Xo̱jo̱n Salmoo̱ 34 - Xo̱jo̱n eén Néná

Néná koón xota̱ xi tsi̱ꞌe̱

Re Ndabii̱ boá xi katsꞌénda kui soó kjiꞌanga jachó ngindyi̱ko̱n nda̱ re Abimelee̱k, nga kamámejeén nga kui ree̱ sa̱ꞌínkjó nga tsobeé. Kuíni nga nda̱ re Abimelee̱k katsjaákjo̱a̱ nga kjo̱tjoxieni ngindyi̱ko̱n.

¹ ¡Ngatsjéni̱xtjin nga tsjàa̱ ndokꞌóchji̱ì Néná! ¡Ngatsjéni̱xtjin nga Néná sa̱ꞌíntsjaá ndso̱ꞌba án!

² ¡Ngayejení ini̱ma̱na nga sa̱ꞌintsjáa̱ Néná, kó achichí tsjá ka̱maa̱ xota̱ xi ntꞌiéꞌeén nga ku̱i̱ntꞌiè!

³ ¡Nijan si̱ꞌantsjàa̱ Néná, jún ko̱jo an, kó ngo nda̱ ngatama nga nkꞌa kꞌuijñá jaꞌeén!

⁴ Tsangase an Néná, kó katsꞌénsénna, ¡kó jaꞌáxín ngayeje ndikón xí kisꞌiena!

⁵ Xota̱ xi askotsijee̱n Néná, ꞌna̱ má kamá kje̱n nga kisꞌiee̱ kjo̱a̱tsja, kó jmíni̱xtjin nga kꞌuieé soboá kje̱n.

⁶ An, xi jmí ni chjíjiín an, ni̱ma̱ kixian an nga tsíchji̱a̱a̱ Néná, kó kuí tsintꞌiéna, kó katsꞌéndéna kjo̱a̱a̱ ngayeje ni xi nda̱ kamána.

⁷ Ndítsjiee̱ Néná boá xi konda nga ngo foaꞌatjiyajoo̱n xota̱ xi bendikón Néná, kó ꞌboxiéꞌá, tsi̱ꞌe̱ nga jmí ni ka̱májiín.

⁸ Chítꞌachi̱bo̱a̱yajnú, tsi̱ꞌe̱ nga xcha̱jnú nga ndaxota̱ Néná. ¡Achichíra̱tsjaa̱ kui nda̱ xi Néná ꞌniákón!

⁹ Jún xi xota̱ tsjiee̱ Néná, cha̱ndikónjnú kuí, ngatꞌa̱ ta̱jmìjínni xi chajaa̱ xota̱ xi bendikón Néná.

¹⁰ Ndií xandi̱je̱e̱ chjieén ni kó bojó maá, ta̱nga xota̱ xi mongase Néná, ngayeje ni xi ndaa̱ xi kꞌuieé.

¹¹ Ja̱bíchonjnúꞌun jún ndí jákjíndí, ¡tasiénijónjnúꞌun! Kokoyámárajnúꞌun tsi̱ꞌe̱ nga xcha̱ndikónjnú Néná.

¹² ꞌYá nda̱a̱ bo̱a̱ xi mejeén nga kꞌuieé kjo̱a̱mindyion, kui xi mejeén nga tsie ka̱maa̱, tsi̱ꞌe̱ nga sku̱i̱e̱ ni xi ndaa̱.

¹³ Ngata̱ boeꞌéndièjíi̱n najen nga ni xi ndajiín ku̱i̱chji̱a̱, ko̱jo ngata̱ boeꞌéndièjíi̱n ndso̱ꞌbe nga éndísó ku̱i̱chji̱a̱.

¹⁴ Ti̱xínboeꞌée̱ ni xi ndajiín, kó ni xi ndaa̱ ti̱ꞌin, ti̱ndyi̱sé ji kjo̱a̱xioó, kó kui tꞌentji̱ngi ji.

¹⁵ Néná ngatsjéni̱xtjin nga tsꞌénkotsijee̱n xota̱ xi kixi̱i̱, kó ntꞌieé kjiꞌanga ni̱ma̱ tsó nga chji̱a̱a̱.

¹⁶ Ta̱nga kje̱n Néná kondra̱ tikónnii̱ xota̱ xi ni xi ndajín ndyi̱tsꞌe̱én, tsi̱ꞌe̱ nga tsá sa̱ꞌínkjié kjo̱a̱foaꞌátsjien xi kisꞌiee̱ kui nga̱sondiee̱.

¹⁷ Ni̱ma̱ tsó xota̱ xi kixi̱i̱ nga chji̱a̱a̱ Néná, kó Néná ntꞌieé, kó foaꞌáxiín ngayeje ni xi nda̱ kjimaa̱.

¹⁸ Néná achichí tiña tikónnii̱ xota̱ xi ndasen síndo ini̱ma̱a̱, kó ꞌboxiéꞌá xota̱ xi je ni̱ma̱ síndo a̱si̱énni̱xtjii̱n.

¹⁹ Achichí má kjo̱a̱ni̱ma̱ xi foaꞌajin xota̱ xi kixi̱i̱, ta̱nga Néná boá xi sa̱ꞌíndé kjo̱a̱a̱ ngayeje kui nii̱.

²⁰ Néná boá xi koo̱n ngayeje ńdaa̱ kui xotaa̱, kó nde ngojín kui ńdaa̱ xi chjátꞌó.

²¹ Xota̱ xi ndajiín, ti̱kuíní ni xi ndajín xi katsꞌén xi sa̱ꞌínkꞌién, kó xota̱ xi chꞌoo̱ xota̱ xi kixi̱i̱, kuí boá xi si̱ꞌankaꞌa jé.

²² Néná kꞌo̱xiéꞌá kjo̱a̱mindyioo̱n xota̱ xi mosoo̱ kui, kó ka̱majéjiín xota̱ xi Néná kjimaꞌniátakón.