Xota̱ Ebreo̱ 11 - Xo̱jo̱n eén Néná

Bi̱ tsꞌén tjibóko kjo̱a̱sꞌijii̱n

¹ Kjiꞌanga sꞌijinná Néná, ya nga ja̱koxi̱ boá nga sa̱kóná ni xi ndyi̱chiyáa̱, ko̱jo nga je kamákjínná nga tjín ni xi ndyi̱yà, ndatsi ndyikón nde májín be.

² Ta̱ngatꞌanii̱ nga kisꞌijii̱n Néná, kuíni nga xota̱ tji̱e̱ xcháná nda tsꞌén kandokjo̱a̱ kjo̱a̱a̱ kui.

³ Ta̱ngatꞌanii̱ kjo̱a̱sꞌijinná nga makjínná nga Néná katsꞌénda nga̱sondiee̱, nga katsꞌénkjién eén, kó kuíni nga ni xi ya ngotꞌe̱, ni xi yàjiín xí kamándani nga kisꞌijña.

⁴ Ta̱ngatꞌanii̱ kjo̱a̱sꞌijii̱n nga Abee̱ katsꞌénkꞌasꞌiee̱n Néná ngo kjo̱a̱tjó xi chjí ngasenii̱, ta̱bo̱a̱jiín xi katsꞌénkꞌasꞌien Kaii̱n, kó kuíni nga Néná, xota̱ xi kixi̱ katsoó, kó katsꞌénjo̱ꞌo kjo̱a̱tjoó, kó kuíni nga ndatsi je kꞌien Abee̱, ta̱kó tsꞌénbokóná ngo chi̱bo̱a̱, xikótsꞌèn kisꞌijii̱n kui.

⁵ Ta̱ngatꞌanii̱ kjo̱a̱sꞌijii̱n Enoo̱k, nga Néná kijíjo̱ tikón ndiꞌakꞌajmi jàn, tsi̱ꞌe̱ nga kamábejín kjo̱a̱bo̱yaa̱, kó ngiti̱ ta̱ꞌyajín xi kasako ngasee̱. Ngindiee̱ nga tsangínjo̱, nda kichiboá kjo̱a̱a̱ kui nga tsintꞌiéꞌeén Néná, kó kui nii̱ xi tsja kamaá Néná.

⁶ Ta̱nga tsi jmíjín kjo̱a̱sꞌijii̱n, ka̱májín si̱ꞌantsjaa̱ Néná, ngatꞌa̱ chjiéngá kui xi sa̱ꞌíntiñaa̱ yojoo̱ Néná, sꞌijii̱n nga tikón Néná, ko̱jo nga Néná boá xi tsja̱á ngo ni nda xi niꞌán kui xota̱ xi mongase kui.

⁷ Ta̱ngatꞌanii̱ kjo̱a̱sꞌijii̱n Noee̱ nga kjiꞌanga Néná katsóyaà ni xi sꞌe̱ ka̱ma xi nde kji̱e̱ yàjín, Noee̱ kamándikoón, kó katsꞌénkjatjosón nga katsꞌénda ngo tjotso xi je, tsi̱ꞌe̱ nga jatjoꞌa xota̱ ndiꞌaa̱, kó ta̱ngatꞌanii̱ kui kjo̱a̱sꞌijii̱n nga Noee̱, akó nga Néná sa̱ꞌínkjié xota̱ xi ngasee̱, kó Noee̱ kasakoo̱ kjo̱a̱kixi̱i̱, kui kjo̱a̱kixi̱ xi ndibánií nga sꞌijinná Néná.

⁸ Ta̱ngatꞌanii̱ kjo̱a̱sꞌijii̱n nga Abraa̱n kjiꞌanga Néná tsíchji̱a̱a̱, tsintꞌiéꞌeén nga jatjoni, kó kijí kui ngi̱ndie xi Néná tsja̱á, kó jatjo nga nde bejín ñání tsꞌénfí.

⁹ Ta̱ngatꞌanii̱ kjo̱a̱sꞌijii̱n nga kisꞌijña xikoó ngo xota̱ xi xín nangi ki̱a̱ nangi xi ja̱bo̱a̱ je katsóyaà Néná nga tsja̱á, ndiꞌańjño ndichjon kisꞌijña, ko̱jo Isaa̱, ko̱jo Jako̱b, kui já xí ti̱ bo̱a̱ ti̱ tsꞌén katseꞌeé kui ni xi katsóyàtjoón Néná nga tsja̱á.

