Xo̱jo̱n Salmoo̱ 18 - Xo̱jo̱n eén Néná

Ndokꞌóchji̱ì Ne

Só xi katsꞌénda Ndabii̱, nda̱ xi nda katsꞌénxájo̱ Néná. Ndabii̱ katsꞌéndaa̱ Néná kui soó, kjiꞌanga tsꞌaxiéꞌá ngi̱ya tsja Sauu̱l ko̱jo kondraa̱.

¹ ¡Ji Ne, achichí tjóna ji, ngatꞌa̱ jí boá xi boeꞌéní ngaꞌniú!

² Ji Ne, jí boá xi xikoó ngo ndi̱jo̱je xi tsa̱ꞌa̱n, jí boá xi xikoó ngo ndiꞌaa̱ re, ko̱jo jí boá xi niꞌíndéní. Ne tsa̱ꞌa̱n, jí boá xi ngaꞌniúna, ko̱jo jí boá xi chínní, jí boá xi xikoó ngo ni xi ꞌbíchjaá ni xi ndajín, jí boá xi ꞌnaxiéꞌéní nga niꞌínkjìn jí ngaꞌniúu̱. Jí boá xi xikoó ngo ngi̱ndie xi ꞌniú nkꞌa nínga botíjña̱ ꞌma an.

³ Néná boá xi kuichjiáa̱, ngatꞌa̱ kuí boá xi tsoboaá nga si̱ꞌantsjaa̱, kó kjo̱tjoꞌa an ngi̱ya tsja kondra̱na.

⁴ Ngo ndi̱yà, kjo̱a̱bo̱yaa̱ kamámejeén katsoboána, kó ni xi ta̱nisién ndajiín xindajín Beliaa̱l indyiándikónna.

⁵ Jaꞌatjiyajonna chja̱ya̱a̱ nga̱tsjo̱ó, ko̱jo kjo̱a̱bo̱yaa̱, kó mejeén kꞌien an katsaki.

⁶ Kjiꞌanga nda̱ kamána, tsíchji̱a̱a̱ Néná, ꞌniú tsíchji̱a̱a̱, kó kuí tsintꞌiéna ndeskande na̱ngo̱xi̱i̱, ¡kó ni xi tꞌíxián an ngindyi̱ko̱n, askayánijon kui!

⁷ Ngo kjo̱a̱ndi̱ko̱n jaꞌa, kó jatsié tꞌanangii̱, kó na̱xi̱i̱ kamátíyaá ndeskande ngindiee̱, ¡kamátíyaá, ngatꞌa̱ Néná katsꞌénxchán!

⁸ Tsꞌaxié má ṉdi̱ ṉtjo̱n, tsꞌaxié má ndiꞌí tsꞌoa, kó katsꞌénkixó má xꞌué.

⁹ Néná íjñaxtien nkꞌajmii̱, kósꞌe̱ jatjajen, kó jmá má kamá ṉdi̱ xi kisꞌijña ngindie se.

¹⁰ Ngo keruu̱b kisꞌijñasón, kó kijítji̱e̱n ki̱a̱ nga̱soón tjo̱o̱.

¹¹ Ngo ṉdi̱ jmá íjñá nínga kisꞌijñajin, xi xikoó tsi ngo ńjño kortina̱ kamá nga ngo foaꞌatjiyajoo̱n, jñó kamá ndáfoaa̱, ko̱jo ṉdi̱i̱ nkꞌajmii̱.

¹² ¡Kó nda̱a̱ ndiꞌií kjo̱a̱jee̱ Néná jaꞌajin kui ṉdi̱ jñoó, kó ki̱a̱ jatjoni ndókoá, ko̱jo xꞌué!

¹³ Néná katsꞌéntsen nkꞌajmii̱ ngo cho̱ꞌo̱n, kó kandaꞌyá nda̱a̱, ngi̱jii̱n ndókoá ko̱jo xꞌué.

¹⁴ Asién yáyojoó, kó katsꞌéntsojoboa, ꞌniú katsꞌénkjaꞌatꞌe, kó katsꞌéntsobéjii̱n.

¹⁵ Kó kjiꞌanga kiniꞌínxchín jí, ji Ne, kjiꞌanga kaxó má ńtjen ji, kamáyà ngindiee̱ ndáchíkoón, kó ti̱ kamáyà ngindie tꞌanangii̱ nga.

