पेरित 15 - माझीयरुसलेमकर सभा 1 केइ समय पछि यहुदियाबान केइ मान्छेलत एन्टिओखियानाइ आइके उछिराइ बिस्वासि दाजि-भाइकाइ इत्तिके सिकाइ लाग्ला, “मोसाकर रितिअन्सार खतना बइगर्लो भने तोराल्किन मुक्ति पाइ बइसको।” 2 इन्खा सिछ्या सुनिके पावल र बारनाबासकर होल्कोसिन मतभेद र बाद-बिबाद हक्लपछि उछिराइ दाजि-भाइकिन पावल, बारनाबास र आने केइ बिस्वासिल्काइ ह्य परस्नकर फइसला गरइकर लागि पेरितलत र एल्डरकोनाइ यरुसलेम जाइलाइ छान्ला। 3 मन्डलिकराइ बिस्वासिल्किन होल्काइ उछ्यान बिदा गर्ला। होलत फोनिके र सामरिया हकिके जाइतिन उछिराइ बिस्वासि दाजि-भाइकाइ आने जातिल्किन पुनि पर्भुलाइ बिस्वास गर्ल कुरो सुनाइला। ह्य कुरो सुनिके होलत एकदम खुसि हक्ला। 4 जब होलत यरुसलेमनाइ आइपुग्ला, तब मन्डलिकराइ दाजि-भाइ, पेरित र एल्डरकिन होल्काइ स्वागत गर्ला। ह्व पछि पावल र बारनाबासिन उछि हक्लाइ सेब्बाल्काइ परमेसोरिन होलत मार्फत गर्ल कामकर बारेनाइ सुनाइला। 5 होल्को कुरो सुनिके फरिसि दलकराइ केइ बिस्वासिल्किन ठडाइके बाज्ला, “आने जातिल्को पुनि खतना हकइपर्छइ र होल्काइ मोसान लेख्ल परमेसोरकर नियम पालन गरइ लाइपर्छइ।” 6 हेक्र बारेनाइ छलफल गरइलाइ पेरितलत र एल्डरलत जम्मा हक्ला। 7 धेरइ बाद-बिबाद हक्लपछि पत्रुसिन ठडाइके बाज्ले, “दाजि-भाइलत, तोराल्काइ था ने रोइस्या, पइला ने परमेसोरिन मोर मुखबान आने जातिल्किन सुसमचारकर बचन सुन्दिखन र बिस्वास गर्दिखन बाजिके तोराल्को माजबान मुइलाइ छान्ल रइल। 8 सेब्बाइ मान्छेल्को हिर्दयकर कुरो जान्नार परमेसोरिन आने जातिल्काइ पुनि हाइलाइ जिन्खाए पबित्र आत्मा दिके सुइकार गर्ल कुरो हाइलाइ देखाइले। 9 परमेसोरिन यहुदि र आने जातिनाइ भेदभाब बइधर्ले। आने जातिराइ मान्छेल्किन बिस्वास गर्ला र परमेसोरिन होल्को हिर्दय सुद्द पार्ले। 10 होइहुदान किनारइ आने जाति बिस्वासिल्काइ रितिकर भारि बोकाइकइ परमेसोरकर जाँच गर्छो? ह्य भारि न ता हाम्रो पुर्खाल्किन बोकइ सक्ला न ता हाइ बोकइ सक्ले। 11 तर होल्किन पर्भु येसुकर अनुगरहन मुक्ति पाइल जिन्खाए हाइनिन पुनि पाइलाछे बाजिके बिस्वास गर्लाछे।” 12 तब सेब्बाइ चुप लाग्ला, अनि बारनाबास र पावलिन आने जातिल्को माजनाइ परमेसोरिन होलत मार्फत गर्ल अचम्मकर काम र चिन्नकर बारेनाइ सुनाइतिन सेब्बाल्किन ध्यान दिके सुन्ला। 13 होल्किन बाजिसक्लपछि याकुबिन ठडाइके बाज्ले, “दाजि-भाइलत, मोर कुरो सुनो। 14 परमेसोरिन किनिखे आफ्ने नाउँकर लागि दया गरिके आने जातिकराइ मान्छेल्काइ छानिकइ होल्काइ आफ्ने जन बानाइले बाजिके सिमोन पत्रुसिन तोराल्काइ बाताइलाछ। 15 ह्य कुरो अगमबक्ताल्किन लेख्ल बचनसिन मिल्छि, धर्मसास्तरनाइ इन्खा लेख्लाछ, 16 ‘ह्व पछि मुइ फर्किनारआछु, र दाउदकर भत्किल बासस्थान फेरि बानाइनारआछु, होक्र भत्किकइ बाकि बस्ल भाग फेरि बानाइनारआछु, र होलाइ फेरि एकदम दरो बानाइनारआछु। 17 र बाकि मान्छेल्किन परमपर्भुलाइ हेरइ सक्दिखन, र सेब्बाइ आने जातिलत पुनि मोर नाउँनाइ बालाइलाइ आछत। 18 ह्य कुरो परमपर्भु बाज्छइ, जुनिन धेरइ पइला ने ह्य कुरो जनाइल रइल।’ 19 “होइहुदान मोर बिचार ह्य आछि, कि परमेसोरदिस फर्किनाराइ आने जातिकाइ अब हाइ दुख देइ बइहक। 20 तर हाइ होल्काइ ह्य कुरो लेख्दिउ, ‘मुर्तिलाइ चाराइल असुद्द कुरो बइखाइ, बेभिचार बइगरइ र घोक्रो आठाइके मार्ल पसुकर मासु र रकत बइखाइ।’ 