¹⁰ Bo̱a̱ katsꞌén Abraa̱n ngatꞌa̱ askoyaá nga sa̱ko̱ó kui na̱xi̱ńdá xí kꞌuijñá ngatsjéni̱xtjii̱n, kui xi Néná índa ko̱jo katsꞌénda.

¹¹ Ta̱ngatꞌanii̱ kjo̱a̱sꞌijii̱n nga Abraa̱n ndatsi je xchá, ko̱jo nga ndi̱ kamá na̱ Saraa̱, Néná katsjaá ngaꞌniú tsi̱ꞌe̱ nga kisꞌiee̱ ngo ndí, ngatꞌa̱ Abraa̱n kisꞌijii̱n nga Néná sa̱ꞌínkjatjosoón ni xi katsóyaà nga tsja̱á.

¹² Kó bo̱a̱ tsꞌén nga Abraa̱n, ndatsi je ngiti̱ jmí ngaꞌniújiín, kisꞌiee̱ kjín xota̱ tji̱e̱, xikó maá ńño xi tjín ndiꞌakꞌajmi jàn, ko̱jo xikó maá tsomí xí tjín tꞌa ndáchíkoón, kui xi nde májín ꞌbíxki̱i̱.

¹³ Ngayeje kui xotaa̱ kisꞌińdo ta̱ngatꞌanii̱ kjo̱a̱sꞌijii̱n, kó jesón yeje nga kji̱e̱ sakójiín ni xi katsóyàtjón Néná nga tsja̱á. Ta̱nga kó nga kisꞌijii̱n Néná, bo̱a̱ katsó ngi̱jin ini̱ma̱a̱ nga sa̱ko̱ó kui nii̱, kó tsja kamaá, ngatꞌa̱ be nga ta̱ kisꞌiṉtso̱ma són kuí nga̱sondiee̱, ko̱jo nga xota̱ xi xín nangi kamá.

¹⁴ Ngatꞌa̱ xota̱ xi bo̱a̱ tsoó, tsáyà cha̱n cha̱n nga ta̱kó ndyi̱mongase ngo na̱xi̱ńdá xí ku̱i̱chji̱a̱ni.

¹⁵ Ngatꞌa̱ tsi indyiáboaá yojoo̱ kjo̱a̱a̱ nangi nínga jatjoni, kamára̱ tsi ti̱ ki̱a̱ kijíꞌoyá nginí.

¹⁶ Ta̱nga ngo na̱xi̱ńdá xí nda ngase xi kamámejeén, kó kuí boá xi tikón ndiꞌakꞌajmi jàn. Kuíni nga Néná, soboájín maá nga Nee̱ kui xota̱ tjíꞌmií, ngatꞌa̱ jè íjñandaa̱ ngo na̱xi̱ńdá.

¹⁷ Ta̱ngatꞌanii̱ kjo̱a̱sꞌijii̱n Abraa̱n, nga kjiꞌanga Néná askotꞌayákón Abraa̱n iskjíbé Isaa̱, kui xi ndií, kó kamákón nga katsꞌénkꞌasꞌien xikoó tsi ngo kjo̱a̱tjó katsaki. Bo̱a̱ katsꞌén ngatꞌa̱ Néná katsóyàtjoón nga ngatꞌaa̱ kui ndií, nga sa̱ko̱ó ni xi katsóyàtjón nga tsja̱á.

¹⁸ Néná ja̱bo̱a̱ jè bi̱ katsoó: “Ngatꞌaa̱ Isaa̱ nga kꞌuieé kjín xota̱ xi xota̱ tji̱e̱e̱ ka̱ma.”

¹⁹ Abraa̱n ja̱bo̱a̱ jè be nga Néná tjiín ngaꞌniú nga ngaskande tsꞌénkjaꞌáꞌyaá xota̱ xi je jesoón. Kó ka̱ma kꞌuin nga Abraa̱n kasako nginií ndií, xikoó tsi ngo xota̱ xi jaꞌáꞌyaá.

²⁰ Ta̱ngatꞌanii̱ kjo̱a̱sꞌijii̱n Isaa̱, kuíni nga katsóyàtjoón ndií Jako̱b, ko̱jo Esauu̱ nga Néná sa̱ꞌínchikonñé.