¹⁶ Ndeskande nínga nkꞌaa̱ nkꞌajmii̱ katsjána tsja, kó tsꞌaxiéjinna ngi̱jii̱n kui ndáfoa tsiee̱.

¹⁷ Katsꞌéndéna ngi̱ya tsja kui kondra̱ xi ꞌniuú, ko̱jo kui xota̱ xi chꞌoo̱ an, ngatꞌa̱ ꞌniú ngase kamá ta̱bo̱a̱jiín an.

¹⁸ Kjiꞌa má askjanjo̱na nga jaꞌa an kjo̱a̱ni̱ma̱, ta̱nga Néná boá xi asíko̱jona.

¹⁹ Ngo ngi̱ndie xi tiyá kijíjo̱na, kó tsꞌaxiéꞌána, ngatꞌa̱ tjó kamaá an.

²⁰ Néná katsjána ngo ni nda xi tsoboána kjo̱a̱a̱ nga kixi̱ an, kó achichí nda katsꞌénjo̱na ngatꞌa̱ tsjie ndsa̱ án.

²¹ Ngatꞌa̱ ki̱a̱ tsꞌénfítji̱ngi an ndi̱ya̱à Néná, kó jmí ni xi ndajín tjítsꞌenjín an, ti̱nde tjítsꞌenkjinjáa̱n yojona kui.

²² Ngatꞌa̱ jè kamábe an ngayeje kjo̱a̱botíxomaa̱, kó tsꞌénꞌbijñámasiénjín an kjo̱a̱kitii̱.

²³ Nde ngo jé tjítsꞌenjín an ngindyi̱ko̱n kui, kó jè katsꞌenkjìi̱n yojona ni xi ndajiín.

²⁴ Néná katsjána ngo ni nda xi tsoboána kjo̱a̱a̱ nga kixi̱ an, ko̱jo nga tsjie ndsa̱ án ngindyi̱ko̱n kui.

²⁵ Ni̱ma̱ ka̱maa̱ xota̱ xi ni̱ma̱ maa̱, kó kixi̱ si̱ꞌinje̱ ji xota̱ xi kixi̱i̱.

²⁶ Tsjie tsꞌén ko̱kée̱ yojòo̱ xota̱ xi tsjiee̱, ta̱nga xota̱ xi mañaa̱, ko̱kéríi̱ nga kjínkón ngase ji.

²⁷ Nga ja̱koxi̱, jí boá xi ꞌna̱xiéꞌé ji xota̱ na̱xi̱ńdá xí ni̱ma̱kjo̱a̱ síndoo̱, kó ni̱ma̱kjo̱a̱ niꞌínje̱ ji xota̱ xi nkꞌakoo̱n.

²⁸ Nga ja̱koxi̱, jí boá xi niꞌíntsijinní nga tikón an, Ji Ne, jí boá xi niꞌíntsijíi̱n ndi̱yà jñóna.

²⁹ Nga ja̱koxi̱, sa̱ꞌinñáa̱ kjín xtín jájún tsi ji xi ko̱si̱ke̱jení, tsi ji tindyinje̱ní, ka̱mana sa̱ꞌìi̱n na̱xi̱ńdáꞌniuú nga skjanjo̱ an.

³⁰ Ndi̱ya̱à Néná achichí nda, kó eén jè kichitꞌa, kuí boá xi xikoó ngo ni xi ꞌbíchjaá ni xi ndajín, tsi̱ꞌe̱ xota̱ xi kui mongase nga skoón.

³¹ Ngatꞌa̱ ꞌyání xi Néná tsi kuijín xi ndi̱a̱ná, kó ꞌyání bo̱a̱ kui ndi̱jo̱jee̱ tsi kuijín xi Néná.

³² ¡Néná boá xi tsjána ngaꞌniú, kó kuí boá xi tsꞌénkixi̱ ndi̱yàna!

³³ ¡Kuí boá xi tsjá ngaꞌniuú ndsa̱ko án, xikó maá ngo ndi̱kꞌijñá! Kuí boá xi ꞌniú tsꞌénkꞌijñána, tsi̱ꞌe̱ nga kꞌo̱kajín an nínga nkꞌaa̱.