21 किनारइभने मोसान लेख्ल परमेसोरकर नियम पइलाकराइ पुस्तादेखि ने सहरेपिछे पर्त्येक बिस्राम-दिन सभाघरनाइ पढिके सुनाइतिन आइलाछत।” यरुसलेम सभाकर निर्नय 22 ह्व पछि पेरितलत, एल्डरलत र मन्डलिकराइ सेब्बाइ दाजि-भाइकिन मिलिके दुइटाइ मानुस छान्ला। होल्किन ह्व दुइटाकाइ पावल र बारनाबासकर साथनाइ एन्टिओखियानाइ पाठाइनार निर्नय गर्ला। ह्व दुइटाइ बारसाबास बल्ल यहुदा र सिलास रइला र बिस्वासिलत मद्दे ह्य दुइटाइ मुख्य मानुसलत रइला। 23 ह्व चारुटाको हातनाइ होल्किन इन्खा पत्र पाठाइला, “एन्टिओखिया, सिरिया र किलिकियानाइ हक्लाइ आने जातकराइ बिस्वासि दाजि-भाइकाइ, पेरितको र एल्डरकोबान सेवाढोग। 24 हाम्रो माजबान जाइलाइ कोइ-कोइ मान्छेल्किन गलत सिछ्या दिके तोराल्को मन अलमलनाइ पारिके धेरे दुख दिल कुरो हाइनिन सुन्लाछे। तर हाइनिन ह्व मान्छेल्काइ पाठाइलाइ बया। 25 होइहुदान हाइनिन सभा गर्ले, र सेब्बाइ एकमत हकिके हाम्रो कुरो तोराल्कोनाइ पुराइलाइ हाम्रे माजबान ह्य दुइटाकाइ छानिकइ हाम्रो प्यारो बारनाबास र पावलकर साथनाइ पाठाइनार निर्नय गर्ले। 26 हेलत इन्खा मानुसलत हो, जुनिन पर्भु येसु खिरिस्टकर नाउँकर लागि आफ्ने ज्यान जोखिमनाइ पार्लाछत। 27 होइहुदान हाइनिन यहुदा र सिलासलाइ पाठाइलाछे। होलत आफिन पुनि हाइनिन लेख्ल कुरो तोराल्काइ बल्नारआछत। 28 पबित्र आत्मा र हाइलाइ पुनि ह्य ठिक लाग्लो, कि ह्य एकदम आबस्यक कुरो बाएक आने बढ्ता बोज बोकाइ बइहक। 29 तोराल्किन मुर्तिलाइ बलि चाराइल खाइनार कुरो, रकत, घोक्रो आठाइके मार्ल पसुकर मासु जुनखाओ, र बेभिचार जुनगरो। ह्य कुरो पालन गर्लो भने तोराल्काइ मजार हक्नारआछि। तोरा सेब्बाल्को भलाइ हक्दिक, बलइ पर्नार कुरो यत्ते ने हो।” 30 ह्व पछि बिदा हकिके होलत एन्टिओखियानाइ पुग्ला, र होल्किन मन्डलिकराइ बिस्वासिल्काइ एकइ ठउँ जम्मा गराइकइ ह्व पत्र दिल्याक। 31 जब होल्किन ह्व पत्र पढ्ला तब उत्साहकर कुरो पाइके एकदम खुसि हक्ला। 32 यहुदा र सिलास आफि पुनि अगमबक्ता हक्ल हुदान दाजि-भाइकाइ बचनबान धेरे कुरो सिकाइतिन उत्साह दिल्याक, र होल्काइ बिस्वासनाइ बल्-ल्यो गराइला। 33 होलत केइ दिन उछि बस्लपछि उछिराइ दाजि-भाइकोसिन बिदा हकिके आफिलाइ पाठाइनाराइ दाजि-भाएकोनाइ ने फर्किके जाइला। 34 [तर सिलासलाइ चाइ उछि बसइ मजार लागल्ते।] 35 पावल र बारनाबास एन्टिओखियानाइ बस्ला, आने धेराल्कोसिन मिलिके होल्किन पर्भुकर सिछ्या दिला र बचन पर्चार गर्ला। पावल र बारनाबास छुट्टिलाइ 36 केइ दिनपछि पावलिन बारनाबासलाइ बलल्ते, “अब हाइनिन जुन्टो-जुन्टो सहरनाइ पर्भुकर बचन पर्चार गर्लाइ रइले ह्व सेब्बे सहरनाइ फेरि जिउँ। उछिका जाइके बिस्वासि दाजि-भाइकोसिन भेट गरुँ र होलत केति गर्तिन आछत हेरुँ।” 37 बारनाबासिन मर्कुस बल्ल युहन्नालाइ सँगिन लाकाइनार इछ्या गर्ले। 38 तर पावलिन मर्कुसलाइ सँगिन लाकाइ ठिक बइठान्ले, किनारइभने होइनिन काम पुरा नगरिकइ पामफिलियाबान होल्कोसिन छुट्टिकइ फर्किल रइल। 39 ह्य कुरोनाइ पावल र बारनाबासकर बड्खे बाजाबाज हकल्ते, र होलत छुट्टिला। होइहुदान बारनाबासिन मर्कुसलाइ सँगिन लिके जहाज चडिके साइपरस जाइले। 40 तर पावलिन चाइ सिलासलाइ छानल्ते, र दाजि-भाइकिन होल्काइ पर्भुकर अनुगरहनाइ सुम्पिदिल्याक। ह्व पछि होलत उछ्यान बिदा हकिके हिन्ला। 41 होलत सिरिया र किलिकिया हकिके जाइतिन होल्किन उछिकर मन्डलिकाइ बिस्वासनाइ बल्-ल्यो बानाइतिन जाइला। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.