²¹ Ta̱ngatꞌanii̱ kjo̱a̱sꞌijii̱n Jako̱b, kuíni nga ngije ma kꞌien má, katsóyàtjoón nga ngo nga ngo ndií Kosiee̱ nga Néná sa̱ꞌínchikonñéni. Sꞌe̱ jaskan katsꞌéntsjaà Néná nga katsꞌénkjién yánísieé nga kasaxixtien.

²² Ta̱ngatꞌanii̱ kjo̱a̱sꞌijii̱n Kosiee̱, kuíni nga ngije ma kꞌien má, bo̱a̱ katsó nga xota̱ Israee̱l sájín kjo̱tjoni nangi Ejipto̱, kó atíxomaa̱ kjo̱a̱a̱ kó sa̱ꞌiín kui xotaa̱ ńdaa̱.

²³ Ta̱ngatꞌanii̱ kjo̱a̱sꞌijii̱n xi xchaá Moisee̱, nga kjiꞌanga katsen, xi xchaá íjña ꞌma ján sá, ngatꞌa̱ achichí tsjá kisꞌie kui ndií, kó katsakjónjín kjiꞌanga nda̱ ree̱ katsjákjo̱a̱ nga kiniꞌánkꞌién ngayeje jákjíndí xí chji̱a̱ni Israee̱l.

²⁴ Ta̱ngatꞌanii̱ kjo̱a̱sꞌijii̱n Moisee̱, kuíni nga ngije kamáxchá ngiti̱ kamámejénjiín nga ndií tsa̱kji̱ín nda̱ ree̱ kiꞌmií.

²⁵ Ta̱sá jaꞌájin nga nijan ndajín kiniꞌánjo̱ kui ko̱jo xota̱ na̱xi̱ńdaá Néná, ta̱bo̱a̱jiín nga katsꞌéntsjajo̱ ngotjón kjo̱a̱tsja xi tsjá jeé.

²⁶ Katsꞌénkjó kuí nga chjí ngasenii̱ kui kjo̱a̱ni̱ma̱ xi kjo̱a̱ꞌatio kui, kui xi ti̱ kjo̱a̱ꞌatio nda̱ xi katsó Néná nga sa̱ngíyá, ta̱bo̱a̱jiín nga kꞌuieé kjo̱a̱cho̱o̱n nangi Ejipto̱, ngatꞌa̱ Moisee̱ tsꞌénkoyaa̱ ni xi Néná tsja̱á.

²⁷ Ta̱ngatꞌanii̱ kjo̱a̱sꞌijii̱n Moisee̱ kuíni nga jatjoni nangi Ejipto̱, kó katsakjónjín nga katsꞌénxchán nda̱ ree̱, kó bo̱a̱ katsꞌén nga ꞌniú kisꞌijña xikó maá tsi askotsijee̱n kui Néná xi májín yaa̱.

²⁸ Ta̱ngatꞌanii̱ kjo̱a̱sꞌijii̱n Moisee̱ kuíni nga katsꞌén sꞌué paskuaa̱, kó katsangiya nga jín kachjatjónjón nga̱ntjo̱a̱a̱, tsi̱ꞌe̱ nga ndítsjiee̱ kjo̱a̱bo̱yaa̱ sa̱ꞌínkꞌiénjín ndí tjoón xota̱ Israee̱l.

²⁹ Ta̱ngatꞌanii̱ kjo̱a̱sꞌijii̱n xota̱ Israee̱l, kuíni nga jaꞌa ngamasiee̱n Ndáchíkón Inií xikó maá tsi nangi kixí nínga jaꞌa, kó ti̱ bo̱a̱ ti̱ katsꞌén xota̱ xi chji̱a̱ni Ejipto̱ nga, ta̱nga jesón ngándá ngayejee̱.

³⁰ Ta̱ngatꞌanii̱ kjo̱a̱sꞌijii̱n xota̱ Israee̱l, kuíni nga ixó ngayeje xoó na̱xi̱ńdáꞌniú Jerikoo̱, jaskan ngije xota̱ Israee̱l yito ni̱xtjin jaꞌatjiyajoo̱n.

