Xo̱jo̱n Salmoo̱ 25 - Xo̱jo̱n eén Néná

Tasíke̱jejne̱ kó chínjne̱

Só xi katsꞌénda Ndabii̱.

¹ Ji bo̱a̱ Ne, jí boá xi kjinikꞌaa ini̱ma̱na,

² ji Ne tsa̱ꞌa̱n, jí boá xi ꞌniákoo̱n, mejénjínna nga kjo̱a̱soboá kjo̱a̱ꞌa an, mejénjínna nga ko̱jno̱kiena kondra̱na.

³ Ja̱koxi̱ boá nga nde ngojín xota̱ xi ji kjimaꞌniátakoón xi kjo̱a̱soboá kjo̱a̱ꞌa, kuí boá xi ngatjaꞌa kjo̱a̱soboá, kui xi nde jmí kjo̱a̱jiín nga ji ndyi̱kjánjo̱o̱.

⁴ Ji Ne, takéní ndi̱yàa̱, takoyèní ndi̱yà xí mejeén nga kjuín án.

⁵ Ki̱a̱ tꞌenje̱ní nínga tikón kjo̱a̱kixi̱i̱, kó takoyèní, ngatꞌa̱ jí boá Ne xi tsꞌaxiéꞌána.

⁶ Ngatjaꞌátsjieen an, ji Ne, nga ngatsjéni̱xtjin nga tjiín kjo̱a̱tjó ko̱jo kjo̱a̱ni̱ma̱takón jí.

⁷ Ti̱ꞌinchíyé ji jé xí katsꞌen an, ko̱jo kjo̱a̱bixkán xi katsꞌen an nga xo̱ngò án. Ji Ne, ta̱ngatꞌanii̱ kjo̱a̱ni̱ma̱takóo̱n, ko̱jo kjo̱a̱ndàa̱ nga ngatjaꞌátsjieen an.

⁸ Ndaxota̱ ko̱jo kixi̱ boá Néná, kuíni nga, kuí boá xi ko̱kóyaá xota̱ jeé ndi̱yà xí ndaa̱.

⁹ Kuí boá xi ko̱e̱je̱jo xota̱ xi ni̱ma̱kjo̱a̱a̱ ndi̱yà xí kixi̱i̱, kó ko̱kóyaá xota̱ xi ntꞌiéꞌeén ndi̱yà xí ko̱e̱je̱.

¹⁰ Kjo̱a̱ni̱ma̱takón ko̱jo kjo̱a̱kixi̱ boá, ngayeje ndi̱ya̱à Néná, kó kuí boá ni xi sa̱ko̱ó xota̱ xi sa̱ꞌínkjatjosón kjo̱a̱ꞌbíndàa̱, ko̱jo xi ku̱i̱ntꞌiéꞌeén kjo̱a̱botíxomàa̱.

¹¹ Ta̱ngatꞌanii̱ kjo̱a̱tjó xi tjiín ji Ne, ti̱ꞌinjetakínní jé ꞌniú xí katsꞌen an.

¹² ꞌYání bo̱a̱ kui xota̱ xi bendikón Néná. Kuí boá xi ko̱ko̱ó ndi̱yà xí kjo̱a̱ꞌájin.

¹³ Tji̱e̱nga tjíndo, nda ko̱e̱je̱e̱, kó xota̱ tji̱e̱e̱ sa̱ko̱ó tꞌanangi.

¹⁴ Ni xi tjiꞌmaá Néná, kuí boá xota̱ xi bendikón kuí, kó kuí boá xi ko̱ko̱ó kjo̱a̱ꞌbíndaa̱.

¹⁵ Ngatsjéni̱xtjin nga ji tsꞌenkjoó nga kjíxꞌá án ndyikón án, ngatꞌa̱ jí boá xi ko̱ꞌna̱xiéꞌéní ki̱a̱ nínga tikón chja̱ya̱a̱.

¹⁶ Tsitsíjinní, kó ni̱ma̱ ngatamaa̱ an, ngatꞌa̱ tikón so̱bo̱a̱ án, kó achichí ndasen tikòn an.

¹⁷ Achichí nda̱ kjimaa̱ ini̱ma̱na, kó kjima ꞌniú ngase kui nii̱, ¡chje̱ꞌéxínní kuí kjo̱a̱ndasee̱n!

¹⁸ Tsitsíjìi̱n kjo̱a̱ndasenna, ko̱jo nga achichí je jenda an, ¡kó chje̱ꞌéxínní ngayeje jé xí jè katsꞌen an!

¹⁹ ¡Tsitsíjìi̱n kótjín kondra̱ tjínna! ¡Tsitsíjìi̱n kótsꞌèn nga ta̱nisién chꞌoo̱ an!

²⁰ ¡Chínní, kó ꞌna̱xiéꞌéní kjo̱a̱a̱ kui xotaa̱! Mejénjínna nga kjo̱a̱soboá kjo̱a̱ꞌa an, ngatꞌa̱ jí boá xi mongasee̱ nga xchínní.

²¹ Jí boá xi tsꞌénkoyaa̱. Kjo̱a̱kixi̱na ko̱jo kjo̱a̱a̱ nga jmíjínna jé, kuí boá kui nii̱ xi sa̱ꞌín nga sa̱ꞌin an.

²² ¡Ji Ne, ꞌna̱xiéꞌé ji xota̱ na̱xi̱ńdá Israee̱l, kjo̱a̱a̱ nga achichí nda̱ kjimaa̱!