Xo̱jo̱n Salmoo̱ 41 - Xo̱jo̱n eén Néná

Ti̱ꞌindaye nginí

Só xi katsꞌénda Ndabii̱.

¹ Achichíra̱tsjaa̱ xota̱ xi nda̱ maa̱ xota̱ ni̱ma̱a̱, ngatꞌa̱ kjiꞌanga kji̱ndi̱bá ni̱xtjin xi ndajiín, Néná boá xi kꞌo̱xiéꞌá.

² Néná boá xi skoón, kó tsja̱á kjo̱a̱mindyion, kó tsjatsꞌèn kꞌuijñá kui nga̱sondiee̱, kó tsja̱ndièjín nga kondraa̱ ta̱ ni xi mejénrií sa̱ꞌínjo̱.

³ Néná boá xi ko̱síko̱jo kjiꞌanga ka̱maꞌoo̱n, kó sa̱ꞌíndaya ngayeje chiꞌin xi kꞌuieé.

⁴ Kó bi̱ kixian an: «Ngatama ni̱ma̱a̱ an, kó ti̱ꞌindaye nginí, ngatꞌa̱ katsꞌenjé an kondra̱ tse̱».

⁵ Bi̱ tsó kondra̱na nga chꞌo tsꞌén chji̱a̱taꞌinna: «¡Kjiꞌání ko̱yà kó si̱ꞌanchíyá!»

⁶ Kó tsi tjín xí ndibakátsijenna, éndísó chji̱a̱, kó ta̱soboá ni xi ndajín boá xi ꞌbíjin ngi̱jin ini̱ma̱a̱, kó ngije fí nginí, tsꞌéntsójó kui eén.

⁷ Ngayeje xi chꞌoo̱ an, ꞌbitíkó xkjín, kó an chji̱a̱taꞌinna, ndajín tsꞌénkjó, nga bi̱ tsó kondra̱ tsa̱ꞌa̱n:

⁸ «¡Ngo xindajín je katsꞌénꞌoón! Jè kjiꞌijña nga oo̱n, kó nginijánjín kjo̱stjíe̱n».

⁹ Ngaskande amingo̱na xi nda ngase yaꞌa an, kui xi ꞌniú kamáꞌniátakón an, ko̱jo kui xi nijan iskjíni̱e̱jo an nichinie, je kondra̱ tsa̱ꞌa̱n an je tikón.

¹⁰ Ta̱nga ji Ne, ngatama ni̱ma̱a̱ an, ¡ti̱ꞌindaye nginí, kó an tsjachjíi̱ nga tsjàa̱ ni xi tsoboaá!

¹¹ Bi̱ tsꞌén skuiéni an nga tjoó an, kjiꞌanga jmí tsi kondra̱na xi sa̱ꞌínna.

¹² Kó kjo̱a̱a̱ an ki, jí boá xi ngatsjéni̱xtjin nga ko̱si̱ke̱jení, kó ngatsjéni̱xtjin nga ki̱a̱ kꞌuijñíní nínga tindyin ji.

¹³ ¡Ngatamachikonñé Nee̱ xota̱ Israee̱l, ndeskande ngasꞌe̱ kó ta̱kjiꞌání! ¡Bo̱a̱ kjiꞌi, bo̱a̱ kjiꞌi!