³¹ Ta̱ngatꞌanii̱ kjo̱a̱sꞌijii̱n na̱masien xi ꞌmí Raa̱b, nga ki̱a̱jín nijan kꞌienjo̱ xota̱ xi tsintꞌiéꞌénjiín, ngatꞌa̱ kui naa̱ nda katsꞌénseén xota̱ Israee̱l xi kijíkatsijenꞌmaá tsi̱ꞌe̱ nga sku̱i̱e̱ kóchon kui ngi̱ndiee̱.

³² Kó mí ni xi xian ngase an. Xcha̱jà ngasena ni̱xtjin nga kuichjiá an kjo̱a̱a̱ Jendeoo̱n, ko̱jo Baraa̱k, ko̱jo Sansoo̱n, ko̱jo Jeftee̱, ko̱jo Ndabii̱, ko̱jo Samuee̱, ko̱jo já chji̱ni̱e̱ꞌe̱én Néná.

³³ Kui xotaa̱ kisꞌijii̱n Néná, kuíni nga kjín ngi̱ndie nínga botíxoma katsꞌén nga askjan, katsꞌén ni xi kixi̱i̱, kuíni nga kasakoo̱ ni xi katsóyàtjón Néná nga tsja̱á, ko̱jo katsꞌeén xandi̱je̱ nga askjanjo̱ nga,

³⁴ katsꞌénkꞌó ngaꞌniuú ndiꞌí xí ꞌniú, jatjongii̱ yojoo̱ nga si̱ꞌankꞌienni ki̱cha̱ndojó, kasakongaꞌniuú kjiꞌanga inda ngase kamá, kó achichí ngaꞌniú kisꞌiee̱ ngi̱jii̱n kjo̱a̱xcha̱án nga katsꞌeén jájún xi kondraa̱.

³⁵ Ta̱ngatꞌanii̱ kjo̱a̱sꞌijii̱n nga tjín ínchjín xí kasako nginií xkjín ngatꞌa̱ Néná katsꞌénkjaꞌáꞌyaá. Kje̱ꞌe xota̱ xi íjñámasienjín nga sꞌijii̱n Néná tsi̱ꞌe̱ nga sꞌi̱jñandé, kó ta̱sá katsꞌénjo̱ꞌo nga kiniꞌánꞌoón, ko̱jo nga kiniꞌánkꞌién, ngatꞌa̱ ndyi̱koyaa̱ ngo kjo̱a̱foaꞌáꞌyá xi nda ngase.

³⁶ Kje̱ꞌe xi akajnóchá, ko̱jo akjaa̱, kó ngaskande ikítꞌaꞌniú ko̱jo ndo̱bo̱a̱yà katsangisꞌien.

³⁷ Tjín xí ndi̱jo̱ akjaya nga kiniꞌánkꞌién, tjín xí jó tjín kiniꞌán, tjín xí kachjatꞌayákón, tjín xí ki̱cha̱ndojó kiniꞌánkꞌiénni, tjín xí kijí kꞌi̱e̱ kijí ngaján nga tsajá ńjño xi kamándani tji̱xi̱ín cho̱tsa̱nga̱, ko̱jo tindso̱, tjín xí ni̱ma̱ tsꞌén kisꞌińdo, tjín xí nda̱ kamaá, ko̱jo tjín xí ndajín kiniꞌánjo̱.

³⁸ Xotaa̱ kui nga̱sondiee̱ nde katsoboájiín nga nijan kꞌuíndojo̱ xota̱ xi ꞌniú nda xikoó xi̱ꞌbi̱. Ta̱xkiya kisꞌiṉtso̱ma nangi kixií, ko̱jo ngi̱jin kꞌijñá, ko̱jo ngi̱ya ti̱xa̱na̱xi̱, ko̱jo ti̱xa̱ xi tjín ngindie tꞌanangii̱.

³⁹ Ngayeje kui xotaa̱, nda tsꞌén kandokjo̱a̱ kjo̱a̱a̱ kui nga kisꞌiee̱ kjo̱a̱sꞌijin, kó Néná katsꞌénjo̱ꞌo, ta̱nga kasakojiín ni xi Néná katsóyàtjón nga tsja̱á.

⁴⁰ Kui nii̱ xi kamá ngatꞌa̱ Néná je tjíndaa̱ nga ko̱jo ñá tsja̱aná ngo ni xi nda ngase, tsi̱ꞌe̱ nga kui xotaa̱ ko̱jo ñá, nijan ka̱ma xí chjiéngá ka̱ma.