³⁴ Kuí boá xi bokoyána xikótsꞌèn skjan an kjo̱a̱xcha̱án, kó tsjá ngaꞌniuú tjiana, tsi̱ꞌe̱ nga sa̱ꞌinxájo̱ yáchjonyá xi ki̱cha̱ bronsee̱.

³⁵ Jí boá xi katseꞌéní ni xi ꞌbíchjaá ni xi ndajín nga kaꞌnaxiéꞌéní, ndse̱ kixi̱ boá xi tsꞌéntsjá ngaꞌniúna, kó kjo̱a̱ndaxota̱a̱ boá xi tsꞌénbosikójona.

³⁶ Jí boá xi kiniꞌíntiyé ji ndi̱yà nínga fi an, kó ńdatoꞌoo̱ ndsa̱ko án katsꞌénchi̱nijín.

³⁷ Tsangatji̱ngíi̱ kondra̱na, kó jachótji̱ngìi̱, kó kjindibáꞌoyájín an ngaskande nga katsꞌenkjié yeje an.

³⁸ Katsjachjíi̱, kó ngiti̱ jastjíe̱njín ngase, ki̱a̱ ixó ngindie ndsa̱ko án.

³⁹ Jí boá xi katseꞌéní ngaꞌniú, tsi̱ꞌe̱ nga kjuín án kjo̱a̱xcha̱án, jí boá xi kiniꞌínkindi ji kui xi askjanjo̱na.

⁴⁰ Jí boá xi kiniꞌín ji nga kijíꞌoyá kondra̱na, kó bo̱a̱ tsꞌén nga katsꞌenkjié an kui xi katsꞌénchꞌóna.

⁴¹ Ata̱ ni̱ma̱ katsó nga tsíchji̱a̱, ta̱nga nde ngojín xi tsꞌaxiéꞌá, ngaskande Néná tsíchji̱a̱a̱, ta̱nga nde katsꞌénsénjiín.

⁴² Katsꞌenxi̱ ndso̱ko̱a̱n ndso̱ko̱a̱n an xikoó xa̱ xi fíjo̱ tjo̱o̱, kó xikoó tsi ndáse nga atitsojo an ngi̱ya ndi̱yàtieé.

⁴³ Jí boá xi kaꞌnaxiéꞌéní kjo̱a̱a̱ kui xota̱ xi ndyi̱mongase nga skjánjo̱na, kó ngito̱ko̱o̱ na̱xi̱ńdaá kiniꞌínní, sꞌe̱ xota̱ xi nde bejín an boá xi katsꞌénsénna.

⁴⁴ Ta̱ niꞌin ntꞌié kjo̱a̱a̱ an, kó ja̱kamá ntꞌiéꞌénna, xota̱ xi xín nangii̱, án boá xi atixomáa̱.

⁴⁵ Xota̱ xi xín nangii̱, je kamá inda, kó ngaskande fotsié má nga fotjoxie nínga tjíndo ꞌmá.

⁴⁶ ¡Tsie ngatamaa̱ Néná! ¡Ngatamachikonñé ndi̱jo̱ jena! ¡Nganiꞌántsjaá kui Ne xi tsꞌaxiéꞌána!

⁴⁷ ¡Kui Ne xi tsꞌéngojo ni xi niꞌánjo̱na! ¡Kui Ne xi ꞌbíndo ngindie ndsa̱ko án nangii̱!

⁴⁸ Jí boá xi kaꞌnaxiéꞌéní kjo̱a̱a̱ kondra̱na. Jo̱o̱n, jí boá xi nkꞌa ngase ikꞌíjñíní ta̱bo̱a̱jiín kui xi an askjanjo̱na, kó kaꞌnaxiéꞌéní ngi̱ya tsja xota̱ xi tamaá.

⁴⁹ Kuíni nga án boá xi kuichjiá an kjo̱a̱a̱ ji ngi̱jii̱n xota̱ na̱xi̱ńdaá Ji Ne, kó siee salmo̱ nga skuiendikón án jaꞌée̱n.

⁵⁰ Néná boá xi tsjaá nga tsꞌén re xi kui tsi̱ꞌe̱, kó jè akó kjo̱a̱ni̱ma̱takón xi tjiín, kjo̱a̱a̱ kui xi je jaꞌájin kui, kó kuí boá xi Ndabii̱ kui xi xota̱ tji̱e̱e̱ ngatsjéni̱xtjin.