Xo̱jo̱n Salmoo̱ 26 - Xo̱jo̱n eén Néná

Ngatsjéni̱xtjin nga kixi̱ ka̱ma an ngindyikin ji

Só xi katsꞌénda Ndabii̱.

¹ Ji Ne, kixi̱ ti̱ꞌinsénní, ngatꞌa̱ kixi̱ tikòn an, kó nde jó nde jánjín ꞌbijñáa̱ ini̱ma̱na nga ji ꞌniákoo̱n.

² Chítꞌeni Ne, kó chjátꞌeyekínní, chítꞌe ji ni xi tsꞌenkjó án, ko̱jo ni xi tjíjin ini̱ma̱na.

³ Ngatꞌa̱ ngatsjéni̱xtjin nga tsꞌenkjó án kjo̱a̱ni̱ma̱takóo̱n, kuíni nga kjo̱a̱kixi̱i̱ boá xi fitji̱ngi an.

⁴ Ki̱a̱jín tsꞌenkamajo̱ an xota̱ xi kixi̱jín, ti̱nde ki̱a̱jín tsoꞌbájo̱ an xota̱ xi jókje̱n,

⁵ ¡Achichí chꞌóna kjiꞌanga matikó xota̱ xi chꞌo ndyi̱tsꞌèn, kó jmíni̱xtjin ki̱a̱ kꞌuíndotꞌana xota̱ xi ꞌniú ndajiín!

⁶ Koniejón an ndsa̱ án, tsi̱ꞌe̱ nga ngiti̱ jmí jé kꞌuiéjínna, kó bo̱a̱ tsꞌén nga ka̱ma kjótsoꞌbá an ki̱a̱ tꞌa ṉchandikóo̱n, ji Ne,

⁷ tsi̱ꞌe̱ nga ko̱nda̱ꞌyaá nda̱na nga tsjaa ndokꞌóchji̱ì, ko̱jo tsi̱ꞌe̱ nga xiyà an ngayeje ni yiꞌi xi kiniꞌín ji.

⁸ Ji Ne, achichí tsjána ndiꞌa nínga tindyin ji, ko̱jo ki̱a̱ ngi̱ndie nínga boke ji kjo̱a̱jèe̱.

⁹ Ngata̱ ki̱a̱jín ngi̱jii̱n xota̱ jeé niꞌínkꞌínní, ko̱jo tsi ki̱a̱ ngi̱jii̱n xota̱ xi ndyi̱tsꞌènkꞌién ini̱ma̱a̱,

¹⁰ kui xota̱ xi je ngi̱ya tsja tikón ni xi ndajiín, kó tsja xi kixi̱i̱ tjikítsie maá to̱n xi katsꞌén nga tsꞌenṉcha̱.

¹¹ Ta̱nga an ki Ne, to̱kó kixi̱ kotíjña̱ an, ngatamani̱ma̱a̱ an, kó ꞌna̱xiéꞌéní.

¹² Tꞌanangi xi ꞌniú tikón boá, nínga síndosón ndsa̱ko án, kuíni nga nínga matikó xota̱ na̱xi̱ńdáa̱, ki̱a̱ ndatsꞌèn kuichjiá an kjo̱a̱a̱ ji.