Rkaa̱ 17 - Xo̱jo̱n eén Néná

Bi̱ tsꞌén akóyá Kjisoo̱ kjo̱a̱a̱ xota̱ xi ta̱ngatꞌanii̱ kui nga tsꞌénjé xota̱ xi ngasee̱

¹ Sꞌe̱ Kjisoo̱, bi̱ katsoó nga tsíchji̱a̱jo xota̱ tsi̱ꞌe̱: Achichí niꞌin kjiꞌi nga jmíjín xi sti̱ngí kjo̱a̱a̱ nga ngo jé sa̱ꞌín, ¡ta̱nga ni̱ma̱ xò xí sa̱ꞌín ngo ni, tsi̱ꞌe̱ nga kje̱ꞌe xí sa̱ꞌínjé!

² Ta̱sá ngo ndi̱jo̱je ngatítꞌa kjásén, sꞌe̱ ngatꞌajmijin yojoo̱ ngi̱jin ndáchíkoón, ta̱bo̱a̱jiín tsi ngo ni sa̱ꞌín, tsi̱ꞌe̱ nga ngo kui jákjíndií sa̱ꞌínjé.

³ Kuíni nga, ¡chónjnú ngayeje ni xi si̱ꞌánjnú! Tsi ngo ntsꞌie sa̱ꞌín ngo jé, ti̱ꞌinxchínje̱ ji, kó tsi sa̱ꞌínkꞌoyà yojoo̱ nga ngiti̱ bo̱a̱jín sa̱ꞌín, ti̱ꞌinjetakíi̱n.

⁴ Tsi yito ndi̱yà sa̱ꞌínjé kondra̱ tse̱ nga ngo ni̱xtjii̱n, kó tsi yito ndi̱yà bi̱ ka̱tso̱o̱: “Sa̱ꞌínkꞌoyà an yojona, ti̱ꞌinjetakínní”, ti̱ꞌinjetakíi̱n.

Bi̱ tsꞌén akóyá Kjisoo̱ kjo̱a̱a̱ kjo̱a̱sꞌijii̱n

⁵ Kó já apostroo̱, bi̱ katsoó: –Ndi̱a̱, tasíke̱jejne̱ tsi̱ꞌe̱ nga ꞌniú ngase sꞌi̱jinjne̱.

⁶ Sꞌe̱ Kjisoo̱, bi̱ katsó: –Tsi ndeta̱ chií tsí sꞌijinjnú Néná, xikó má tsꞌén xi̱xi̱ xojmaá mostasaa̱, ka̱ma bi̱ kꞌuínjnúu̱ kui yá sikómoroo̱: “Ngatjoníyá ji, kó ngi̱jin ndáchíkoón ngatamatji̱e̱ ji”. Kó ku̱i̱ntꞌiéꞌénjnú kui yaá.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ moso̱ xi tsꞌénkjátjosón xaá

⁷ ꞌYání jún xi tsi ngo moso̱ tikónjnú xi tjitsꞌénxá ngi̱jin jno̱o̱ ko̱jo tsi cho̱ tsꞌénkoón, kó ngije kjoeꞌeni nga kijítsꞌénxá, bi̱ kꞌuínjnúu̱: “Ti̱tjè, kó tindyintꞌe ji yámíxa̱a̱”.

⁸ A mí tsi ta̱sá bi̱ kꞌuínjnúu̱: “Ti̱ꞌindení nichinie, ko̱jo tꞌínde yojòo̱ kó ti̱ꞌinsénní nga tꞌíyéní ni xi skjíni̱e̱ an ko̱jo ni xi kꞌuí an, kó ngije kamána ka̱ma xi̱ni̱ ji, ko̱jo sꞌi̱ ji”.

⁹ A ko̱e̱ꞌéjnúu̱ ndokꞌóchjì kui mosoo̱ kjo̱a̱a̱ nga je katsꞌén ni xi kiꞌmií. Jmíra̱ xián án.

