Xo̱jo̱n Salmoo̱ 89 - Xo̱jo̱n eén Néná

Néná ngo ni índajo̱ Ndabii̱

Só xi katsꞌénda Etaa̱n.

¹ Ngatsjéni̱xtjin nga sie an kjo̱a̱ni̱ma̱takoón Néná. Kó ta̱kjiꞌání nga xiyà an kjo̱a̱ꞌniátakón xi tjiín ji Ne,

² ngatꞌa̱ jè bi̱ kixian an: Ngatsjéni̱xtjin nga sa̱kóngaꞌniuú kjo̱a̱ni̱ma̱takoón Néná, kó ngaskande ti̱ ki̱a̱a̱ nkꞌajmii̱ ꞌniú kꞌuijñí ji ni xi ja̱koxi̱i̱.

³ Jí boá xi bi̱ kase ji: Ngo ni indajo̱ an kui xi jaꞌajin an, katsjáa̱ ndso̱ꞌba án Ndabii̱, kui xi moso̱na nga bi̱ kixiáa̱n:

⁴ «Ngatsjéni̱xtjin nga ꞌniú kꞌuijñá an xota̱ tji̱e̱e̱, tsi̱ꞌe̱ nga ta̱kjiꞌání nga skjininkꞌa an ngi̱ndie nínga ko̱ti̱xome ji».

⁵ Ji Ne, nkꞌajmii̱ ka̱tso̱ya ni xi fíndikónná xí niꞌín ji, kó ti̱ kꞌuiyá kjo̱a̱ꞌniátakóo̱n ngi̱jii̱n ngayeje xota̱ tsjiée̱,

⁶ ngatꞌa̱, ꞌyání xi tjín ki̱a̱ nkꞌajmii̱ xi xikoó ji Ne. ꞌYá ne xi tjiín xi xikoó ji.

⁷ Achichí yandikón Néná kjiꞌanga matikó ndítsjiee̱, ngayeje xi síndo nga ngo foaꞌatjiyajoo̱n xi bendikón.

⁸ Ji Ndi̱a̱, ji xi Ne tsi̱ꞌe̱ ngayeje jájuún, ꞌyání xi xikó jí, ji xi ta̱nisién tjiín ngaꞌniú. Achichí kjo̱a̱ꞌniátakóo̱n tjiín.

⁹ Jí boá xi botíxomée̱ nga tsꞌénxchán ndáchíkoón, kjiꞌanga tjoninkꞌa ngaꞌniuú, jí boá xi niꞌínkꞌíxí ji.

¹⁰ Jí boá xi kiniꞌínꞌíi̱n ko̱jo xi kiniꞌínkjiékjo̱a̱ ji nangi Ejiptoo̱, kó ngaꞌniuú ndse̱ kiniꞌínkjín jí nga kiniꞌíntsojoboe ji kondra̱a̱.

¹¹ Jí tse̱ nkꞌajmii̱, ko̱jo ti̱ jí tse̱ tꞌanangii̱ nga, jí boá xi kiniꞌínde ji nga̱sondiee̱, ko̱jo ngayeje ni xi tjiín.

¹² Jí boá xi ikꞌíjñí ji nínga ta̱ꞌii̱n, ko̱jo nínga nangii̱. Na̱xi̱ Taboo̱r, ko̱jo na̱xi̱ Ermoo̱n tsja maa̱ kjo̱a̱a̱ jaꞌée̱n.

¹³ Jí tse̱ kui tjia ko̱jo kui ndsa̱ xi tjiín ngaꞌniuú, ndse̱ kixi̱ ji kuí boá xi bokó nga je kiniꞌín ji.

¹⁴ Kjo̱a̱kixi̱i̱ ko̱jo ni xi kixi̱i̱ boá xi kamándani ngi̱ndie nínga botíxome ji. Kjo̱a̱ni̱ma̱takoón ko̱jo ni xi ja̱koxi̱i̱ boá xi fotsoꞌbátjoón jí.

¹⁵ ¡Achichíra̱tsjaa̱ xota̱ na̱xi̱ńdá xí maa̱ chaꞌayátsjá, kui xi kꞌuimá ki̱a̱ nínga sa̱ꞌíntsijee̱n ndiꞌíi̱!

¹⁶ Nga ngo ni̱xtjii̱n nga tsja ka̱maa̱ kjo̱a̱a̱ jaꞌée̱n, kó ta̱ngatꞌanii̱ kjo̱a̱kixi̱i̱ nga xchjanínkꞌá.

