Én xí nda xi ꞌniú tsjatsó ngasee̱ 1 - Xo̱jo̱n eén Néná

¹ Kuí bí xi̱ꞌbi̱ én xí nda xi ꞌniú tsjatsó ngase xi tsi̱ꞌe̱ Salomoo̱.

Só xi tjoón Na̱ xo̱ngo̱ò

² ¡Ai, xi̱ꞌin xi tsa̱ꞌa̱n, achichí mejénna nga ko̱ti̱ndseꞌéní katsaki! Tsja ma ngasena nga si̱ꞌindajìnní, to̱bo̱a̱jínnii̱ tsi bino̱ kꞌuí an.

³ Achichí sije̱n mana ji, xikó má je̱n ndásíjèe̱n, ngatꞌa̱ jaꞌée̱n, xikónií tsi ngo ¡ndásíje̱n xi katjon! ¡Kuíni nga ínchjín xo̱ngo̱ò, achichí mejeén ji!

⁴ ¡Tsáyè ji, kó tꞌenje̱ní nínga tindyin ji! ¡Tꞌenje̱ní ki̱a̱ ngi̱yaꞌmàa̱, re xi tsa̱ꞌa̱n! Tsjangatꞌiéná ji ko̱jo an, kó tsjá ngase ngatamana nga si̱ꞌinmejénní, ta̱bo̱a̱jiín binoo̱. ¡Ta̱ngatꞌanii̱ kui nii̱ nga ínchjín xo̱ngo̱ò, achichí mejeén ji!

⁵ ¡Jún ínchjín xo̱ngo̱ò xí chji̱a̱ni na̱xi̱ńdáꞌniú Jerusalee̱n! Na̱ jmá boá an, kó tsjákjiꞌi an, na̱ jmá án, xikó maá ndiꞌańjño xi síndo nangi Kendaa̱r. Na̱ jmá án, xikó maá ńjño kortinaa̱ ndiꞌaa̱ re Salomoo̱.

⁶ Ngata̱ ki̱a̱jín tsitsijenjnúu̱ nga jmá tji̱xin yojona, ngatꞌa̱ ndoboaá boá xi katsꞌénchjánna. I̱xti ntsꞌié án katsꞌénxchánjo̱na, kó kjo̱a̱ꞌniú katsꞌénna nga askóo̱n nínga tjitjieé tostsi̱je̱è, ¡kuíni nga askonjáa̱n yojona, ngatꞌa̱ án boá xi xikoó ngi̱ndie nínga tjitji̱e̱na tostsi̱je̱è!

⁷ Tꞌíyéní jí, ji xi ngayejení ini̱ma̱na nga tjóna, ñání ꞌmije̱ ji nga fíkjién xtín cho̱tsa̱nga̱ xi tse̱. Kó nga ma ndisꞌueé, ñání tsꞌénkjaꞌyá. Chjiénjín nga kjótsoꞌbásón an, nga ki̱a̱ kongasee ngi̱jii̱n xtín cho̱tsa̱nga̱a̱ amingo̱o̱.

Nda̱ xo̱ngo̱ò

⁸ Ji na̱ xi ꞌniú tsjákjiꞌi ngase ngi̱jii̱n ínchjín xí ꞌniú tsjákoón, tsi kji̱e̱ yejín ji, ki̱a̱ tꞌentji̱ngi ji chi̱bo̱a̱ se xtín cho̱tsa̱nga̱a̱, kó ki̱a̱ tꞌenkaꞌée̱ ndi̱xcho̱ ndí ndií ínchjiín tindsoo̱, ki̱a̱ tꞌa nínga síndo ndiꞌańjñoo̱ xota̱ xi koo̱n cho̱tsa̱nga̱a̱.

⁹ Ji chjo̱on xí tsa̱ꞌa̱n, xikó má tsꞌén ꞌmí ji, bo̱a̱ má tsꞌén fí ndi̱je̱ ínchjín xí kjien karroo̱ nda̱ ree̱.

¹⁰ ¡Achichí tsjatsꞌèn ya tꞌanijin ji ki̱a̱ ngamasiee̱n tsja̱ni̱je̱e̱n! ¡Achichí tsjatsꞌèn ya kjásen ji nga yajáyaá ixkìꞌ!

¹¹ ¡Si̱ꞌandajne̱ ji nangínijon xi to̱nsinié xi kꞌuíndoo̱ ni xi to̱ntiboa!

Na̱ xo̱ngo̱ò

¹² Tji̱e̱nga ree̱ ki̱a̱ tjítsꞌénkjaꞌyátꞌa ki̱a̱ yámíxa̱a̱, ata̱ tsjatsꞌèn kjifoaꞌándá ndásíje̱nna.

¹³ Xota̱ xi tjóna an, xikó maá ndí stsa ndásíje̱n mirra̱ xi yaꞌa an ngi̱jin chikina kjimana kui,

¹⁴ xota̱ xi tjóna an, xikónií ngo chꞌo̱ naxó aleña̱ xi boajaá tostsi̱je̱è xí tjín ki̱a̱ Engandi̱ kjimana kui.

Nda̱ xo̱ngo̱ò

¹⁵ ¡Achichí tsjákjiꞌi ji, chjo̱on xí tsa̱ꞌa̱n, achichí tsjákjiꞌi ji! ¡Ndyikin ji bo̱a̱ má kón xikoó jó tójo!

Na̱ xo̱ngo̱ò

¹⁶ ¡Achichí tsjákjiꞌi ji, xota̱ xi tjóna! ¡Achichí tsjá mána ni xi niꞌínje̱ní! Xka̱ xi sa̱si̱e̱e̱ boá xi ka̱ma ṉchan nínga tsjayójo,

¹⁷ kó yákoón boá xi ka̱ma xikoó yáseé ndiꞌaná, kósꞌe̱ xka̱a̱ yá sipree̱ boá xi ka̱ma xikoó nkꞌaa̱.