Xo̱jo̱o̱n Sandiyaá 2 - Xo̱jo̱n eén Néná

Bi̱ tsꞌén íni̱jmì Sandiyaá nga ka̱májín skján si̱ꞌanjo̱ xotaa̱

¹ Jún ntsꞌie, jún xi sꞌijinjnú Ndi̱a̱ná Jesukristo̱ xi tjiín kjo̱a̱jee̱, ngata̱ skjánjín niꞌánjo̱jnú xotaa̱.

² Ngatꞌa̱ tsi nínga matikójnú kꞌo̱sꞌien ngo nda̱ xi tjiyaá ngo sti̱ngaro to̱nsinié, ko̱jo tsi ngo ńjño xi achichí tsjákjiꞌi yajá, kó tsi ti̱ kꞌo̱sꞌien ngo nda̱ xi ni̱ma̱ xi yajá ngo ńjño xchá,

³ kó tsi tsja ka̱majnú nga xcha̱jnú kui nda̱ xi yajá ńjño tsjakjiꞌii̱, sꞌe̱ tsi bi̱ kꞌuínjnúu̱: “Kꞌi̱e̱ tindyin ji kꞌi̱e̱e̱, ngo ngi̱ndie xi nda”, kó tsi bi̱ kꞌuínjnúu̱ nda̱ xi ni̱ma̱a̱: “Ji jàn jàn tindyin kixi̱ ji”, ko̱jo tsi, “tindyin tꞌanangi ji”.

⁴ Tsi bo̱a̱ ndyi̱niꞌánjnú, a mí tsí ti̱ juún xi skján ndyi̱niꞌánjo̱jnú xotaa̱. Kó a mí tsí chꞌo tsꞌén ndyi̱niꞌánkjójnú nga ndyi̱tsitsijenjnúu̱ ꞌyá xí chjí ngasenii̱.

⁵ Jún ndí ntsꞌie xi tjóna, ndaꞌyájnú kui nii̱: A mí tsi Néná je jaꞌájin xota̱ ni̱ma̱a̱ kui nga̱sondiee̱, tsi̱ꞌe̱ nga ka̱macho̱nni ngi̱jii̱n kjo̱a̱sꞌijii̱n Néná, kó nga Néná jè katsóyàtjón nga kuí boá xi ko̱tíxomaa̱, xota̱ xi tsꞌéntjó Néná.

⁶ Kó jún míkjo̱a̱a̱ nga ndyi̱niꞌánchꞌójnú, ko̱jo nga ndajín ndyi̱niꞌánjo̱jnú xota̱ xi ni̱ma̱a̱. A kuijín xota̱ cho̱o̱n xi ndajín ndyi̱tsꞌènjo̱jnú jún, ko̱jo xi ndyi̱kjiféjnú nga ndyi̱fíjo̱jnú ngindyi̱ko̱n xota̱xa̱á nga ndyi̱botíjétaꞌínjnú.

⁷ A kuijín xota̱ cho̱o̱n xi chꞌo ndyi̱tsoó Jesukristo̱ xi tjiín kjo̱a̱jee̱, kui xi kiniꞌánkaxoma jaꞌeén nga kandokjo̱a̱tjéjnú.

⁸ Tsi ja̱koxi̱ nga ndyi̱niꞌánkjatjosónjnú kjo̱a̱kiti xi katsjájnú nda̱ Rená, xikótsꞌèn kjitꞌa xo̱jo̱n eén Néná: “Ti̱ꞌintjé ji xotaa̱, xikó má tsꞌén tjoó yojòo̱”, ja̱ nda ndyi̱niꞌánjnú.

⁹ Ta̱nga tsi skján ndyi̱niꞌánjo̱jnú xotaa̱, ndyi̱niꞌánjéjnú, ngatꞌa̱ ti̱kuíní kjo̱a̱kitii̱ xi bokó nga tjínjnú jé.

¹⁰ Ngatꞌa̱ ta̱ꞌya xota̱ní xi tsꞌénkjátjosón ngayeje kjo̱a̱kitii̱, ta̱nga tsi tjítsꞌénkjátjosónjín ngo ndiè chií kui kjo̱a̱kitii̱, sa̱kójérií kjo̱a̱a̱ ngayeje ni xi tjítꞌa kui kjo̱a̱kitii̱.

¹¹ Ngatꞌa̱ kui Néná xi bi̱ katsoó: “Ka̱májín si̱ꞌintꞌée̱ kjo̱a̱ chjóo̱n ko̱jo tsi xi̱ꞌíi̱n”, ti̱ bi̱ ti̱ katsó nga: “Ka̱májín si̱ꞌinkꞌin ji xota̱.” Kó kuíni nga tsi si̱ꞌintꞌejíi̱n kjo̱a̱ xi̱ꞌíi̱n ko̱jo tsi chjo̱ón, ta̱nga tsi tjín xi si̱ꞌinkꞌin ji, je ikiyiní ji kui kjo̱a̱kitii̱.

¹² Chjiéngá bo̱a̱ tsꞌén ko̱ndókjo̱a̱jnú, ko̱jo nga bo̱a̱ tsꞌén ku̱i̱ndyionjnú, xikoó xota̱ xi je si̱ꞌandajin kjo̱a̱a̱, nga si̱ꞌankjién ngo kjo̱a̱kiti xi tsꞌéndé xotaa̱.