¹⁷ Ngatꞌa̱ jí boá xi kjo̱a̱jee̱ ngaꞌniuú, kó ta̱ngatꞌanii̱ kjo̱a̱ndàa̱ nga sakó ngaꞌniú ngasejne̱.

¹⁸ Ngatꞌa̱ Néná boá xi konjne̱, kó rejne̱ kuí boá xi xota̱ tsjiee̱ Israee̱l.

¹⁹ Ni̱xtjin xcháján kandokjo̱e̱je ji xota̱ tsjiée̱ nga akakèe̱ ngo ni, kó bi̱ kasèe̱: Jè tsꞌénbosiko̱jo an ngo nda̱ xi tjiín ngaꞌniú, jè tsꞌénkjininkꞌa an ngo nda̱ xi jaꞌajin an ngi̱jii̱n xota̱ nangina.

²⁰ Ndabii̱ boá xi kasakona, kui xi moso̱na ma, kó jè katsangijon an isti̱ ndikónná.

²¹ Ngatsjéni̱xtjin nga ndsa̱ án boá xi ko̱síko̱jo, kó ko̱jo tjiana boá xi tsjangaꞌniúu̱.

²² Kondra̱a̱ ka̱májiín kꞌo̱ṉchajo, ti̱nde xota̱ xi ꞌniú ndajiín, kuijín xi ko̱tíxomaa̱.

²³ Ngatꞌa̱ án boá xí sa̱ꞌinkjítie an kondra̱a̱ ngindyi̱ko̱n kui, kó sa̱ꞌinꞌóo̱n ngayeje xi tsꞌenchꞌó kuí.

²⁴ Kjo̱a̱ꞌniátakónna ko̱jo kjo̱a̱ni̱ma̱takónna, ki̱a̱ kꞌuijñájo̱ kui, kó ngi̱yaa̱ jaꞌénna boá nga xtjonínkꞌá ngase ngaꞌniuú kuí.

²⁵ Kó ti̱ bo̱a̱ ti̱ tsꞌén kꞌuijñásón an tsja skón nga̱soón ndáchíkoón, tsi̱ꞌe̱ nga kui ko̱tíxomaa̱, ko̱jo tsja kixi̱ nga̱soón ndejeèꞌ, tsi̱ꞌe̱ nga kui ko̱tíxomaa̱ nga.

²⁶ Kó kuí ni̱ma̱ ka̱tso̱ nga bi̱ ka̱tso̱na: “Jí boá xi na̱ꞌmina ji, jí boá xi Néna ji, ko̱jo jí boá kui ndi̱jo̱je xí ꞌboxiéꞌána”.

²⁷ Án xí tsjàa̱ kjo̱a̱nda xi tsoboaá, nga kui xi ndí xí tjón, kó nkꞌa ngase kꞌuijñá an, ta̱bo̱a̱jiín ngayeje re xi tjín nga̱sondiee̱.

²⁸ Ngatsjéni̱xtjin nga tsjáa̱ kjo̱a̱ni̱ma̱takónna, kó ni xi je índajo̱ an kui, ꞌniú kꞌuíjñá.

²⁹ Kó bo̱a̱ tsꞌén nga kju̱i̱e̱jín xota̱ tji̱e̱e̱ ngatsjéni̱xtjin, kó ngi̱ndie nínga botixómá kꞌuijñá, tji̱e̱nga kꞌuijñá kui nkꞌajmii̱.

³⁰ Ta̱nga tsi ndií sa̱ꞌínkjatjosónjín kjo̱a̱kitina, kó tsi ki̱a̱jín ko̱e̱je̱tji̱ngi kjo̱a̱botíxomana,

³¹ kó tsi ta̱sá tsja̱nié tsja̱fe kjo̱a̱kitina, ko̱jo tsi sa̱ꞌínkjatjosónjín kjo̱a̱botíxomana,

³² ja̱ ki̱a̱ boá nga kjuínkóo̱n, kó sa̱ꞌinjée̱ kjo̱a̱a̱ jeé, kó koꞌon an kjo̱a̱a̱ ni xi ꞌniú ndajín xi ndyi̱tsꞌèn.

³³ »Ta̱nga kjo̱a̱ꞌaxínjáa̱n kjo̱a̱ni̱ma̱takón xi tjínna kjo̱a̱a̱ kui, ti̱nde kꞌuindisojo̱jín an kjo̱a̱a̱ kjo̱a̱ꞌniátakón xi tjínna kjo̱a̱a̱ kui.

³⁴ Jmí ni̱xtjin xchi̱yana ni xi je indajo̱ an, ti̱nde kjoaꞌaxínjín an ni xi je jatjoo̱ ndso̱ꞌba án xi kixiáa̱n.

