Ni xi akakoo̱ 8 - Xo̱jo̱n eén Néná

Xi ma yito seyoo̱

¹ Kó kjiꞌanga cho̱tsa̱nga̱a̱ iskjíxꞌaá seyo̱ xi ma yitoo̱ kui chꞌo̱ xo̱jo̱o̱n, masien ora̱ kisꞌie xió xió ndiꞌakꞌajmi jàn.

² Kó kamábe an nga yito ndítsjie xi ndyi̱a̱kixi̱ kje̱n Néná, kó kuí katseꞌeé yito tjio.

³ Kó kjindibá ingo ndítsjie, xi kasasientꞌa ṉchandikoón xi yaꞌa ngo ni xi ꞌbítíyá nisije̱n xi to̱nsinié, kó achichí nisije̱n xi tí katseꞌeé, tsi̱ꞌe̱ nga ki̱a̱ sa̱ngínjii̱n kjo̱a̱ndokjo̱a̱a̱ Néná xí tsi̱ꞌe̱ ngayeje xota̱ tsjiee̱, ki̱a̱ nga̱soón ṉchandikón xí to̱nsinié xi tikón kje̱n nínga tikón xi botixómaá.

⁴ Tsja kui ndítsjiee̱ katsꞌénkijinni ngaskande nínga tikón Néná ṉdi̱i̱ kui nisije̱n xi tjítií, ko̱jo kui kjo̱a̱ndokjo̱a̱a̱ xota̱ na̱xi̱ńdá tsjiee̱ Néná.

⁵ Kó kui ndítsjiee̱ iskjíbé kui ni xi ꞌbítíyá ni sije̱e̱n, kó íkitsie má nga indyiá xꞌueé ndiꞌií kui ṉchandikoón, kó tsꞌajmisón nga̱són tꞌanangii̱, kó kisꞌie cho̱ꞌo̱n, ko̱jo kjo̱a̱foaꞌatꞌe, ko̱jo ngo kjo̱a̱ndi̱ko̱n xí ꞌniú.

Tjioo̱

⁶ Kó nga yito kui ndítsjie xi síndoo̱ nga yito tjioo̱, kisꞌińdonda tsi̱ꞌe̱ nga je sa̱ꞌínkjanie.

⁷ Ndítsjie xi tjoón katsꞌénkjanie tjioo̱, kó tꞌanangii̱ kisꞌie ndókoá xi ndiꞌí, ko̱jo xi jín tsꞌájinni, kó kití ngo nga ján tjiín nga̱sondiee̱, ko̱jo ngo nga ján tjiín ngayeje yá xí tjín ko̱jo ngayeje xka̱ xi sa̱si̱e̱.

⁸ Ndítsjie xi ma joó katsꞌénkjanie tjioo̱, kó xikó maá tsi ngo na̱xi̱ xi tjítíngá ikichijmijin ngi̱jin ndáchíkoón, kó ngo nga ján tjiín xikó kjiꞌi ndáchíkoón nga jín kamá,

⁹ kó ngo nga ján tjiín ngayeje xi síndo ngi̱jii̱n ndáchíkoón xi jesón, kó ngo nga ján tjiín ngayeje tjotso yiꞌi xi tjín ngi̱jin ndáchíkoón xi kiniꞌánkjié.

¹⁰ Ndítsjie xi ma jaán katsꞌénkjanie tjioo̱, kó ngo ńño xi xikó maá ngo yá xí tjítokó ndiꞌí xi tjítí, xi kjindibáni ndiꞌakꞌajmii̱ xi tsꞌákajin ngo nga ján tjiín ngayeje ndejèꞌ xi tjín, ko̱jo ngayeje nínga síndo ndáńchꞌi̱.

¹¹ Kui ńñoo xi sa kiꞌmí, kó ngo nga ján tjiín ndáfoa xi tjín nga̱sondiee̱ xi kamása, kó ta̱ngatꞌanii̱ kui ndáfoa saa̱ nga achichí xota̱ jesón.

¹² Ndítsjie xi ma nijoón katsꞌénkjanie tjioo̱, kó kiniꞌánkjatsón ngo nga ján tjiín tsꞌueé, ko̱jo ngo nga ján tjiín saá, ko̱jo ngo nga ján tjiín ńño xi yajá nkꞌa jàn, tsi̱ꞌe̱ nga kamájñó ngo nga ján tjiín kui nii̱, kó ngiti̱ katsꞌéntsijenjín ngo nga ján tjiín nga ni̱xtjii̱n ko̱jo nga jñoó.

¹³ Kó kamábe an, kó tsintꞌièe̱ ngo ja̱ xi tsoꞌbátji̱e̱n ngamasiee̱n ndiꞌakꞌajmii̱, kó achichí ꞌniú askjandáyà nga bi̱ katsó: –¡Ni̱ma̱ xò, ni̱ma̱ xò, ni̱ma̱ xò xota̱ xi chji̱a̱ni tꞌanangii̱, kjiꞌanga kjo̱ni̱e̱ tjio xi sa̱ꞌínkjanie xi ngi ján ndítsjiee̱!