइ होल्को नजरबान नाठ्ले। 32 अनि होल्किन आफि-आफिनाइ बाज्ला, “ह्व हाइसिन बाटनाइ कुरो गर्तिन हिन्तिनखेर हाइलाइ धर्मसास्तरबान बइबुज्ल कुरो बल्तिनखेर हाम्रो मन आनन्दित हक्ल बइरल्ति र?” 33 ह्व पछि होलत तुरुन्तइ उठिके यरुसलेम फर्किला। उछि आइपुग्तिन होल्किन एघार चेलालत र होल्कोसिन जम्मा हक्लाइ आनेल्काइ पुनि भेट्टाइला। 34 र होल्किन इन्खा बाजिधर्ल सुन्ला, “पर्भु साँच्चि ने मर्लबान जिउँते हक्लाछ अनि सिमोनकर उछि पुनि देखा पर्ल हो रइलसइ।” 35 अनि ह्व दुइटाइ चेलाल्किन पुनि बाटनाइ हक्ल कुरो र पिठो भाचिके दितिनखेर किनिखे हाइनिन येसुलाइ चिन्ले, ह्व कुरो सेब्बाल्काइ सुनाइल्याक। येसु चेलाल्कोनाइ देखा पर्ल ( मति २८:१६-२० ; मर्कुस १६:१४-१८ ; युहन्ना २०:१९-२३ ; पेरित १:४-८ ) 36 होल्किन ह्य कुरो गरिधर्ल बेलानाइ येसु एक्कासि होल्को माजनाइ देखा पर्ले र बाज्ले, “तोराल्काइ सान्ति हक्दिक।” 37 होलत तर्सिला र डरिन आत्तिला अनि “हाइनिन ता भुत पो देख्ले” बाजिके ठान्ला। 38 तर येसुन होल्काइ बल्-ल्याक, “तोरा किनारइ डाराइछो? किनारइ मननाइ इन्खा सङ्का गर्छो? 39 मोर हात र गोड हेरो, मुइ ने हो, मुइलाइ छुइकइ हेरो। तोराल्किन देख्लाइ ह्य मोर हाड र मासुकर सरिर हो, तर भुतकर ता हाड र मासुकर सरिर बइहकि।” 40 ह्य बाजिके येसुन होल्काइ आफ्ने हात र गोड देखाइल्याक। 41 होलत एकदम रामाइला र अचम्म मान्ला किनारइभने होल्किन पत्याइ ने बइसक्ला। होइ हुदान येसुन होल्काइ बल्-ल्याक, “केति तोराल्कोसिन केइ खाइनार कुरो आछि?” 42 होल्किन येसुलाइ पाकाइल एक चोक्टा माछ दिल्याक। 43 येसुन ह्व माछ थापिकइ होल्के अगाडि खाइले। 44 येसुन होल्काइ बल्-ल्याक, “मुइ तोराल्कोसिन हक्तिन बाज्ल कुरो हेइ ने हो, मोर बारेनाइ मोसान लेख्ल बेबस्थाकर किताबनाइ, अगमबक्ताकर किताबनाइ र भजनसङ्ग्रहकर किताबनाइ लेख्ल सेब्बे कुरोलत पुरा हकइ पर्छि बाजिके तोराल्काइ बल्ल रइनाइ।” 45 ह्व पछि येसुन होल्काइ धर्मसास्तरनाइ लेख्ल कुरो बुज्नार सक्ति दिल्याक। 46 येसुन होल्काइ बल्-ल्याक, “धर्मसास्तरनाइ इत्तिके लेख्लाछि, मुक्ति दिनार खिरिस्टनिन दुख भोगइ ने पर्छि र मर्ल तिन दिननाइ फेरि जिउँते हकइ पर्छि। 47 खिरिस्टकर नाउँनाइ आफ्ने पापलाइ मानिलिके छाड्ले भने पापबान माफ पाइछे बाज्नार कुरो यरुसलेमबान लिके सेब्बाइ जातिकराइ मान्छेल्काइ सुनाइ पर्छइ। 48 तोरा ने ह्य सेब्बे कुरोकर साँक्छि हो। 49 अब सुनो, मोर ब्वान गर्ल बाचा मुइ तोराल्को उछि पाठाइछु, तर स्वर्गबान पाठाइल सक्ति नपाउन्जेल सम्म तोरा हेइ सहरनाइ ने बसिधरो।” येसुलाइ स्वर्ग उठाइ लाकाइल ( मर्कुस १६:१९-२० ; पेरित १:९-११ ) 50 ह्व पछि येसुन चेलाल्काइ सहरबान बेथानिया गाउँनाइ लाकाइल्याक। उछि पुग्ल पछि येसुन आफ्ने हात उचालिकइ होल्काइ आसिर्बाद दिल्याक। 51 होल्काइ आसिर्बाद दिधर्तिन येसु होल्कोबान छुट्टिले र स्वर्गनाइ उठाइ लाकाल्ते। 52 होल्किन येसुकर आराधना गर्ला अनि एकदम खुसि हक्तिन यरुसलेम सहर फर्किला। 53 अनि होलत सदइ मन्दिरनाइ जम्मा हकिके परमेसोरकर पर्सन्सा गरइ लाग्ला। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.