Xo̱jo̱n Salmoo̱ 36 - Xo̱jo̱n eén Néná

Achichí ndaxota̱ Néná

Só xi katsꞌénda Ndabii̱, ngo nda̱ xi kixi̱ tsꞌénxátꞌaa̱ Néná.

¹ Ni xi ꞌniú ndajín xi tsꞌén xota̱ xi tsꞌénjeé, tsꞌénkjó ngi̱jin ini̱ma̱a̱, nga chjiénjín nga sku̱i̱e̱ndikón Néná.

² Tsꞌénkjiín kon nga jé xí katsꞌén jmíjín xi sku̱i̱e̱, ko̱jo jmíjín xi chꞌo ka̱maa̱ kui nii̱.

³ Én xí chji̱a̱, ni xi ndajín ko̱jo kjo̱a̱ndiso boá, jè ngiti̱ bo̱a̱jín tsꞌén xikoó ngo xota̱ xi nda tsꞌénkjó, ko̱jo xi ni xi ndaa̱ tsꞌén.

⁴ Ndeskande ndatsi to̱kó kjiꞌijña ngase, nga ta̱soboá ni xi ndajiín boá xi tsꞌénkjó, jmí tsi ndi̱yà xí ndaa̱ xi tsoꞌbá, ngatꞌa̱ ma chꞌójiín ni xi ndajín xi tsꞌén.

⁵ Ji Ne, kjo̱a̱ni̱ma̱takóo̱n ngaskande nkꞌajmi jàn fochó, kó kjo̱a̱ꞌniátakóo̱n ngaskande nínga tikón ṉdi̱i̱ fochó.

⁶ Kjo̱a̱kixi̱ xi niꞌín ji, bo̱a̱ má kón xikoó na̱xi̱i̱ Néná, kó kjo̱a̱botíjée̱ bo̱a̱ má kón xikoó nínga na̱nga̱a̱ ndáchíkoón. ¡Jí boá xi tichìi̱n nga síndo xota̱ nga̱sondiee̱ ko̱jo cho̱o̱!

⁷ Ji Ne, ¡Achichí tsjákjiꞌi kjo̱a̱ni̱ma̱takóo̱n! Kuíni nga xota̱ nga̱sondiee̱ ki̱a̱ ꞌbíndongí ngindie nkꞌieén nga̱a̱.

⁸ Kui nichinie tsie xi tjín ndiꞌàa̱ boá xi nda sa̱ꞌíntsiee̱, kó ki̱a̱ ko̱e̱ꞌée̱ ni xi kꞌuí, ki̱a̱ ndejèꞌ xi tjiín ndáfoa xi ndaꞌyoó.

⁹ Ngatꞌa̱ jí boá xi tikoón ndáńchꞌi̱ nínga tikón kjo̱a̱mindyioo̱n, kó kjo̱a̱a̱ kui ndiꞌí xí tikoón nga ka̱maxcha̱nijne̱ ndiꞌií.

¹⁰ ¡Takèe̱ kjo̱a̱ni̱ma̱takóo̱n xota̱ xi bee ji, kó takèe̱ kjo̱a̱kixi̱i̱ xota̱ xi kixi̱ síndo ini̱ma̱a̱!

¹¹ ¡Ngata̱ boeꞌéndièjín ji nga xota̱ xi nkꞌakoo̱n tsja̱nié tsja̱fena! ¡Ngata̱ boeꞌéndièjín ji nga xota̱ xi ndajiín ta̱ ni xi mejénrií sa̱ꞌínjo̱na!

¹² Kósꞌe̱ kjiꞌá boá nga ku̱i̱xo̱ xota̱ xi tsꞌén ni xi ꞌniú ndajiín, ¡ku̱i̱xo̱ tꞌanangi, kó ngiti̱ kjo̱stjíe̱njín ngase!