Xo̱jo̱n Salmoo̱ 105 - Xo̱jo̱n eén Néná

Ni xi katsꞌén Néná ngandaa̱ xota̱ Israee̱l

¹ ¡Ko̱e̱ꞌée̱ ndokꞌóchjì Néná! ¡Kꞌuiyáa̱ xota̱ na̱xi̱ńdaá, ngayeje ni xi je katsꞌén kuí!

² ¡Ko̱ndáa̱ só! ¡Kꞌuiyá kjo̱a̱ndikón yiꞌi xi je katsꞌén!

³ ¡Tsja ngatamaná nga kꞌuiyá nga jmíjín ingo Ne xi xikoó xi tsa̱ñá! ¡Tsjangatamaa̱ ini̱ma̱ná ngayeje ñá xí niꞌántsjáa̱ Néná!

⁴ Si̱ꞌantiñáa̱ yojoná kui Néná xí tjiín ngaꞌniuú, kó ngatsjéni̱xtjin nga tsjangatamaa̱ ni xi si̱ꞌan.

⁵ Ngatjaꞌátsjienná ni xi fíndikónná xi je katsꞌén Néná, ngatjaꞌátsjienná kjo̱a̱ndikón ko̱jo kjo̱a̱botíxoma xi katsjáná.

⁶ Ji̱n boá xi xota̱ tji̱e̱e̱ Abraa̱n ko̱jo Jakoo̱b, ji̱n boá xi xota̱ tji̱e̱ xi jaꞌájin Néná, kó ji̱n boá xi ndyi̱niꞌánxátꞌajne̱ kui, kuíni nga, ¡ndaꞌyájnúꞌun!

⁷ Néná ndokjo̱a̱niji̱n, eén boá xi sꞌikitsieni nga̱sondiee̱.

⁸ Kji̱e̱ chíyájiín kjo̱a̱ꞌbínda, ko̱jo ni xi katsóyàtjón nga sa̱ꞌín.

⁹ Abraa̱n boá xi katsꞌénjo̱ kui kjo̱a̱ꞌbíndaa̱, kó Isaa̱ boá xi sa̱ꞌinkjatjosón an katsoó.

¹⁰ Kó xota̱ na̱xi̱ńdá Israee̱l íjñaá, ngo kjo̱a̱ꞌbínda xi kꞌuijñá ngatsjéni̱xtjin,

¹¹ kó bi̱ katsoó: «Án boá xi tsjaa nangi Kanaa̱n. Kuí boá nangi xi katsoboaá jí».

¹² Kjínjín kamájne̱ ji̱n, ¡ji̱n boá xota̱ xi jmí na̱xi̱ńdá kisꞌiejínjne̱!

¹³ ¡Ngatsjéni̱xtjin nga xki̱ na̱xi̱ńdá, xki̱ na̱xi̱ńdá, xki̱ ngi̱ndie nínga botíxoma, xki̱ ngi̱ndie nínga botíxoma kisꞌińtjajne̱!

¹⁴ Ta̱nga Néná jmíni̱xtjin katsjandiè nga tjín xí katsꞌénxtíjne̱, kó bi̱ tsꞌén atíxomaa̱ já ree̱:

¹⁵ «Ngata̱ niꞌánjo̱jínjnú na̱xi̱ńdá xí án jaꞌajin an, ngata̱ jmí ni xi ndajín niꞌánjo̱jínjnú xota̱ chji̱ni̱e̱ꞌénna».

¹⁶ Achichí kjindiá kamá ki̱a̱ nangi Kanaa̱n, ngatꞌa̱ Néná katsꞌénkjié nínga tjitjíe̱ to ndso̱ko̱a̱n ṉño̱paa̱n.

¹⁷ Ta̱nga kui ja̱bo̱a̱ jè índa nga Kosiee̱ xi kꞌo̱xiéꞌájne̱, kui nda̱ xi já ntsꞌi̱e̱ atíñá ngindiee̱, xikoó tsi ngo moso̱.

¹⁸ Já Ejiptoo̱ ni̱ma̱kjo̱a̱ íjñá Kosiee̱, kó ndo̱bo̱a̱yà íjñaꞌya,

¹⁹ ngaskande ni̱xtjin nga jatjosón ni xi katsóyàtjón kuí: ¡kui ni̱xtjii̱n Néná íjñátsijen nga ni xi ja̱koxi̱ boá xi katsó Kosiee̱!

²⁰ Kósꞌe̱ nda̱ ree̱ nangi Ejipto̱, kui xi achichí kjín nangi atíxomaa̱, katsjákjo̱a̱ nga ikꞌíjñandé Kosiee̱, kó bo̱a̱ kamá.

²¹ Kó nda̱ ree̱ katsjaá xá tsi̱ꞌe̱ nga Kosiee̱ xi ko̱tíxoma ngayeje nangii̱, ko̱jo ngayeje ni xi kisꞌiee̱ kui nda̱ ree̱.

²² Kó Kosiee̱ akóyaá xota̱ xi tsjaá kjo̱a̱botíxoma nda̱ ree̱, ko̱jo xota̱ xi bosikójo, kó katsóyaà kjo̱a̱kjíntakoón.

²³ Xota̱ xi xchájne̱ jachó nangi Ejipto̱, kó ki̱a̱ katseꞌéndieè nga ki̱a̱ kisꞌińdo.