³⁵ »Ngo ndi̱yà katsjáa̱ ndso̱ꞌba án ta̱ngatꞌanii̱ kjo̱a̱tsjiena, kó kꞌuindisojo̱jín an Ndabii̱.

³⁶ Ngatsjéni̱xtjin nga kꞌuíndo xota̱ tji̱e̱e̱, kó ngi̱ndie nínga botíxomaa̱ kꞌuijñá xikó maá tsꞌueé, xtji̱e̱e̱n kje̱n án.

³⁷ Ngatsjéni̱xtjin nga kꞌuijñá xikoó saá, kui xi tikón xikoó ngo chistiko̱ xi ꞌniátakón ki̱a̱ nkꞌajmii̱».

³⁸ Ta̱nga ngotꞌe̱ ꞌne̱, kiniꞌínchꞌí ji mosoo̱, kó ikꞌíjñímasin ji kui nda̱ xi ji kachjeꞌéjin ji, kó kiniꞌínxchínje̱ ji kui.

³⁹ Kiniꞌínkjié ji kjo̱a̱ ni xi ikꞌíndeje̱ ji mosoo̱, kó tꞌanangii̱ akjajmi ji koronaa̱.

⁴⁰ Jè akakjen ji ngayeje xó xí tjíchjáꞌyánii̱, kó kiniꞌínkixóndé jí tarié xi síndoo̱.

⁴¹ Ngayeje xota̱ xi foaꞌa kui ndi̱ya̱à, tsꞌénchéjeé ni xi tjiín, kó xota̱ xi síndotꞌa tiñaa̱ ndyi̱mojnókie ngotꞌe̱ ꞌne̱

⁴² Jí boá xi katseꞌéngaꞌníi̱ xota̱ xi kondra̱a̱, jí boá xi kiniꞌín ji nga ngayeje kui kondra̱a̱ ndyi̱mojnó ngotꞌe̱ ꞌne̱.

⁴³ Jé kiniꞌíntjaꞌe ji ki̱cha̱ndojoó, kó ngiti̱ akasíke̱jejín ji nga kijíkján.

⁴⁴ Jè kiniꞌínkjié ji kjo̱a̱jee̱, kó ngiti̱ katseꞌéndièjín ji nga kui xi ko̱tíxoma ngase.

⁴⁵ Jè kiniꞌín chiboa ngase ji ni̱xtjin nga kꞌuijñá xo̱ngò, kó tsie kjo̱a̱soboá je katseꞌée̱.

⁴⁶ Ngaskande kjiꞌání, Ji Ne, a ngatsjéni̱xtjin ku̱i̱ndyinꞌmí ji. Ngaskande kjiꞌání nga si̱ꞌinxchín jí, xikó maá ndí xí tjítíngá.

⁴⁷ Ngatjaꞌátsjiee̱n nga achichí chiboa má ni̱xtjii̱n. A ta̱kjo̱a̱ndaní nga kiniꞌínde ji xota̱ nga̱sondiee̱.

⁴⁸ ꞌYá xota̱ nga̱sondie xi kꞌuijñá nga sku̱i̱e̱jín kjo̱a̱bo̱yaa̱, ꞌyá xi ka̱maa̱ kꞌo̱xiéngí yojoo̱ ngi̱yaa̱ nga̱tsjo̱ó.

⁴⁹ Ji Ne, ñá tikón kui kjo̱a̱ni̱ma̱takón xi kisꞌiee̱ ngasꞌe̱, kui xi kjo̱a̱ꞌniátakóo̱n kiniꞌínkjín jí nga kaseyetjée̱n Ndabii̱ nga ko̱e̱ꞌée̱.

⁵⁰ Ji Ne, ngatjaꞌátsjiee̱n nga tjímojnóchá mosoo̱, kui kjo̱a̱mojnóchá xi tjíjin ni̱se̱nna xi tjíniꞌánjo̱ kjín xota̱ na̱xi̱ńdá.

⁵¹ Ji Ne, ngatjaꞌátsjiee̱n nga kondra̱a̱ chꞌo ndyi̱tsójne̱, kó ti̱ chꞌo ndyi̱tsoó chi̱bo̱a̱ se xota̱ xi ji kachjeꞌéjin ji.

⁵² Ji Ne, ¡ngatsjéni̱xtjin nda ngandokjo̱a̱ kjo̱a̱a̱ ji! Bo̱a̱ kjiꞌi, bo̱a̱ kjiꞌi.