Xo̱jo̱n Salmoo̱ 86 - Xo̱jo̱n eén Néná

Jí boá xi Néna

Ndabii̱ bi̱ tsꞌén tsíchji̱a̱a̱ Néná.

¹ ¡Ji Ne, tasínijin chiíní, kó ti̱ꞌinsénní! Ngatꞌa̱ achichí ndasen ko̱jo ni̱ma̱ tikón an.

² Chínní, ngatꞌa̱ jè yé ji nga tjínna kjo̱a̱ni̱ma̱takón. Jí Ne, ꞌna̱xiéꞌé chií ji kui moso̱ xi ji kjimaꞌniátakoón.

³ Ji Ne, ngatamani̱ma̱a̱ an, ngatꞌa̱ jí boá xi tsꞌénchji̱a̱a̱ nga ngo ni̱xtjii̱n.

⁴ Ji Ne, te̱ꞌéndiè ji nga tsjatsꞌèn kꞌuijñá kui mosoo̱, ngatꞌa̱ jí boá xi ꞌniú tsꞌénchji̱a̱a̱.

⁵ Ngatꞌa̱ ji Ne, nda jí xota̱, kó maá niꞌínjetakín ji, ¡kó achichí kjo̱a̱ni̱ma̱takón tjiín kjo̱a̱a̱ xota̱ xi tsꞌénkáxoma jaꞌée̱n!

⁶ Ji Ne, ndaꞌyé chií ji nga kuichjiaá, kó ti̱ꞌinsée̱n nda̱na nga ni̱ma̱ xiaán nga kuichjiáa̱.

⁷ Ni̱xtjin nga ꞌniú nda̱ ka̱mana kuichjiaá, ngatꞌa̱ be án nga ji si̱ꞌinsénní.

⁸ Ji Ne, jmíjín ngo Ne xi xikoó jí, ngi̱jii̱n ngayeje ne xi ngasee̱, ti̱nde jmíjín ngo ni, xi xikoó xi ji kiniꞌínde ji.

⁹ Ji Ne, ngayeje xota̱ na̱xi̱ńdá xí jí kiniꞌínde ji, kji̱ndi̱bá, kó ji kjo̱e̱ꞌétsꞌendíkoón, ko̱jo tsja̱á kjo̱a̱tsja jaꞌée̱n.

¹⁰ ¡Ngatꞌa̱ jí boá xi tjiín kjo̱a̱je, kó maá niꞌán ni xi fíndikónná! ¡Ta̱ jí tsí bo̱a̱ xi Néná jí!

¹¹ Ji Ne, takéní ndi̱yàa̱, kó ki̱a̱ kjuintjingí an ni xi ja̱koxi̱i̱, ꞌniú ti̱ꞌinkꞌijñí ji ini̱ma̱na, tsi̱ꞌe̱ nga sku̱i̱e̱ndikón jaꞌée̱n!

¹² ¡Ji Ne, ji xi Ndi̱a̱na ji, ngayeje ini̱ma̱na nga ji sa̱ꞌintsjaá, kó ngatsjéni̱xtjin nga tsjáa̱ kjo̱a̱je jaꞌée̱n!

¹³ Ngatꞌa̱ achichí kjo̱a̱ni̱ma̱takón tjiín kjo̱a̱a̱ an, kó jí boá xi kaꞌnaxiéꞌéní tsi̱ꞌe̱ nga ki̱a̱jín kijí an ki̱a̱ ti̱xa̱na̱nga̱a̱ tꞌanangii̱.

¹⁴ Ji Ne, xota̱ xi nkꞌakoo̱n an ndyi̱kjánjo̱na, kó xota̱ xi ꞌniú ndajiín ndyi̱mongase nga an sa̱ꞌínkꞌiénna, kó kui xotaa̱ jmí xki̱ boaꞌájín jí.

¹⁵ Ta̱nga ji Ne, jí boá ngo Ne xi tjiín kjo̱a̱tsiekon ko̱jo kjo̱a̱ni̱ma̱takón, tsájín niꞌínxchín jí, kó tsie kjo̱a̱ni̱ma̱takón ko̱jo kjo̱a̱kixi̱ tjiín.

¹⁶ An tsitsíjinní, kó ngatama ni̱ma̱a̱ an, ¡Te̱ꞌéngaꞌníi̱ kui moso̱ xi tse̱, kó ꞌnaxiéꞌé ji ndií na̱ mosoo̱!

¹⁷ Takéní ngo chi̱bo̱a̱a̱ kjo̱a̱nda xi niꞌín ji, kó ngatamabe xota̱ xi chꞌoo̱ an, kó ngatjaꞌa kjo̱a̱soboá, ngatꞌa̱ ji Ne, jí boá xi tibosíke̱jení ko̱jo tiniꞌíndajìnní.