²⁴ Néná katsjandiè nga kamákjín xota̱ na̱xi̱ńdájne̱, kó ꞌniú ngase katsꞌén ta̱bo̱a̱jiín xota̱ xi kondraa̱.

²⁵ Kuíni nga xota̱ Ejiptoo̱ katsꞌénchꞌójne̱ ko̱jo ndajín katsꞌénjo̱jne̱.

²⁶ Kósꞌe̱ Néná katsangiyajne̱ Moisee̱ ko̱jo Aaroo̱n, kui moso̱ xi ꞌniú tjó ngasee̱,

²⁷ kó ki̱a̱ nangi Ejipto̱ kui jaá achichí kjo̱a̱ndikón xí yiꞌi katsꞌén.

²⁸ Néná katsangiya kui na̱xi̱ńdaá ngo jñó xi achichí ꞌniú, ta̱nga xota̱ Ejiptoo̱ nde katsꞌénsénjiín kui ni xi fíndikónná.

²⁹ Néná jín katsꞌén ndejèꞌ xi chji̱a̱ni nangi Ejipto̱, kó katsꞌénkjiesón ngayeje tji̱o̱o̱.

³⁰ Ngayeje nangi Ejipto̱ kisꞌikitsieni xkji̱e̱, ¡ngaskande ndo̱bo̱a̱xa̱á nínga atíxoma nda̱ ree̱ kisꞌie xkji̱e̱!

³¹ Néná katsjá ngo kjo̱a̱, kó ngayeje na̱xi̱ńdaá kisꞌikitsieni chisien ko̱jo ndi̱ꞌi̱.

³² Néná ngindiee̱ nga stsé sa̱ngíyá, ta̱sá ndókoá katsangiya, kó íkitsieni ndiꞌí kuí na̱xi̱ńdaá nga katsꞌénkjaꞌatꞌe.

³³ Ngayeje nangi Ejipto̱ nga Néná iskjítꞌó nínga kjiꞌi tostsi̱je̱è ko̱jo toꞌingo̱, ¡kó katsꞌénxi̱ yaá!

³⁴ Ta̱ ngo tsí kjo̱a̱ katsjá, kó kjindibá achichí kjín chjo̱bo̱a̱

³⁵ xi katsꞌénkjié ngayeje to xi boajá ngi̱jin kꞌijñaá, kó ngayeje xka̱ ko̱jo kꞌijñá xí sa̱si̱e̱e̱, kixí.

³⁶ Néná katsꞌénꞌoón nga katsꞌénkꞌién já xo̱ngò xi ꞌniú ko̱jo xi nda ngasee̱ nangi Ejiptoo̱, ¡ngayeje na̱xi̱ńdaá nga jesón ndí xí tjoón nga ngo nga ngo xtín xota̱ ngo ndiꞌa!

³⁷ Ta̱nga Néná tsꞌaxiéni nangi Ejipto̱ xota̱ xi xchájne̱ nga ndyi̱yaꞌa ni to̱ntiboa ko̱jo ni to̱nsinié, kó nde ngojín xi íchjaá nga bo̱a̱ katsꞌén.

³⁸ Kjiꞌanga jatjoni nangi Ejipto̱, xota̱ Ejiptoo̱ achichí tsjá kamaá, ngatꞌa̱ katsakjónnií xota̱ xi xchájne̱.

³⁹ Néná askoo̱n xota̱ xi xchájne̱ nga katsꞌénkjién ngo ṉdi̱, kó nga jñoó ngo ndiꞌí katsꞌéntsijennii̱.

⁴⁰ Kui xotaa̱ tsíꞌá nichinie, kó Néná katsangiyaa̱ ni̱sie tosafoá, ¡katsꞌénkꞌíxió bojoó nga katsjaá pan xi kjindibáni nkꞌajmii̱!

⁴¹ Kó jó tjín katsꞌén ngo ndi̱jo̱, kó jatjonii̱ ndáfoa xikoó tsi ngo ndejèꞌ xi tsꞌénmonga xtji̱e̱e̱n nangi kixií.

⁴² Néná jmíni̱xtjin katsꞌénchíyà ni xi índajo̱ nga sa̱ꞌínkjatjosón, xi katsóyaà Abraa̱n, kui nda̱ xi mosoo̱.

⁴³ Askjandáyá má, kó tsja kamá kjiꞌanga Néná tsꞌaxiéni nangi Ejipto̱ kui xota̱ na̱xi̱ńdá xí Néná je jaꞌájii̱n,

⁴⁴ tsi̱ꞌe̱ nga kui xi sa̱ꞌínkꞌasꞌiee̱n tꞌanangii̱ xota̱ xi kje̱ꞌe nangi chji̱a̱ni. ¡Tsi̱ꞌe̱ xota̱ xi xchájne̱ kamá tꞌanangi nínga kje̱ꞌe xota̱ ítji̱e̱ nii̱!

⁴⁵ Ta̱nga Néná íjñaá nga sa̱ꞌínkjatjosón ngo ni, nga chjiéngá sku̱i̱e̱ndikón, ko̱jo nga sa̱ꞌínkjatjosón kjo̱a̱botíxomaa̱ ko̱jo kjo̱a̱kitii̱. ¡Si̱ꞌantsjàa̱ Néná!