¹⁰ Ti̱ bo̱a̱ ti̱ tsꞌén jún, ngije kiniꞌánjnú ngayeje ni xi kiꞌmíjnú, ka̱ma bi̱ kꞌuínjnú: “Moso̱ xi nde jmí ni chjíjiín boá ñá, ngatꞌa̱ ta̱kuítsí ni xi tsoboáná xí kiniꞌán.”

Bi̱ tsꞌén katsꞌéndaya Kjisoo̱ tie já xí tjiín chiꞌin xi tsꞌénkjátsón tji̱xin yojoná

¹¹ Nga kijí Kjisoo̱ na̱xi̱ńdáꞌniú Jerusale̱n, kó nga jaꞌa xtji̱e̱e̱n nangi Samaria̱ ko̱jo nangi Ngalilea̱.

¹² Nga tsꞌasꞌien ngo ndí nangi, jachókoón tie já xí tjiín chiꞌin xi tsꞌénkjátsón tji̱xin yojoná, kó ta̱ kjin kixindyia,

¹³ kó ꞌniú askjandáyà nga bi̱ katsoó: –¡Ji Kjiso̱, Mostro̱, ngatamani̱ma̱a̱ ji̱n!

¹⁴ Nga kamábe Kjisoo̱ kui jaá, bi̱ katsoó: –Tangínjnú, kó takójnúu̱ yojojnú chináꞌmii̱. Kó tji̱e̱nga ndyi̱fí ngi̱ya ndi̱ya̱à, kamátsjiejón nga katjoꞌóxiín chiꞌii̱n.

¹⁵ Kósꞌe̱ ngo kui jaá, nga kamábe nga je kamándaya, kijíꞌoyá nginí nínga tikón Kjisoo̱, kó askjandáyà má nga katsjaá kjo̱a̱je Néná,

¹⁶ kó nga jachókoón Kjisoo̱, asiéntikoó ngaskande nga jachótꞌaa̱ kje̱n tꞌanangii̱ nga katsjaá ndokꞌóchjì, kui nda̱a̱ ki̱a̱ chji̱a̱ni nangi Samaria̱.

¹⁷ Sꞌe̱ Kjisoo̱, bi̱ katsoó kui nda̱a̱: –A tiejín májnú xi kamátsjiejón chiꞌinjnú. Kó xi ngi nijaa̱n ñá síndo ki.

¹⁸ A jmíjín ngase xi kjindibátsjaá kjo̱a̱je Néná, ata̱ kuí tsí nda̱ xi chji̱a̱ni nangi Samaria̱.

¹⁹ Kó Kjisoo̱, bi̱ katsoó kui nda̱a̱: –Ti̱sítji̱n, kó tꞌen ꞌne̱, kjo̱a̱sꞌijìi̱n xí je tsꞌaxiéꞌaá ji.

Bi̱ tsꞌén katsóyà Kjisoo̱ kjo̱a̱a̱ ni̱xtjin nga ko̱tíxoma Néná

²⁰ Já fariseoo̱ asíyaá Kjisoo̱ kjo̱a̱a̱ kjiꞌání nga kji̱ndi̱bá ni̱xtjin nga ko̱tíxoma Néná, kó Kjisoo̱, bi̱ katsoó: –Jmí tsi tsijen ka̱ma kjiꞌanga ko̱tíxoma Néná,

²¹ jmíjín xi bi̱ ka̱tso̱: “Kꞌi̱e̱ tikón”, ko̱jo tsi “jàn jàn tikón”, ngatꞌa̱ Néná jè tsꞌénbotixómá ngi̱jinjnú.

²² Kósꞌe̱ bi̱ katsoó xota̱ tsi̱ꞌe̱: –Kjo̱chó ngo ni̱xtjin nga ka̱mamejénjnú nga ndeta̱ ngo ni̱xtjin xcha̱jnú ndií nda̱ xi̱ꞌii̱n, kó xcha̱jínjnú.

²³ Kó tjín xí bi̱ ka̱tso̱jnú: “¡Kꞌi̱e̱ tikón!” Ko̱jo tsi “¡jàn jàn tikón!” Ta̱nga ngata̱ mongínjínjnú, ti̱nde ngata̱ mongíntjíngíjínjnúu̱.