¹³ Ngatꞌa̱ ni̱xtjin nga Néná sa̱ꞌíndajin kjo̱a̱a̱, ni̱ma̱jín ka̱maa̱ xota̱ xi ni̱ma̱jín kamaá kje̱ꞌe xota̱. Ta̱nga kui xota̱ xi ni̱ma̱ kamaá kje̱ꞌe xota̱, sa̱kójiín kjo̱a̱botíjeé Néná kui ni̱xtjii̱n.

Bi̱ tsꞌén íni̱jmì Sandiyaá kjo̱a̱a̱ kjo̱a̱sꞌijin xi ja̱koxi̱i̱

¹⁴ Jún ntsꞌie, mí chjínií tsi tjín xí tjiín kjo̱a̱sꞌijin ka̱tso̱, ta̱nga tsi ni xi tjítsꞌén tsꞌénbokójín nga tjiín kjo̱a̱sꞌijin. A ka̱márií kui kjo̱a̱sꞌijii̱n kꞌo̱xiéꞌá.

¹⁵ Si̱ꞌankjíi̱n takón tsi ngo ntsꞌié, ko̱jo tsi ngo ndichjá xi jmíjiín ńjño xi chajá, ko̱jo nichinie,

¹⁶ kó tsi ngo jún xi bi̱ ka̱tso̱o̱: “Tangín xió xiójnú, cha̱jájnú ńjñojnú, kó chi̱ni̱e̱jnú ngayeje ni xi mejénjnú”, ta̱nga tsi ko̱e̱ꞌejínjnúu̱ ni xi chjieén yojoo̱ kui xotaa̱, mí chjínií kui nii̱.

¹⁷ Bo̱a̱ ti̱ máa kjo̱a̱sꞌijinná, tsi jmíjiín ni nda xi niꞌaán, ni xi je kꞌien boá.

¹⁸ Ta̱nga ka̱maraa̱ tsi ngo xota̱ xi bi̱ ka̱tso̱: “Ji tjiín kjo̱a̱sꞌijin, kó án tsꞌén an ni xi nda”. Takéní kjo̱a̱sꞌijìi̱n nga jmíjiín ni xi niꞌán, kó án kokòo̱ kjo̱a̱sꞌijinna, ta̱ngatꞌaa̱ ni xi tjítsꞌen an.

¹⁹ A sꞌijii̱n ji nga ta̱ ngo tsí má Néná. Ja̱ ndakjiꞌi ni xi niꞌín ji. Ta̱nga ngaskande ko̱jo ndítsjiee̱ xindajín sꞌijii̱n nga, kó fotsié má nga tsakjón má.

²⁰ Ta̱nga ngata̱ chi̱nijín má ji, kó ti̱ꞌinjo̱ꞌo ji nga tsi kjo̱a̱sꞌijìi̱n jmíjiín ni xi niꞌaán, ni xi je kꞌien boá.

²¹ Xota̱ tji̱e̱ xcháná Abraa̱n, kixi̱ kamá ngindyi̱ko̱n Néná, kjo̱a̱a̱ ni xi katsꞌén kjiꞌanga sa̱ꞌínkꞌasꞌiee̱n ngo kjo̱a̱tjó Néná, nga katsjá ndií xi ꞌmí Isaa̱ ki̱a̱ nga̱són ṉchandikoón.

²² A ye ꞌne̱ nga Abraa̱n, ndse̱je̱n nijan akó kjo̱a̱sꞌijin, ko̱jo ni xi niꞌaán, kó ta̱ngatꞌanii̱ ni xi katsꞌén nga kjo̱a̱sꞌijii̱n kamá ni xi chjiéngá ka̱ma kui, kuí nii̱ xi kjo̱a̱sꞌijin xi ja̱koxi̱i̱.

²³ Kó bo̱a̱ tsꞌén jatjosón ni xi kjitꞌa xo̱jo̱n eén Néná nínga bi̱ tsoó: “Abraa̱n kisꞌijii̱n Néná, kó kui nii̱ xi katsꞌénchjínií Néná nga nda̱ xi kixi̱ kamá.” Kó Abraa̱n amingoo̱ Néná kiꞌmií.

²⁴ A yàjnú ꞌne̱, nga Néná tsꞌénkixi̱ xotaa̱ kjo̱a̱a̱ ni xi tsꞌén, kó jmí tsi ta̱ kjo̱a̱a̱ kjo̱a̱sꞌijii̱n tsí.

²⁵ Ti̱ bo̱a̱ ti̱ tsꞌén na̱masien Raa̱b, kixi̱ kamá ngindyi̱ko̱n Néná kjo̱a̱a̱ ni xi katsꞌén, ngatꞌa̱ katsjaá ngi̱ndie ndiꞌaa̱, nínga índoꞌmá já xí kijíkatsijenꞌmaá nangii̱, kó kui naa̱ asíko̱jo tsi̱ꞌe̱ nga xín ndi̱yà kijí.

²⁶ Ngatꞌa̱ xikótsꞌèn yojoo̱ tsi jmíjiín a̱siénni̱xtjin, yojo kꞌien boá, ti̱ bo̱a̱ ti̱ tsꞌén kjo̱a̱sꞌijii̱n, ni xi je kꞌien boá tsi jmíjiín ni xi niꞌaán.