Xki̱ 25 - Xo̱jo̱n eén Néná

Xota̱ Israee̱l katsꞌéndikón ne Baa̱l-Peoo̱r

¹ Kó xota̱ Israee̱l nga kisꞌińdo nangi Sitii̱n, ítsꞌi̱yanii̱ nga kisꞌiejo̱ ꞌma ínchjín xí chji̱a̱ni xota̱ tji̱e̱e̱ Moaa̱b.

² Kui ínchjiín katsóyaà kui xotaa̱ tsi̱ꞌe̱ nga ko̱e̱je̱ sꞌué xí tsꞌén. Kó ki̱a̱ nijan iskjinie nichinie, kó nijan katsꞌéndikón ne xi tjiín xota̱ tji̱e̱e̱ Moaa̱b.

³ Kó bo̱a̱ tsꞌén nga ko̱jo xota̱ Israee̱l katsꞌéndikón ne Baa̱l-Peoo̱r. Kósꞌe̱ Néná achichí katsꞌénxchán,

⁴ kó bi̱ katsoó Moisee̱: «Tꞌítikí jí ngayeje ngito̱ko̱o̱ xota̱ na̱xi̱ńdaá, kó ti̱ꞌinkꞌin ji nga kjuínboéꞌé ji, xikoó tsi ngo kjo̱a̱tjó nganda tsa̱ꞌa̱n ngatama. Nga ni̱xtjii̱n nga ti̱ꞌin ji kui nii̱, kó bo̱a̱ tsí tsꞌén nga kjo̱a̱ꞌajenda an, kó ngiti̱ sa̱ꞌínxchánjo̱jín an xota̱ na̱xi̱ńdá Israee̱l».

⁵ Kó Moisee̱ tji̱e̱nmá kijíkoón xota̱ xi xchá xi chji̱a̱ni Israee̱l, kó bi̱ katsoó nga atíxomaa̱: «Nga ngo nga ngojnú, chjiéngá si̱ꞌankꞌiénjnú xota̱ tji̱e̱jnú xi kijítsꞌéndíkón ne Baa̱l-Peoo̱r». Kó bo̱a̱ katsꞌén kui jaá.

⁶ Kó tji̱e̱nga Moisee̱ ko̱jo xota̱ Israee̱l ndyi̱kjandà ki̱a̱ nínga bitjasꞌi̱e̱nnii̱ ndiꞌandikoón, kamábe nga ngo nda̱ Israee̱l katsangisꞌien ndiꞌa nínga tikón ngo na̱ xi chji̱a̱ni xota̱ tji̱e̱e̱ Mandiaa̱n.

⁷ Kósꞌe̱ Finee̱, kui xi ndií Eleasaa̱, ko̱jo xi ndíndee̱ Aaroo̱n, iskjíbé yáyojó,

⁸ kó kijí ndiꞌaa̱ kui nda̱ Israee̱l, kó katsꞌénkꞌién nga katsꞌénkjaꞌaxtikjaá kui yáyojoó nda̱ Israee̱l, ko̱jo kui na̱ xi chji̱a̱ni xota̱ tji̱e̱e̱ Mandiaa̱n. Kó bo̱a̱ tsꞌén nga Néná ngiti̱ katsꞌénjéjín ngasee̱ xota̱ Israee̱l.

⁹ Ta̱nga kui ni̱xtjii̱n, jè kan nijón mi̱ ma xota̱ Israee̱l xi je jesoón.

Ni xi katsóyàtjón Néná nga sa̱ꞌín ngandaa̱ Finee̱

¹⁰ Néná bi̱ katsoó Moisee̱:

¹¹ «Finee̱ xikónií an, ngatꞌa̱ tsjandièjín nga kje̱ꞌe ne si̱ꞌandikón ngajona. Kuíni nga kamánii̱ nga katsꞌénkjaꞌajinda kjo̱a̱xchánna, ko̱jo nga ngiti̱ katsꞌenjéjáa̱n xota̱ Israee̱l.

^12-13 Kuí boá xi akó nga tjoó an, kó kamaá katsꞌén nga an katsꞌenjetakóo̱n xota̱ Israee̱l, kuíni nga ngotꞌe̱ ꞌne̱, ngo ni xi ndikón tsꞌénꞌbindajo̱ an kui ko̱jo xota̱ tji̱e̱e̱, nga kuí boá xi ka̱ma ngatsjéni̱xtjin chináꞌmina».

¹⁴ Kui nda̱ Israee̱l xi kiniꞌánkꞌieén Simri̱ kiꞌmí, kui xi ndií Saluu̱ kamá, ngito̱ko̱o̱ ngo xtín xota̱ xi chji̱a̱ni xota̱ tji̱e̱e̱ Simeoo̱n.

^15-18 Kó kui na̱ xi chji̱a̱ni xota̱ tji̱e̱e̱ Mandiaa̱n xi kiniꞌánkꞌieén Kosbi̱ kiꞌmí, kui xi ndií Suu̱r kamá, ngito̱ko̱o̱ ngo xtín xota̱ xi ꞌniú yandikón xí chji̱a̱ni xota̱ tji̱e̱e̱ Mandiaa̱n. Kuíni nga jaskan ngije jaꞌa chiꞌin xi kanangiyaa̱, Néná bo̱a̱ katsoó Moisee̱ nga skjánjo̱ xota̱ tji̱e̱e̱ Mandiaa̱n kó nga sa̱ꞌiín, ngatꞌa̱ kuí boá xi konnii̱ nga xota̱ Israee̱l katsꞌéntsjajo̱ ne Baa̱l-Peoo̱r.