²⁴ Ngatꞌa̱ xikó maá nga foaꞌatꞌe nga ꞌna̱ ma ndeskande ngo nga̱nde, ngaskande xi ingo nga̱ndee̱ ndiꞌakꞌajmii̱, bo̱a̱ má ka̱ma ni̱xtjin nga kjo̱e̱ꞌe ndií nda̱ xi̱ꞌii̱n.

²⁵ Ta̱nga tjón mára achichí kjo̱a̱ni̱ma̱ kjo̱a̱ꞌatio, kó ngayeje xota̱ xi̱ꞌbi̱ xi sa̱ꞌínchꞌó.

²⁶ Kó xikó kamá ni̱xtjin nga kisꞌijña Noee̱, bo̱a̱ má ka̱ma ni̱xtjin nga kjo̱e̱ꞌe ndií nda̱ xi̱ꞌii̱n.

²⁷ Xotaa̱ Iskjinie, ko̱jo katsꞌe, ko̱jo ixán, ko̱jo katsꞌénkixan xkjín, ngaskande nga Noee̱ tsꞌasꞌien ngi̱ya tjotso jee̱, sꞌe̱ kjindibá stsé ꞌniuú, kó katsꞌénkjié ngayeje xotaa̱.

²⁸ Ti̱ bo̱a̱ ti̱ ka̱ma xikó kamá ni̱xtjin nga kisꞌijña Loo̱t, xotaa̱ iskjinie, ko̱jo katsꞌe, ko̱jo tsꞌatsie, ko̱jo atíñá, ko̱jo ítji̱e̱ ni, ko̱jo katsꞌénda ndiꞌa,

²⁹ ta̱nga ni̱xtjin nga jatjo Loo̱t na̱xi̱ńdáꞌniú Sondoma̱, ixó ndiꞌí ko̱jo asufre̱ ndiꞌakꞌajmii̱, kó katsꞌénkjié ngayeje xotaa̱.

³⁰ Bo̱a̱ má ka̱ma nga ko̱kó yojoo̱ ndií nda̱ xi̱ꞌii̱n.

³¹ Kui ni̱xtjin jàn, xi tikón nkꞌaa̱ ndiꞌaa̱, kósꞌe̱ nii̱ ngi̱ya ndiꞌaa̱ ndyi̱a̱, ngata̱ fotjajénjín tsi̱ꞌe̱ nga skjíbé, kó xi ngi̱jin jno̱o̱ tsoꞌbá, ngata̱ fíꞌoyájín.

³² Ngatjaꞌátsjienjnú ni xi kamaá chjo̱ón Loo̱t.

³³ Ngatꞌa̱ ngayeje xi mejeén kꞌo̱xiéꞌá kjo̱a̱mindyioo̱n, ta̱sá sa̱ꞌínchaja, kó ngayeje xi sa̱ꞌínchaja kjo̱a̱mindyioo̱n ta̱ngatꞌanii̱ an, kuí boá xi kjo̱tjoꞌa.

³⁴ Xiyàjnúꞌun jún nga kui ni̱xtji̱e̱e̱n, tsi jó xota̱ xi kjiyojo ngo nga̱són ṉchan, ngo kongínjo̱, sꞌe̱ ngo kꞌuijñá.

³⁵ Tsi jó ínchjín xí nijan kꞌó, ngo kongínjo̱, sꞌe̱ ngo kꞌuijñá.

³⁶ Tsi jó já ndyi̱tsꞌènxá ngi̱jin jno̱o̱, ngo kongínjo̱, sꞌe̱ ngo kꞌuijñá.

³⁷ Kó bi̱ katsó xota̱a̱ Kjisoo̱: –Ñání nga bo̱a̱ ka̱ma Ndi̱a̱. Sꞌe̱ Kjisoo̱, bi̱ katsó: –Nínga tikón yojo kꞌiee̱n, ki̱a̱ ka̱matikó ríkieé.